春天ｅ霧 講台語、寫台文，是飄撇台灣人天生自然的本領。 　

505愛的鼓勵 3訂閱站台

　　因為空課路ｅ緣故，即暫定定經過大目降ｅ重要地標──楊逵文學紀念館。紀念館ｅ門嘴tshai7一座成人懸ｅ祈福主燈，量約暗暝10點以後ui3遐經過，燈身就會被點灼，親像永過ｅ台灣文學、現此時ｅ台語文學，發出微微ｅ光線。
　　舊年11月25，秋日ｅ拜六下晡，日光炎炎，參府城舊冊店潘景新兄，相招來楊逵文學紀念館鬥鬧熱。十四冬來，南瀛文學獎頭擺踮茲頒獎。我ｅ朋友柯柏榮以「缺角的性命」組詩得著現代詩佳作，嘸過，伊袂凍親身領獎，即陣伊猶置內籬仔修行。
　　置紀念館門口埕簽到ｅ所在，參柏榮兄ｅ阿母相會，ui3阿姆風霜ｅ面上，看會出因為柏榮兄ｅ表現，互伊得著安慰ｅ表情，久年來ｅ艱苦、拖磨，暫時走去藏。
　　台灣文學ｅ sian-pai2楊逵ui3日人時代開始，有誠濟擺內籬仔留學ｅ經驗，上界傷重彼擺，因為無夠千字ｅ「和平宣言」，互國民黨政權關十二冬，平均tshe2每一字關五工，楊逵不時笑講伊領著全世界上懸ｅ稿費。
　　柯柏榮少年袂曉想行入暗路，致使人生青春ｅ年歲愛踮內籬仔過度。佳哉，伊無抱著罔度ｅ心理虛度內籬仔ｅ日子，伊信靠上帝、搰力創作台語文學，互伊看見一絲仔內籬仔ｅ春光。
　　2003年3月底，柯柏榮ｅ頭一篇台語散文＜獄海浮沈＞，置我主編ｅ《島鄉台語文學》發表，四冬來伊拍拚深掘，寫出袂少優質ｅ台語文學作品，內面有詩、有散文。現此時伊將其中65首台語詩，集做一冊《娘仔豆的春天》出版。有幸成做伊信任會得過ｅ朋友，我感覺不只仔光榮，柏榮兄無互逐家失望，伊交出來ｅ頭一張成績單，無客氣講，贏過包含個人在內袂少台語詩ｅ創作者，這是柏榮兄值得受肯定ｅ才情。
　　其實，柏榮兄2005年已經得過第十三屆南瀛文學創作獎現代詩佳作，《娘仔豆的春天》第一輯「獄海光景」十首組詩，就是當時得獎ｅ傑作，咱作夥來看＜夢的翼股＞：

　　　揹一對夢的翼股
　　　飛出鐵牆
　　　飛過山　飛過海
　　　坦敧身　飄撇的姿勢
　　　閃過水ciang5　踅過谷溪
　　　飛來到數念的土地

　　　飛啊飛
　　　田嬰佇咧飛　菅芒花佇咧飛
　　　　棒球佇咧飛　風吹佇咧飛
　　　　　飛過嬸婆的柑仔花
　　　　　　飛過叔公的菜瓜棚
　　　　　　　飛過廟埕的榕仔尾

　　　飛啊飛　阿母的白頭鬃佇咧飛
　　　伊佇埕斗曝棉zioh4被
　　　消瘦的身影　頭犁犁

　　柏榮兄置安平出世，囡仔時代ｅ記智永遠難忘，特別是想起故鄉ｅ食物，嘴瀾強欲津落來，無論是海頭阿媽ｅ糋甜粿、古堡跤ｅ蚵仔煎、觀音亭前ｅ周式蝦捲、港仔宮廟埕ｅ蚵嗲，尤其是阿母親手做ｅ肉豉仔，茲ｅ氣味tshua7伊四界踅，引伊寫出＜互故鄉的芳味傷著＞。即首氣味十足ｅ台語詩，互伊得著第十一屆府城文學創作獎現代詩佳作。
　　＜阿母的洋裝＞是我意愛ｅ一首好詩，咱鬥陣來讀阿母經過歲月ｅ流轉，身上彼軀洋裝安怎綴伊起變化：

　　　夢中
　　　阿母來看我

　　　伊猶原穿彼軀
　　　二三十冬毋甘掔挕搡的
　　　洋裝

　　　十外蕊紅帕帕的杜鵑花
　　　千百葉青錦錦的綠葉
　　　開佇一片白茫茫的衫仔頂
　　　
　　　紅花綠葉
　　　隨伊行路的節奏
　　　搖搖擺擺

　　　阮細漢的時陣
　　　見擺若欲去夆請食桌
　　　伊一定穿即軀
　　　「這是恁阿爸買互我的
　　　頭一軀衫仔褲」

　　　洋裝本底狹狹的腰身
　　　愈改愈冗
　　　洋裝本底白白的衫面
　　　愈洗愈黃
　　　像黃昏的山坪
　　　伊黃昏的歲月

　　　「阿母
　　　我即馬咧學台語」

　　　伊笑一下
　　　「咱講幾仔十冬的台語
　　　呔道擱學？」

　　　我吟一首家己寫的
　　　台語詩
　　　「我是咧學讀
　　　佮寫台語啦」

　　　伊聽了　真驚疑
　　　有淡薄仔歡喜

　　　我共伊撒奶
　　　「阿母
　　　妳講妳佮阿爸戀愛的故事
　　　我用台語寫落來
　　　好無？」

　　　伊的兩爿喙phue2
　　　煞開出兩蕊紅絳絳的花蕊
　　　比洋裝的杜鵑花
　　　擱較紅

　　　伊頭略仔cih4 cih4
　　　歹勢歹勢
　　　輕輕仔應一聲
　　　「好」

　　柏榮兄有一首無收踮冊內ｅ百外畷長詩，有歷史感ｅ滄桑氣味，ui3即首詩我閣卡會凍肯定家己ｅ眼光無歪tshuah8。互伊自由ｅ時間佮空間，我有信心，未來台語文學ｅ花園內面，柯柏榮定著會開出一蕊閣一蕊ｅ芳花。
　　柯柏榮是一位謙卑ｅ創作者，伊徛置感恩ｅ角度佮攬抱光明ｅ心情，孵出即首＜日頭的慈悲＞，值得呵咾！最後，咱相敆來欣賞：

　　　光焱焱的日頭光
　　　流瀉規片的溫暖
　　　田岸路　水圳邊
　　　破舊的壁堵　顯目的玻璃簾仔
　　　攏總接受日頭的慈悲
　　　眾生平等

　　　濕澹如青苔　暗淡如深井
　　　的心情　一目睨仔
　　　換一軀彩衣
　　　
　　　日夜交替　春天秋來
　　　掙脫袂開搖擺的鐵籠
　　　清朗的日頭　金黃色的光芒
　　　趄趄掖入牢房　互阮
　　　沈醉佇目眩神迷的七彩
　　　沈醉佇燒烙溫純的慈悲

　　　閃閃輝煌的金黃
　　　鍍佇闊閬閬的青藍
　　　舉頭看天　喙裡吟詩
　　　一具沈重的臭皮囊
　　　宛然輕靈起來
　　　阮孵出一粒自由的心

──2007.3.25寫置埔姜頭