春天ｅ霧 講台語、寫台文，是飄撇台灣人天生自然的本領。 　

505愛的鼓勵 3訂閱站台

舊年(2005)，新世代小說家胡長松出版台語小說集《燈塔下》、《槍聲》；即陣，置遍地鳳凰樹ｅ古都台南，另外一位新世代小說家王貞文欲出版伊頭一本台語小說集《天使》。
　　真拄好，怹兩位優秀ｅ小說家仝時出現置我編ｅ《島鄉台語文學》(2000.12.31第21號)，彼期開始，嘛是《島鄉》漸漸加強文學性ｅ起步，成做我編輯生涯ｅ美麗回憶；一直到《島鄉》停刊(2004.3.30第31號)為止，王貞文、胡長松加上前行代ｅ小說家陳雷，提供濟濟小說為《島鄉》話出一片好光景；設使《島鄉台語文學》未來有好ｅ評價，怹ｅ貢獻必然會受肯定。
　　最近，我ｅ朋友施俊州佮我進行一擺台語文學ｅ深入對話，伊認為台語小說佮散文ｅ成就超過新詩，台語詩人愛知影見笑，當然，伊嘸是指所有ｅ台語詩人，總是，名單若列出來的確包含我在內，我會自我檢討。
　　會記得五冬前，台灣新本土社成立無偌久，我捌置twne網站頂懸向貞文表示，我會好好仔創作小說；五年一目睨過去，貞文已經欲出台語小說集，到旦我猶未交出半篇，有影誠歹勢；置茲我向貞文慎重保證，今年我至少欲寫出一篇台語小說，敬請期待！
　　舊年春天我推薦王貞文發表置《島鄉》ｅ＜自由時代＞，參加第一屆海翁台語文學獎，結果得著小說類正獎，我感覺真光彩；伊置得獎感言有講著《島鄉》是伊練習寫小說ｅ所在，這是伊ｅ客氣話；事實上，是我誠捷給作者催稿，所致貞文有＜一個置熱天ｅ墓＞(改名＜熱天的墓＞)、＜自由時代＞、＜黃色ｅ玫瑰＞、＜落雪的山城＞、＜最後ｅ心情＞(改名＜阿母過身的早起＞)等五篇台語小說發表置《島鄉台語文學》。
　　即擺伊攏總收錄十一篇小說成做《天使》，除去頂面列出ｅ＜自由時代＞、＜熱天的墓＞、＜阿母過身的早起＞；猶有＜天使＞、＜欲吃Phang2＞、＜麻油雞佮芳草橄欖雞＞、＜鳳凰飛到溫泉頂＞、＜行佇結冰的湖面＞、＜薄冰＞、＜橄欖情＞、＜門前有大樹的病院＞等八篇；位伊創作ｅ年箇來看，只有＜天使＞是1990年代完成，其他十篇攏是2000年以後才催生出來。
　伊ｅ頭一篇台語小說＜天使＞(1997.12.15《台灣新文學》第9期)一發表就使人目睭金，受著相當注目，並且入選《台語小說精選卷》(1998年10月前衛出版)，對一位新手來講，這是無簡單ｅ成就。＜天使＞是一篇誠優秀ｅ基督教小說，因為安呢，宋澤萊認為王貞文會凍成做基督教ｅ代表性作家；事實上，王貞文出身基督教家庭，長年置德國讀神學博士，伊會寫出即篇小說，一點仔就袂使人意外。
　　＜自由時代＞(2001.6.30《島鄉台語文學》第23號)是另外一篇優秀ｅ作品，位主題來看會凍歸類做政治小說，he是1989年鄭南榕自焚ｅ年代，彼時王貞文咧讀台南神學院，位伊幾仔首台語詩內底，會凍看出伊有參與學運ｅ經驗，＜自由時代＞減采嘛是伊個人理想ｅ化身。
　　父母囝兒ｅ親情佮男女之間ｅ愛情，成做伊其他小說ｅ重要主題。我無法度一一指出逐篇小說ｅ內容佮特色，安呢通留予讀者卡濟想像空間。
　　總講一句，基督教色彩、反抗精神、德國經驗成做王貞文台語小說ｅ三大特點，其他小說創作者罕得同時出現即三種特色，這是王貞文值得珍惜佮發揮ｅ所在。
　　我嘛映望回歸台灣ｅ王貞文，日後會凍繼續深掘，互伊ｅ小說成做深入鄉土精神內裡ｅ文本，若安呢，伊的確有資格做一位島鄉ｅ天使。

－－2006.5.11寫置埔姜頭