古錐的所在 陳潔民的台語文學網站

233愛的鼓勵 0訂閱站台

 

【台語散文詩】
 
雨的聲說　　　　／陳潔民

 

我覺是我聽到雨聲。佇三樓的冊桌仔前。敢講：落雨矣？

 

佇二月的初春，天氣猶原真寒，住佇半山腰，氣溫降到十四度，就已經予我感覺會挫。

 

反射動作，予我停睏手頭當咧拍字的空課，將雙耳徛起來，靜靜等待雨的聲說大聲起來……。

 

我真正覺是聽到雨聲。

 

徛起來，行到窗仔門邊，將粉紅色角格仔的腳展布扭開，倏一下一聲，將霧面的玻璃窗拍開。

 

惟三樓看過去，窗仔外的後山，正手彼三欉深粉紅色的吉野櫻，佇路燈的映照之下，共款亭亭，開甲赫呢幽美，樹枝頂親像咁著櫻花的芳味。

 

下面彼欉一人懸的白合歡，翠綠的樹欉頂面，開出一葩一葩的粉白色花蕊，親像查某囡仔當咧抹膨粉，古錐閣美麗。

 

左手彼片叢生的竹林隨風搖擺－－看到竹林的時陣，雨聲竟然無去。

 

原來，原來。

 

我覺是聽到的雨聲，原來－－只是夜風吹過彼片叢生的竹林，製造出來的聲影。

 

雨的聲說，原來是一場美麗的誤會。

 

　　──寫佇福山覺心齋    2012.02.18初稿　2012.04.12完稿

 　   ──刊於《台文戰線》第27號，2012.07