自體實驗 吹時嘗試以己身進行實驗，將一套人人由細到大從益智卡通片灌輸之，但少數人會真正實行之價值觀，套用於自己身上。(假設套用方法正確) 再走入人間生態缸，在任由其他獵食者宰殺之前，作出最大反抗。 以証明自己所相信的價值觀，是我正確的選擇。 在此進行詳細紀錄，期待漫長實驗所結之果。

216愛的鼓勵 0訂閱站台

自從年半之前由高處墮下,直到而家,都仲未企得返起身。

之前對設計果團火,就係果個時候一下就熄左。
其實我係非常之咁享受之前有火既日子,係我咁大個女以黎最開心既日子,清楚自己想要乜想做乜,同埋都得到自己想要既野。
真係好幸福。回味至今。

我嘗試努力咁令果團火重燃,搵過第二個啦（結果慘敗而回）,有諗過信教（因為見信教d人咁開心,但係最後都無action）,嘗試去一個有火人聚集既地方,睇下佢地d火可唔可以燒埋我果搭。

以？好似真係有d效喎~同d火人傾過之後,好似真係得得地。
有火老細話,要有良心,要清楚自己想要乜,想做點樣既野。
有火前員工一號插到應：你要小心喎,你好似對設計無乜熱誠喎。
有火前員工二號話，只要見到好既設計會感動,見到壞既設計會啋倒彩,你都仲係有火。

我想要乜？我想做乜？
我想做靚既野出黎,我想做令人覺得讚既野,我想識分好同壞,我仲係好無知好唔夠,我要學好多野!!!

我知道我講左我無火呢單野出黎其實係一件非常白痴既事,一知道我失火就會戴有色眼鏡睇我,覺得我做既任何野都係無火既情況下進行或完成,又或者覺得我唔覺努力,根本唔明白失火係咩情況,只係覺得我懶,一切都只不過係藉口。
不過唔緊要啦,我只想搵到點火既方法,我唔係咁介意我份實習report比人寫成點,有返火對我黎講,先至係最重要既事。

黎到黎度,我先至真正見到有火既人係點,之前我一直留係一個無乜有火人既地方,根本都唔知咩為之真係有火,但係係火人堆既氣圍之下,我知道有火係點。
雖然我唔可以好似以前咁大火,但係我都盡量去潑行d火。

係workshop度我度左條橋係關於我失火既事,點知比知道我失火既人笑,其實幾唔開心。

我諗未試過失火既人,點都唔會知道失火既感覺係幾難受。
明明以前可以好似癲左咁做好多野,仲要做得好開心,能量源源不絕。
但係事情發生後,痛苦既感覺將眼前既所有野都變成灰色,歌詞入面好老套果d咩花開都當枯萎果d其實係真架。
眼見以前既一切成就（成績？）一下子消失,直情係憎自己,好憎自己點解會變成咁。
我自己都有眼睇到架......
失火以前都曾經誤會過一個失火人失火後既狀態,係懶。話努力d咪得囉努力d咪得囉,但係失火後先至發現,努力係需要燃料架。心入面比野壓住,想出力都覺得好困難......講到好似好抽象咁......
算啦,我諗真係無乜人會明架喇,我再解釋唔明既人都只會覺得我係度為自己既懶搵藉口。

點都好啦,我而家最緊要既事係點返著我d火,比我而家學唔學到設計原理更重要。
只要點著到我d火既話,我條路先至可以行得更長。

最後要多謝大火公司入面既人。