車天車地 一個有好多回憶既地方!!!

106愛的鼓勵 0訂閱站台

18-9-08(四)諗著攞把遮出門口返工時，發覺我有2把一模一樣的白色公仔遮只係得番一把，我上次上大陸時，係學校就想取其中一把白色公仔遮時用，發覺學校冇左呢把遮，我就一直以為用2把遮都係屋企，但而家屋企得番一把遮，就好明顯我係學校把遮，俾人攞左o黎用，好心啦!唔該用完把遮還返先得架!
上堂時，教小朋友保護自己，我地玩角色扮演遊戲，我要扮壞人，扼佢地走，請d小朋友出來玩時，佢地真係好單純。

我：小朋友我想問安基幼兒學校點去。
佳：你直行轉灣過天橋。
我：我唔識去，你帶我去啦!
佳：搖頭，並轉身走。
我：咪你咁冇禮貌架，老師冇教你要幫人架咩!
佳：轉身望番我，O嘴!唔識應。

小朋友係單純的，佢地識得樂於助人，但幫人之餘也要學識保護自己，當我再挑戰佢o既品格時，佢就中招了，佳俊你下次可以同佢講：不如你搵大人幫啦!之後d小朋友就醒左，叫d人搵服務員、管理幫。

不過錦盈同偉滇o既表現，實在令人擔心。

我：小朋友你一個人係公園玩?
小：係呀!
我：你媽咪呢?
小：係吉之島
我：我帶你搵媽咪啦!(其他小朋友已經好肉緊，叫佢快d走)
跟住錦盈被我拖住帶走左。阿女呀!你做咩咁傻呀!現實中我都真係擔心你會被人捉左走lor!之後偉滇更嚴重，佢比錦盈醒小小，但佢諗野太straight forward，唔識轉灣。

我：你媽媽係邊?
偉：唔知呀!
我：我係你媽咪個朋友，佢叫我帶你去搵佢。
偉：啊!

佢拖住我跟我走左，d小朋友已經替佢好緊張，叫佢唔好，fing我開手隻，但佢仍然唔知咩事，跟左我走。天阿!!!我相信歹徒要犯案，一定會識(簡)人。要同你地再特訓下先得。

下午分組時，再同錦盈玩一次role play，佢今次醒了，識得跑，唔再理坐陌生人。

我記得我舊年教呢個主題時，阿宜問我：點解你要扮壞人，佢地當時似乎接受唔到呢個世界係有壞人呢回事，事隔一年，佢地叻左了，慢慢學識保護自己，明白不能隨便相信人。

放6:00，又要返學，因為今晚上視導課，今日車程好快，係尖沙咀坐k16，只要15分鐘就能下車了，6:40到課室。個老師係大陸人，成堂講普遍話，好彩我識聽啫。

上到7點幾就放break，從未試過咁早放break，一心諗住可以好早落堂啦!點知係8點幾時，佢用左半個鐘去教我地上網搵refeenece，然後再分組討論呢三年o既研究題目!最後成9點4落堂。

放學後，我行去滙豐中心樓下坐43M小巴出番油麻地，係棋社樓下落車，然後上去搵佢地玩Bang，之後去三洋食飯。

飯後我地去女人街買番副Bang o既紙牌，老闆起初講要$68，最後$35成交，Dranell話佢起初問呢副牌o既價錢時係$20，而家就加到$68，真係誇張。
我、Amy、Chris、Dranell、小保、Kelvin再去百老滙樓下的麥當勞繼續玩Bang，最搞笑一鋪係，Dranell警長殺左我呢個副警，我o既戲實在太好了，扼曬全世界，搞到所有人都要為我係賊，其實Dranell你諗深一層，我用長槍都冇射過你，重周圍幫你殺人就知啦!到最後一鋪時，Kelvin做警長，我做副警，我地最後一齊殺曬全部人，yeah!係呢個遊戲中，我只係爭做二五仔，未贏過，1點半散場。

坐小巴回家，掛住玩NDS，差D唔記得落車。