車天車地 一個有好多回憶既地方!!!

106愛的鼓勵 0訂閱站台

23-6-07(五)同小朋友分享我琴日考完車牌，出門口時有好多人俾學車既傳單同卡片我，想我搵佢地學車，其中一張卡片好搞笑，卡片後印有一句聖經金句：神的話是我腳前的燈是我路上的光。詩篇119:105

講講下卡片，有講小朋友話卡可以攞o黎’嘟’，我話那張係八達通，跟住我攞我銀包d信用卡、學生證、身份證俾佢地睇，我話我個張八達通係有相o架，跟住阿宜話點解唔同樣(八達通、學生證、身份證)，我so一so你都見到張相唔同樣，咁好眼力，跟住我攞番呢幾張卡出o黎俾佢睇，佢話身份證同我而家係一樣樣。緊係啦!身份證個髮型同而家似d。(八達通: 95年F2影、學生證:03年入IED影、身份證:06年換智能卡時影)阿宜講完後，朱仔無啦啦係到講：「差差地」，吓?朱仔你講咩呀?我相信你係講左自己都唔知講咩既說話。
放工去朗豪坊同家媛一齊等元氣壽司，雯雯起初重話放得早會去等位先，結果佢遲到，8:00先到。

排左半個鐘就有位，服務員問我地有幾多人，我地話3人，跟話等一等，跟住問我地後面既人幾多位，人地又話係3位，佢問人地介唔介意要order枱，我同家媛都一齊講點解唔俾我地(我同家媛好夾大家原來都想坐order枱)，結果我地就當然坐order枱，又好彩我地係坐order枱，如果唔係之後穎心同寶文突然話o黎埋一齊食飯，就會冇位了。

飯後去發記食塘水。

24-6-07(六)放12:00，坐青山道小巴去深水埗，今次坐格小巴係7蚊，比上星期那架平1蚊，後來係馬路上見到隔離格青山道小巴係9蚊，搞錯呀!d小巴海鮮價架?好彩我上o架平既啫!

去米線鋪等Mandy，跟住一齊學結他，學學下結他時，收到Helen(Helen係yahoo到投左我對橙色birkenstock鞋)電話，話一陣取貨，下…我琴晚打左兩次電話俾你，你又話冇買鞋，你玩咩呀?本想約你平日夜晚交貨，因我唔想專登返屋企攞對鞋俾你，然後再出過o黎，跟住先返團契。最後Helen決定今日攞，都好既，冇謂拖，咁我唯有學完結他返屋企攞啦!

學完結他，坐青山道小巴返屋企，小巴去到此創時，由乘客問司機係咪行彌敦道，佢話係，我同司機講我想去衞理道，司機話而家隨時改度，剛好而家等緊紅綠橙，佢係路中心開門到叫我入番去花園街坐入面既小巴，咁我咪落車，免費坐了深水埗去太子一段路既小巴，今日條街咁塞車，有排都冇車啦!之後我就行半個鐘返屋企。(其實不嬲係太子呢個位置我都會行路返屋企架啦!問題係今日攞住個結他重d，同埋熱d lor)。4點行到返屋企，跟住行番去油麻地地鐵站到交街，等緊Helen時，見到家媛出閘，我就叫住她，跟住Helen也到，我地就交易(280蚊賣了birkenstock橙色一條帶既鞋，本來對鞋係買俾媽媽的，但佢對腳太細唔啱著)，交易完後同家媛一齊返團契，今日好多舊團友返左o黎，有我o既好朋友Phoebe，Grace同Jason，Phoebe你要繼續返o黎呀!睇到呢篇日記者，也請你們一齊祈禱啦!

今日團契查經，團契後阿Lay教我、雯雯、Vicky整用珠仔整天使(for澳門短宣用)，跟住阿B上八課，我地由7:30上到8:30。之後同阿B去麻酸樂搵穎心、雯雯、浩堅、寶文、Chris一齊食飯。

9:30我離開先，去了明星酒家搵Phoebe、Mandy同偉仔，飯後本想由佐敦行返屋企，但Phoebe叫我行去旺角個邊行陣消化下先返屋企，so行去旺角由衞理道個邊行返屋企。

返屋企check下手機時，俾我發現到原來我係有兩個Helen既電話，咁我琴日係打錯電話俾另一個Helen。Oh…原來是個誤會，如果早d發現，我就會帶定對鞋出街，唔駛專登行番屋企攞鞋la。

Ps：阿Lay教整天使時，話佢自己識用珠仔整波，問我地學唔學，你又所不知啦!穿珠仔係我既強項，我係識整龍貓、傻豹、雞仔、羊仔、豬仔、熊仔、烏龜、拖鞋、十字架、聖誕樹…… 波就唔夠你打啫，穿珠仔我就唔信你叻過我，但你竟然話我可能係買番o黎，你去死啦!跟住你話要同我鬥，你最多咪識穿一個波出黎，我可以整一條動物村呀!:p

其實我都好耐冇穿過珠仔了，得閒時要再穿番。

25-6-07(日)返午堂崇拜後，去Phoebe去通達食lunch，跟住坐MTR去太子坐皇崗巴士上深圳，去三島按摩，我今次用BB油推拿，都幾舒服wor，跟住上三島酒樓食飯，再坐免費小巴返火車站，係商業城都修甲，跟住買了20蚊3斤荔枝返香港，11:00返到屋企。

Ps今次係第一次同Phoebe兩個人上深圳。