車天車地 一個有好多回憶既地方!!!

106愛的鼓勵 0訂閱站台

2-3-07(五)返8:30，沿愛神俓行返工，都係冇太陽，陰沈沈的，係泰澤一有太陽，會覺得好溫暖，感到神俾既溫暖，與我同在。

返到學校，一入到課室，細梁就話我雙眼紅埋，其實我自己都唔知，今朝起身時，只覺睇野矇，以為係眼屎或剛起身睇野矇矓d，就係估唔到係雙眼紅，雖然以前間中都會咁，細梁話我可能係感冒入眼，怕我傳染俾d仔，其實自己d藥都食曬，沙聲又未好，如果再唔休息下，不斷講野，真係好難會好。

於是打電話同校長請假，跟住再打電話預約紅磡診所睇街症，好好地俾即日預約到11:15有位。

跟著派番曬今日d功課俾d仔，再做下班務，到10:20左右就離開，一心諗著去吉之島既KFC食過早餐先去睇醫生，其實明知病同沙聲，要惜身時，係唔應該食D咁熱氣既早餐，不過我真係好想好想食，好難撞到時間去KFC食早餐架!但去到KFC時先知呢間分店只有星期六、日才有早餐買，這就好了，我冇得“簡”，唔駛煩，生活越Simple，就唔駛咁煩。但我又多口問佢係11期個邊間KFC有冇早餐，佢話果間有，於是我行過去果間，係途中，覺得不如唔好食早餐，去搵阿媽，因為我直覺覺得佢會有野叫我幫佢買。

去到百佳時，見佢幫人包緊花紙，同佢打招呼後，佢的確要叫我幫佢買野同埋換剪刀。去到收銀時，個位收銀姐姐似乎唔熟手，我買了2盒19.9既蛋卷、10包2蚊既公仔麵，再加一把唔駛錢換既剪刀，要俾成八十幾蚊，佢收錯我錢，要我俾多三十幾蚊，好彩我心水清，同佢講佢計錯數，於是佢就搵大家姐黎咁番掂。睇黎今日心情應該幾好，等左好耐既時候都冇咩怨言。

11:10行到去差館里天后廟隔離隔離既紅磡診所，一入到去就見到高班學生彭穎博同佢細老彭錫楠，家姐都認得我，我同佢點頭，攞完籌坐低時，家姐坐在係我隔黎，我問佢咩事睇醫生，佢話發燒，我記得昨天放學時，細梁都話佢唔舒服，好似係發燒，要佢帶口罩。我再問佢細佬臉d一點點係咩?(可估係水痘痕跡)，家姐都話係水痘痕，希望佢年紀細，d水痘痕可以快d好番。

一邊等都好累，好想“恰”一陣，但係兩盒蛋卷好鬼大盒，要一齊攬住蛋卷同埋個袋，然後恰一陣就係唔容易，同埋又驚個號數會叫過“龍”，結果都有“恰”，不過每當號收響一聲，我就會聲一聲，即係都冇乜點“恰”過。等到12:00點，終於有得睇，原來而家診所咁“in”，個醫生一邊聽我講病徵，一邊用電腦輸入資料，“掂”，呢個都係一個好醫生，態度好好，問我係埋要寫今日病假，我問可唔可以寫埋明日，因為我教幼稚園，我怕會傳染俾d小朋友，咁佢就幫我寫埋明天既假。佢重可以用電腦“簡”埋俾咩藥我，真係好先進，我睇皮膚科果到都重係用手寫病歷卡同藥。睇街症都只係45蚊，d藥重唔駛令我俾錢$10隻，真係超抵，不過去睇親既都係公公、婆婆、叔叔，所以我呢d後生女去到真係有d唔自然。如果唔係細梁叫我睇街症，我真係諗住返去愛民睇私家醫生算，不過政府d藥又真係會好d。

係家維村大快活買了個焗豬扒飯回家食，今個星期都食了三次大快活了。
12:30回家，1:00食埋藥，再休息一陣，1:30就去睡覺了，訓到4:30就俾電話嘈醒，比我預算既5:30早了一個鐘起身，發覺有一個miss call，以為係samuel打來，msn時佢話佢冇打俾我，後來那個電話再打來，我先知係阿霖，佢今晚會上機陪Alex去台灣工幹，之後下個星期輪到佢去日本工幹，我佢只係答1小時45分機程就可以到台灣，去快會到，對比起我坐了十幾個鐘頭飛機先返到香港，真係太短太短了，突然恐懼了答咁耐飛機，以前既我好鐘意去機場撘飛機既feel，經過完今次就有d保留，希望下次再撘飛機時會係仍然鐘意啦!

今日Samuel教我同佢對話時，佢一邊教路就話我地而家好似孤男寡女咁，佢係劉德華，我係鄭秀文，佢教我點樣對佢(海俊傑)咁。我都覺得好似!

返左香港呢幾日，都好想快d到星期日，想返church，好想返去感覺神，呢種感覺以前從未試過，以前可能為人，為之後既聯誼，但我想返去feel番係泰澤既church個種感覺，好舒服、好寧靜、好平安。