今日一行入辦公室，語文老師就問我，做咩叫我寫一句話作文我會寫發揮主觀能動性啊？政治老師博命係度笑：無計啦，鬼叫佢學得哲學多咩？
真係矛盾。
我那個很可愛的政治老師話，哲學其實就係將人嘅世界觀總結一下，換個詞，講返pro小小，未哲學咯。好似D道理咁，明明好顯淺嘅，佢就係都要話嗰D叫方法論。好似硬係要叫卓妍做蔡小姐咁。但係我無辦法改變，就唯有開始活學活用。見到咩都要用哲學講下佢，真係聯係具有普遍性咩。以至於我寫作文都要寫D政治知識落去。量變質變、馬克思主義嗰D，我通通都寫過曬……但我發現，原來我D作文唔係好高分咋喔。點解呢，我咁pro……
后尾語文老師先解釋返話，嘿，你咁鬼死命令性，篇作文邊好睇喔，你梗係要講得感性D啦。即係講道理啊，或者用小故事，anyway，溫柔D先tum到人落搭gar。聼完真係頓時醒悟，於是乎我又要將D方法論變返道理。學政治學得耐，都已經忘記咩叫感性，剩係識得用強硬嘅概念嚟説服人。唔記得咩叫感動，雖然我睇電視劇成日哭……
然後先發覺，我份人都係咁。
好多時候我唔識點樣表達自己。仲係13、4嵗嘅時候，把口還有力去死拗爛抝，甚至到16、7嵗都好中意拗贏人，好中意將自己嘅觀點都睇成啱嘅，中意講自以爲很了不起的道理。今年，我19嵗啦。我發現我無曬同人辯論嘅力量，除咗一D學術性嘅問題。以前我見人做錯事，我就會講一大段嘢去令到嗰個人意識到自己嘅錯誤以及改過自新，而傢我見到一個人行錯路，我會唸更多嘅係，雖然佢行緊一條我乃至於社會都不太認同嘅路，我還係欠缺阻止嘅資格。
我依然會心痛，但係我唔會講。因爲我明白，實踐先係檢驗真理嘅唯一標準。等於我初中唔讀書，幾多道理我都係唔讀。現在我想讀書，我就連玩都唔想玩。所以我見到我哋班D男同學日日訓覺、打psp，我都已經唔會理。道理我高三之前都同佢哋講過曬，唔識唸嘅我幫唔到，識唸嘅我幾辛苦都幫。嘿，你估幫人補習英語或者政治好痛苦咩，都不知幾爽啊，自己又復多次……不過話曬美術都差唔多個個有本科讀啦，如果因爲區區300都摞唔到而重讀，有乜謂呢……又唔係個個都好似我咁放豬考埋政治。
以前我試過做錯好多嘢，一D當時並唔意識到錯但而傢想後悔都嚟唔切嘅嘢。我以爲嗰D叫新鮮，叫刺激，我以爲我身邊嘅人一樣係咁唸，但其實自己係傻仔。記得過年嗰陣大雄出院，請我哋去佢個飯店吃飯。好多人啊，兩部小車兩部摩托兩圍台。飲酒嘅坐一圍，斯文人坐一圍。我坐係大雄隔離，一邊同業虹傾計，一邊望住kuku佢哋飲，係咁飲……大雄突然大大聲話，你唔係好飲得嘅咩？做咩唔過去啊？頓時我唔出聲。
落club可以令你同一堆人馬上玩埋一齊，但係嗰D並唔係朋友。尤其係一D大過你、叫你出嚟玩嘅人，佢哋雖然會同自己好夾，但其實佢暗地裏會認爲自己好笨。試過有一次，我朋友飲醉，當時我唔覺得聽到一個同佢貌似好friend嘅男人同第二個男人講：喂，你上唔上啊，唔上我上啊。我即時扯個friend走。無一個人會欣賞一個中意去蒲嘅女仔，至少一個中意去蒲嘅女仔唔值得人欣賞。呢個係我對自己嘅睇法。
有人話我唸嘢成熟，或者佢哋希望成爲我。同時有好多前輩話我幼稚，我就希望我真係好幼稚。其實道理係永遠都學唔完嘅，而人所學嘅道理一定係產生于佢嘅人生觀、價值觀。有個朋友同我講，D錢係擺係度gar啦，我唔賺一樣有人賺ja，咁我做咩咁傻啊。佢係做外圍嘅。亦因爲道理永遠都學唔完，我學識細心聆聽前輩們講嘅每一番説話。以前我會善於為自己辯護，現在我會思考，可能我呢一刻唔認同佢嘅説法，或者下一秒我就會識得開竅。我尊重前輩，因爲佢哋嘅人生比我有經驗。
雖然已經唔中意講道理，但係我中意閙。關於我嘅好朋友，我嘅態度一直都好堅定。還記得以前刊件事，過去都有一段時間了，但我知佢當時肯定好嬲我閙佢，係未？你誤解我，我知道唔可以完全怪你。Sorry啦，係我too nervous ja。如果犯錯嘅唔係你，我真係慳返D口水好過啦……
我冷漠了，這就是我寫不好作文的原因。當然爲了我的高考，我會閲讀很多素材，我會變回感性的我，我會學着在媽媽面前看電視劇看到哭然後都不掩飾。放在政治書上的紙船，童年的回憶，我唯一會弄的玩意。只是我真的不想做自以爲是的好人，我沒有那個本事。我也是自私的，我不想挽救誰的一切，不想扶着誰走一條正路。或者誰也不需要我，but I need Charlene.
文章定位：
人氣(177) | 回應(4)| 推薦 (
0)| 收藏 (
0)|
轉寄
全站分類:
不分類
