青年詩人李長青寫詩多年，伊的詩結合現代主義的技巧、寫實主義的精神，表現出1990年代以後到現此時台灣社會的多重面腔；伊用華語寫的詩，佇濟濟青年詩人當中，特別有一款互人感動的感情，總是對台灣的土地、歷史佮社會、百姓，懷抱著深情佮疼惜，寫出新的一代台灣詩人的心聲。
這本詩集《江湖》，是李長青第一本用台灣話寫出來的詩集，參誠早就用台語寫作的詩人比起來，檢采骹步有卡慢淡薄，不過伊踏出來的骹跡，卻是不止仔媠氣，而且會當展現出一種新氣象：用台語寫的詩，仝款會使哩處理1990年代了後進入後現代社會的種種狀況，會使哩表現後資本主義佇台灣社會生湠的症頭。在我來看，這是誠無簡單的突破，過去的台語詩創作，多多少少攏無法度脫出農業社會時代台灣鄉土的場所，寫台灣農村、故鄉、田園佮台灣人的人情事理，表現的是農業台灣的色水；部分是對戒嚴年代威權政治的抗議佮控訴，宣揚台灣人的集體認同佮央望──李長青的台語詩，毋na是an-ne，伊擱進一步表現出新時代、新世紀台灣面對的後現代狀況，透過題材的選擇、內容的翻新、技巧的轉化，來寫出台語現代詩的新的聲勢。
歸部《江湖》台語詩集分做六輯，其中後兩輯延續1970年代以來台語詩的主調，對政治議題佮鄉土感情切入去，表現伊對台灣的感情；頭前四輯就無相仝，對第一輯到第四輯，攏會當看著李長青想boeh開創台語詩新的眼界佮新的領土的企圖。第一輯「事件」收入七首作品，其中〈選擇〉運用圖像來表現選擇的無容易，李長青將這首詩用雙重的圓箍來表現，內圍佮外圍攏用單字來箍出圓箍仔，大略仔會用看出是採用春夏秋冬、眼耳鼻舌身意、風雨雷電、紅橙藍綠黃靛紫等等字詞，特別ka拆散，請裁排排le，boeh互讀者家己猜。誠明顯這是採用後現代的寫作手法，透過拆散、重組，展示「選擇」的過程，暗示選擇無hia-nih簡單，尤其是佇這le時代、這le世界──這是台語詩寫作真少看著的試驗，會當看出李長青想boeh突破台語詩侷限的拼勢。
第二輯「對時間的理解」收十二首作品，會用講是《江湖》詩集上突出的部份。佇這輯當中，李長青的企圖真清楚，伊對「時間」佮「世界」兩個角度切入來，時間的長佮短、空間的遠隔近，佇伊的詩內底，親像難分難離，佇〈對世界的理解〉這首詩內底，伊仝款透過圖像排列的方式，用水湧一懸一低的圖形，表現空間；而且亦通過懸佮低的組合，使弄讀者目珠的震動，來達成一款讀詩的趣味佮暗示：這個世界，本誠就是懸佮低的組合。形式的變化，毋na是形式，同時亦是內涵，空間的懸低，透過詩句的排列，互讀的人擱加深刻的感受。這亦親像另外一首〈微小世界〉引用諾貝爾物理獎得主Richard P. Feynman所講的「佇微小世界猶原有真濟空間」這句話，風雨雷電、過去佮未來，攏充滿著空縫，攏存在著一個世界仝款──李長青的試驗，最少會當證明，台語詩的世界ma會當處理空間參時間的議題，而且會當處理ka真媠氣。第三輯「江湖」佮第四輯「落雪」當中，有誠濟詩作ma攏有這款水準，值得讀者斟酌看、用心讀。
我誠歡喜看著李長青行出來的這條新路，有李長青這款的優秀詩人投入，有《江湖》這本新的詩集出版，對進展中的台語文學界來講，是一個好消息。江湖希微，台灣文學自從1990年代開始，就陷入困境，台語文學的開創，仝款也面對著題材開拓、內涵深化的挑戰，李長青投入台語詩的寫作，而且第一本詩集就有chia-ni 媠氣的表現，我央望伊會當繼續寫落去，為21世紀的台語詩開出芳花欉！
文章定位：
人氣(484) | 回應(4)| 推薦 (
0)| 收藏 (
0)|
轉寄
全站分類:
不分類
