還不如放肆 成熟是開始覺得生活的次序和下場越來越清晰可見，可能性越來越少。 擅長負責任地思考的墮落中年，現在只想拼死守衛常識。

224愛的鼓勵 0訂閱站台

<西遊記大結局之仙履奇緣> 係我認為周星馳嘅三套代表作之一, 另外兩套叫 <唐伯亮點秋香>, 同埋 <國產零零漆>。
<月光寶盒>、<大內密探零零發> 同 <回魂夜> 唔係唔好, 但總係爭些少。又不過點都好過晒 <少林足球> 。
係時候擔心 <功夫> ...



感動位估唔到係由紫霞 (朱茵) 帶俾我。估唔到係因為從來認為朱茵唔太識做戲。喺 <仙履奇緣> 都覺得佢係唔好, 不過跟住劇情發展佢嘅演出慢慢好轉; 又或者角色本身好有發揮。

(紫霞被牛魔王叉一嘢之前一幕)
紫霞仙子: 衰人！
齊天大聖: 你又想點呀, 賤人。
紫霞仙子: 仆街！
齊天大聖: 仆你個街。
紫霞仙子: 冚家剷！
齊天大聖: 冚你個家剷！你唔好再發神經喇！我頭先同妳講嘅嘢你明唔明呀！
紫霞仙子: 咁你又明唔明我已經唔再係神仙呀? 我要問明一樣嘢, 原來喜歡一個人係咁痛苦架！
齊天大聖: 你唔好同我講埋晒呢 D 廢話, 我都話你認錯人咯！
紫霞仙子: 咁呢串金鈴你喺邊間鋪頭買架?

好多戲都有角色幫人硬食一槍 or 一刀, 但紫霞俾牛魔王叉中呢一下, 真係好痛, 同埋無悔。同類型角色只輸俾 <大隻佬> 嘅湯寶如。

(紫霞死前一幕)
齊天大聖: 紫霞！
紫霞仙子: 我嘅意中人係一個蓋世嘅人物, 有一日佢會踩住七色彩雲黎迎娶我。我估中咗個開頭, 但我估唔到個結局。



因為劉鎮偉, 王家衛陰魂不散。至尊寶發開口夢嘅七百八十五次紫霞、0.01 公分嘅距離... <重慶森林> 入面何志武嘅一萬年, <仙履奇緣> 出現過兩次, 第一次係為舊愛而對新歡講嘅完美大話; 最後一次係喺金剛圈面前, 剖白自己離開塵世前嘅最大遺憾。



好有興趣了解菩提子, 繼續搶鏡, 光芒四射。一幕佢同至尊寶 (周星馳) 將 <月光寶盒> 濃縮一分鐘版重演, 想解釋俾白晶晶 (莫文蔚) 知五百年前嘅事當中包括我提過嘅野性場面; 同埋另一幕佢同至尊寶討論愛情, 好正好正。

(至尊寶同菩提子重演 <月光寶盒> 場面節錄)
至尊寶: 喺斷崖頂, 就係感情爆發嘅時候。當時我不顧一切咁『抄』妳, 妳又不顧一切咁『抄』我。

(至尊寶發開口夢之中瞓醒)
至尊寶: 出黎啦菩提子。
菩提子: 我唔係想監視你, 只不過係想研究一吓人與人之間嘅一 D 微妙感情啫。
至尊寶: 賊黎啫你...大佬呀, 唔好學人研究嘢啦。
菩提子: 賊都有好學嘅。
至尊寶: 慳 D 啦你, 瞓啦。
菩提子: 紫霞喺你心目中係咪一個感歎號? 抑或係一個句號? 你腦海裡係咪充滿問號呢?
至尊寶: 紫霞只不過係一個我識得嘅人！我以前講過一個大話呃佢, 我而家心裡面有多少內疚咁解嘅啫！我愈黎愈討厭佢, 我聽日結婚喇, 想點啫而家！
菩提子: 有一日當你發覺你愛上一個你討厭嘅人, 呢段感情先至係最攞膽。
至尊寶: 但係我點會受上一個我討厭嘅人呢！你俾個理由我丫唔該！
菩提子: 愛一個係要理由架咩?
至尊寶: 唔駛架咩?
菩提子: 要架咩?
至尊寶: 唔駛架咩?
菩提子: 要架咩?
至尊寶: 唔駛架咩！



最後一幕, 上咗夕陽武士身嘅齊天大聖:『我呢世都唔會走。我愛你！』
錫嘅時候, 朱茵並唔係紫霞仙子。齊天大聖嘅後悔永不磨滅。

換個角度睇, 原來周圍好多夕陽武士。親口講過嘅承諾, 最後都唔肯定自己有無講過。



白晶晶: 呢 D 係天意, 亦係傳說中嘅緣份。






(p.s. 我唔適合愛電影, 我係知架。由 <十二夜> 嘅跳敍式愛情, 到睇過十九幾次嘅兩隻 <西遊記> 嘅移魂大法, 我繼續分唔清楚...)

(p.s. 一直播住主題曲 <一生所愛> 去寫呢篇新聞, 75 分鐘有多嘅時間播咗 22 次。辛苦你喇盧冠廷。)