尋晚半夜忽發雅興,想去行山,咁上網search,見到啲相幾靚嘛決定去衛奕信徑第四段. 咁朝本來一早十點出發,但係點知遲咗起身,嘛食完飯先去囉.
一點半去到井欄樹,經過一段路去到第四段起點,一開始就己經好多蚊,我著背心短褲就更加惹蚊,一手拍落腳度己經成腳血….廿分鐘就到達一小溪,啲水好清,我就影咗兩相自拍照. 再行半個鐘就會去到一個分叉口,可以去蠔涌/百花林的,但係要繼續行,會去到大藍湖村,遇到三個行山人,沿著引水道會去到東洋山,當時係二時半,呢個山,高544米,我上咗一陣遇到三個分叉路,咁我好隨便咁揀咗個,越行越難,仲跌親,損手損腳,之後繼續發覺係條水路,一腳踩咗落去,慘喇,傷口好痛添. 咁唯有回頭喇,但係我又唔咁心,所以繼續揾,卒之有第四條路.
一直上,可以上到東洋山頂,途中無樹,今日又晒到傻,我上咗二百米己經頂唔順,唯有抖吓,咁上多陣己經可以見到成個西貢,好多白帆船出海,可惡. 咁我邊行邊抖邊睇風境,西貢係好天的時候真係好靚,三點鐘的陽光係毒箭,可憐的我,對鞋己經濕咗,傷口又痛,一級一級咁捱上去,背心一早己經濕到除咗,水又唔敢飲晒喎…..最後上山段路斜到好似上天堂咁,落黎的時候竟然見到無線拍緊劇,應該係”嘉樂”仔拍古裝戲,咁我嘛坐係山頂度等佢地拍完行.
點知又行錯路,落咗基維爾camp,回頭再行,上咗個亭,有對男方,又有人玩遙控飛機,休息咗陣,大約四點鐘, 南橫過到大老山,會見到天文台,跟住係飛鵝山,又有對男女,見到地下有condom呀....不過個景真係好靚,望個成個東九龍,重望埋對面海,真係好掂. 咁我一路落沙田坳道,途中就越黎多人,因為距觀音廟近,有唔少人係個山度攞水飲覺得係神仙水,最後落番鑽石山,當時大約五點. 咁我繼續行去荷里活廣場瞓咗半個鐘,因為真係好攰. 之後出旺角.
咁七點半同kwan去攞啲嘢,發覺有團去布吉都係2千幾五日四夜,都幾ok,不過要決定自己去定跟package. 之後去咗KK café/pub食,都叫咗個排,得六成熟, 不過都幾好食. 去咗尖咀山林道一間bar,應該叫pink bar飲嘢,原來裏面好嘈吓,不,所以我地係一齊坐而唔係打對坐. 身邊有個男仔唱beyond歌,首首都係飲歌,我地叫咗個好大好抵的洋蔥圏,飲咗唔多,咁十一點幾就走.
相幾靚,仲有我的珍貴露點照:
http://community.webshots.com/user/dennislo/1
