荷塘詩韻一 文字是一輩子不悔的戀人 /詩是靈魂最美麗的鈴響/ 生命在旅行中豐富/ 視野在旅行中提升/ 知識在旅行中印證/ 心靈在旅行中感動/

25,230愛的鼓勵 33訂閱站台

我詩予你看 ◎林沈默 我的詩， 毋是寫佇雲端。 我的名， 掖佇土地人間。 我詩予你看── 親像野貓彼一般， 我的詩宓佇暗巷： 看著有錢飲甲面紅紅、 看著無錢褪甲身空空、 看著抾紙婆仔收破夢、 看著都市世界錢咬錢人食人。 我詩予你看── 親像鋤頭彼一般， 我的詩吊佇田岸： 看著一粒米二四點汗， 看著柳丁一斤三箍半、 看著青菜放佇田底爛、 看著農村草地一步一步崩盤。 我詩予你看── 親像飛鼠彼一般， 我的詩歇佇高山： 看著怪手剖腹開溫泉、 看著土石滾滾來起叛、 看著山羌啼哭找無伴、 看著原住民祖靈高處不勝寒。 我詩予你看── 親像燈塔彼一般， 我的詩照佇港岸： 看著飼蠓的魚塭鹽灘、 看著討海人空船畏寒、 看著對岸笑面排飛彈、 看著海翁國家變做一尾魚干。 我詩予你看── 我是一?綁腳巾的刺客， 毋是頭戴桂冠的斯文人。 我的詩毋是七彩噴泉， 毋做畫山擦水的花盤。 橫直，我的筆尾， 無芳水，也揣無浪漫， 只有土味，佮百姓臭酸汗。 這是用恁祖媽的母語打製， 生活、戰鬥的扁鑽， 準備一針刺入…… 挖醒世間不公不義的心肝。 我詩予你看── 喂，請你嘛詩予我看！ 台音義注： 1.我詩予（hoo3）你看：我的詩讓你看看。／2.掖佇（ia4-ti4）：撒播在……地方。／3.暗巷：城市風化區。／4.褪（thng3）甲身空空（kang）：脫到一絲不掛。甲，暫借字。／5.抾（khio4）紙婆仔，拾荒的老嫗。／6.三箍（koo1）半：三塊半。／7.毋（m3）是：不是。／8.海翁國家：台灣島形似鯨魚，喻活跳跳的海洋國家。／9.一?（e）：一個。／10.芳（phan）水：香水。／11.揣（tshue4）無：找不到。／12.佮（ka）：和……／13.恁（lin2）祖媽：您的老祖宗。 --------- 閱讀詩人 林沈默的台語詩，就是四個字：淋漓痛快。