我e 祕密花園＠星光.月光.日頭光｜PChome Online 個人新聞台

2003-05-13 10:46:35| 人氣398| 回應0 | 上一篇 | 下一篇

我e 祕密花園

推薦 0 收藏 0 轉貼0 訂閱站台

朋友吳e ti 樓尾頂起造1e 空中花園。花園內有各種e 花草，1 e 小小e 噴水池，細粒石頭a 鋪作1 條彎彎e 小路，通柴作e 6 角亭，這座 6 角亭號作「靜觀亭」。坐ti 涼亭內，風微微a 吹來，會凍鼻著空氣中有玉蘭花e 清芳，潺潺e 水流聲，好親像ka 歸身軀e 微塵沖洗ka 清清氣氣，歸e 人攏輕鬆起來。

朋友吳e 穡頭濟，工課誠無閒，m koh，逐工上班晉前，伊攏會撥時間去整理伊e 空中花園，拾樹葉仔、沃水、挽草…，事事項項攏家己來。暗頓食飽，歇1下仔喘，有時家己1 e ，有時招某囝作伙，ti 靜觀亭泡茶開講、看夜景、想人生…。

有時星光，有時月光，有時透風，有時落雨，攏是人生e 好風景。

吳e 誠好客，歇睏日真濟朋友攏會來in 兜，ti 靜觀亭泡茶、吹涼，分享伊用愛心起造e 空中花園。

花園內鳥仔 na 來na 濟，有1 擺阮發現2e 鳥仔siu ，伊擱真歡喜報阮看內面古錐e 鳥仔囝。

舊年阮搬來kap 吳e 仝社區，m 知欣羨外濟人。會凍順利買著彼間厝，講起來擱是1 e lo-lo 長e 故事，總是天公伯仔安排、照顧。離開沃齪e 工業區，窗仔門拍開有清涼新鮮e 空氣入來，暗時ti 虫仔唱催眠曲中睏去，逐工透早ti 鳥仔e 歌聲中醒來，對愛大自然e 阮，這就是siong 大e 享受。

Chim-a，阮干單peh 起來樓尾頂，行無幾腳步著會到吳e e 空中花園，伊講：「隨時歡迎 lin 來！看著落葉仔幫我鬥拾拾咧！」

請長假晉前，同事攏一直問我kam 無經濟壓力kap 厝貸款e 問題？是啦！汰無leh！只是我感覺真thiam，需要好好歇睏1下，m 願像張艾嘉唱e 「忙與盲」彼首歌內面按呢過日，無想beh ti 人生結束e 時擱有遺憾，想beh 好好感覺家己、好好活ti「當下」。錢kam 有人會嫌濟？亞歷山大大帝死去了後，ui 棺柴伸出空空e 雙手遊街，ka 咱講啥物？上帝連1蕊野生e 百合花著看顧，kam be 照顧阮？我ka 家己講mai 擱為明仔載操煩！

無上班e 這段時間，吳e e 空中花園變作我e 祕密花園。

我ti 祕密花園內面看冊、寫稿、坐禪、觀自在…。
1e 人恬恬仔看雲、看天、看山！
1e 人恬恬仔聽水聲、風聲、聽花仔和尚（五色鳥）、青笛仔（綠繡眼）、ba7 hioh8（老鷹）e 叫聲！
1e 人靜聽大自然e 聲音， 1 屑仔著be 孤單！
我愛享受1e 人e 寧靜kap 自在。

2003.05.12

我要檢舉

台長： A-chiak