1999.09.01 拜 3
讀國中e 第一工，老師愛阮自我介紹，我有夠緊張，根本攏聽無同學 leh 講啥 ，輪著我e 時，我頭殼完全空空，khia ti台頂憨憨a 笑，匈匈台語 ui 嘴 nih 走出來，「大家好！我叫林美成，我e 阿姊叫美麗，阿兄叫智成，2 e 名合起來美成就是我… 」台 kha 笑ka kiak-kiak 叫，老師叫我用「國語」擱講1擺，我 chiah 發現我用 e 是台語，無法度！自細漢慣勢講台語，he 是我 kap 阿媽 thong 親密e 語言，雖 bong ti 學校我會提醒家己， mai kap 別人 siuN 無仝款，m-koh 我感覺真怪奇，平平攏台灣人，siaN -noa ti 學校攏講「國語」，無teh 講台灣話，ma 無teh 教台語，國小 e 時陣，我 bat 問阿媽，阿媽講後擺大漢著知 a ，chim 我讀國中 a ，阿媽講我大漢 a ，我 iah 是 m 知，干單知影同學當中有e 聽有，m-koh be 曉講，有e 聽有 ma 會曉講，m-koh 無咧講，lu 來 lu be 曉講，我真煩惱後遍無 kui-e 人，會tang 用台語 kap 我溝通。
1999.09.03 拜 5
下課 e 時，1e 頭鬃 phong-phong ， 掛 1 支烏框目鏡 e 查某 gin-a ，ui 伊e 位行過來，伊文文 a 笑，吞 1 e 嘴瀾了後，講「我叫李淑卿，想 beh kap 你作好朋友，好 bou？」我 chioh 歡喜 koh 驚惶，伊竟然主動 beh kap 我作好朋友，koh kap 我講台語，伊講 hit 工聽我用台語自我介紹，感覺 chiaN 心適，ma chiaN 親切 ，be 輸是 in 厝內 e 人，in ti 厝 nih 攏講台語，m-koh kap 外人攏講「國語」，伊 ma m 知為啥mih 。阮 2 人約束 beh 作好朋友。
1放學，我緊tng 去ka 阿媽講 chit-e 好消息，「我 e 乖孫 ti 學校有伴 a …」阿媽chiok歡喜e，為著慶祝 ti 新環境有 1 e 好朋友，阿媽暗時 chhoa 我去 seh 夜市a，食蚵a 煎，ie!
1999.09.06 拜 1
阿卿招我去校園 seh-seh leh ，阮發現音樂教室邊 a ，有1chang 老chheng a ，樹葉 om-om-om，樹身大khou koh 擺出 chiaN 美麗 e 姿勢，乎阮e kha 步自然停 ti hia ，chheng-a 護衛出 1 片陰涼 e 天地，日頭公 a ma 無可奈何，hip 熱 e 天氣，坐 ti 樹 kha 吹涼是天大地大 e享受。
1999.09.08 拜 3
放學 tng 來，阿媽問我 ti 學校有啥mih 心適 e代誌bou，我in無，講今仔日功課卡濟 ，beh 緊入去房間寫字，m 知阿媽有起 giau-gi bou，我m敢講媽媽來學校看我，驚阿媽會無歡喜。
中晝，老師講有人 chhoe 我，我著知影是媽媽，自從媽媽離開了後，tak 擺開學無 joa 久，攏會來學校看我，媽媽用伊溫柔e 口氣對我講「美成大漢 a ，ti 厝有乖bou ？有聽阿媽 kap 爸爸 e 話bou？ 」伊伸手beh so 我 e 頭殼，我退後 1 步。
我看著伊e 目箍紅紅，我想伊一定去看過阿兄，阿姊 kap 阿兄攏對媽媽真冷淡，有時陣 阿兄 koh 會講 1 koa 無好聽 e 話，乎媽媽傷心流目屎，In 叫我 mai chhap 伊，我感覺媽媽真苦憐，m-koh 誰叫伊 beh 放sak 阮？
一直到媽媽 tng 去，我攏無講話，干單用 tim 頭 haiN 頭來回答。
1999.09.09 拜 4
Chai 起阿卿看著我就問我「來 chhoe 你 e 人是啥 ？是 m 是你 e 媽媽，iah 是你e 阿 姨？」中晝時導師ma 叫我去問，伊講媽媽 1 choa 路 hiah- nih 遠，專工 ui 斗六坐火車來台北看我，siaN -noa 我 m kap 媽媽講話，「媽媽 chioh 關心你 ，吩咐老師若有啥mih 代誌，隨時攏會 tang 敲電話 kap 伊聯絡」 「關心？若是關心阮，thai beh 離開阮 ？tak 年來看阮 1 、 2 遍著叫作關心？阮破病e 時 siang 照顧阮…？」導師好親像看出我 e 心思，伊講「大人 e 感情世界，m 是簡單會 tang 理解 e ，siang kah意家己e 婚姻破裂？siang kah 意離開家己心所愛e 人？離開家己e kiaN 兒 ？媽媽有伊不得已 e 苦衷，ng 望你會 tang 諒解」我無聲無說，老師愛我好好思考，尾a hit 句話我聽攏無「只有原諒人，家己 chiah 會 tang 得著 thau-pang 」。
1999.09.10 拜 5
阮來到老 chheng a kha ，享受 1 陣陣涼風吹 e 快樂，阿卿靠 ti 樹身唱歌乎我聽，有 1、2 隻蟬，不時 ki-ki 叫，be 輸 leh kap 伊合奏，chiaN 心適。
我 tiam-tiam 聽，阿卿 e歌聲真好聽，真濟台灣民謠 kap 「國語」歌曲，伊攏會曉唱，伊講 In 媽媽 chioh 愛唱歌，大部份攏 In 媽媽教e，阿卿招我禮拜日去 In tau 。伊匈匈問我 kam-be 思念媽媽？
1999.09.12 禮拜
今仔日真是快樂 e 1 工，chai 起 kap 阿卿約好 9 點 ti 冊店門口 sio 等，chiah 作伙去 In-tau ，阿卿 In 厝有 5 e 人，爸爸、媽媽、大兄、kap 1 e 小弟，In 攏真歡迎我，阿嬸 phang 果子出來按耐我，阿叔叫我後遍 kha-chiap 來，In 大兄 kap 小弟 ti 客廳 sng 電腦，阿 卿 chhoa 我入去伊 e 房間，房間內有真濟文學作品 kap ang-a 冊 ，功課寫好，阮 na 聽音樂 na 看 ang-a 冊 ，一 直到阿嬸叫食中晝，阮 koh m 甘歇睏。
In e 客廳有一台裁縫車 a ，阿卿講 In 媽媽自少年著來台北學做衫，工夫 sia-sia 叫，頭家娘 chheng-chai ma ka o-lo 。阿嬸 oan-na 作衫褲 oan-na 聽 la-ji-ou ，莫怪 hiah ni gau 唱歌。
1999.09.15 拜 3
1 入門toh 感覺氣氛怪怪，緊bih 入去房間寫功課，一直到阿媽叫食暗頓chiah 出來，阿爸kek 1 e 屎面，阿姊補習iau-boe tng 來，阿兄koh 無看著人，唉！
暗時阿媽 phang 1碗紅豆a 湯乎我食，叫我m通 kap 阿爸 siuN 氣，愛體諒阿爸，阿爸為著阿兄e 代誌真操煩，老師敲電話講阿兄無去學校，阿爸ti 「網路coff」chhoe 著伊，chhoa tng 來，2 e 大聲細聲相嚷，了後阿兄koh 走出去，kau-taN ia-boe tng 來。
阿兄！是m 是干單拍電動著飽a ？an-ni kam 會tang 乎家己正港歡喜？
1999.09.16 拜 4
Cha 暝倒ti 眠床睏be 去，阿姊 ma iau-boe 睏去，我ka 阿姊講阿兄koh 偷走書去拍電動e 代誌，阿姊吐大khui 講阿兄真苦憐，阿爸阿母離婚對伊 e 傷害hiah ni 大，阿兄國中 2 年e 時陣，是阿爸阿母oan-ke oan ka siong 厲害e 時，tak 工吵吵鬧鬧，be 輸冤仇人leh ，阿兄ti 課業kap 家庭革命雙重壓力之下，開始kap 人oan-ke 相拍、kah 車、離家出走…，伊用叛逆e方式控訴心內e 不滿kap 痛苦，「網路coffee」是伊躲避現實e 所在。
阿姊是bih ti 冊堆內，準備聯考，tiaN-tiaN 含著目屎入眠。
原來我ti 台南giau-gi In nai hiah ni 久無 tng 來看阿媽kap 我e 時，In 發生hiah 濟代誌。
1999.09.18 拜 6
阿媽tiaN-tiaN 講：「美成 a！Lin 阿爸為 Lin 犧牲 hiah ni 大，Lin 一定愛友孝伊 …」阿爸本底ti 鴻志電子作工程師，公司 beh ka 調去中國作駐廠經理，阿爸真躊躇，無想beh 離開阮，尾a 阿爸決定轉業考警察，無顧慮阿母e 反對。留ti 台灣，留ti 阮身邊，阿媽講伊 ma 無希望阿爸作警察，理由是siuN 危險，m koh 中年轉業thah 有hiah ni 簡單？
1999.09.21 拜 2
睏到半暝，匈匈天搖地動，mih-kiaN khih-khih-khok-khok ，聽著阿媽teh hoah hiu ，chiah 覺察是 1 e 大地動，我m知 beh 按怎，萬分驚惶，「是m 是世界末日？？？」。
所有e 人攏 chong 出來，無人敢 ti 厝內底，厝邊隔壁攏駛車去chhoe 空地bih ，阿爸載阮去郊區叫阮m免驚，阿媽 iau koh phi-phi-chhoah 講伊食 hiah ni 大漢 m-bat tu 著地牛翻身hia 大e 。1場地動ka 阮 kui-ke-hoe a 箍作伙，真久m bat 感覺chiah ni 親近a 。m知阿母有要緊bou ？
la-ji-ou 播講：「9月21日透早 1 點 47 分 12 秒台灣發生規模 7.3級e 大地動，中心ti 南投縣集集鎮，離地面干單 1 公里，全台灣一直有災情傳出來… 」，m 免去讀冊，無水、無電、無 ga-suh ，阿爸買電池kap 泡麵tng 來。
地牛iau teh 翻身，三不五時chun 1 e ，乎人心肝tiuh 1 e …。ng 望惡夢趕緊過去。
1999.09.23 拜 4
ti 電視看著真驚人e 畫面，台北市e「東星大樓」，1樓到 8 樓攏埋ti 塗kha ，9樓變作 1樓，台北縣「博士e 厝」1、2樓liah 坦橫倒落來，台中、員林、斗六攏傳出有10樓以上e 大樓，有ui 腰斬斷、有 kui 棟倒去、有e 歪歪chhoah-chhoah ，有夠恐怖。
Khong ku-le e 大樓偷工減料，竟然有火油桶藏ti 內底…，乎人真ge-siau 。
死亡 e 人數一直增加，已經超過 2000人，受重傷e ma 超過 4000人，災區iau koh 停水、停電、ma 無ga-suh。全民攏投入救災e khang-khoe ，救援e mih-kiaN ui 四界送入去災區，大家無分你我，有錢出錢，有力出力。真濟e慈善團體進入台中南投安慰災民，ma 有人家己組織 「khat 塗機」車隊，駛去山區救災，乎人真感心。
1999.09.24 拜 5
今仔日是中秋， 大家卻是攏無心情過節，充滿悲傷，雖bong 真濟國家攏派訓練有素e 救援人員來協助，m-koh 已經過了In 所講e 「救災e 黃金期限 72點鐘」，猶原有人埋ti 倒chhoah e 大樓內底，m 知生iah 死， kui-ke 人作伙團圓看月娘，原來ma m 是簡單e 代誌，平凡康健toh 是幸福 kam m 是？
大里e 張小弟，今仔日hong 救出來koh 活leh ，這大概是唯一乎人歡喜e 消息。
1999.09.26 禮拜日
chai 去teh beh 8 點，koh 發生大地動，阿爸叫阮緊衝出去外口，聽候地動過去，阿爸、 阿媽 、阿姊、阿兄、 kap 我 ，chiah 慢慢作伙行tng 去，有 1種真特別e 感覺，我相信阮攏深愛對方，因為阮是 1家人。
1999.09.27 拜 1
今仔日，老師 koh 調查1 遍 ，問看大家厝nih 有按怎bou ？佳在同學攏干單驚 1 tio nia ，阿卿講921 hit kai In 阿媽有1 粒山走無去，聽講雲林e 「草嶺」ma chun 1 e ，走去「梅山」。
老師ka 我講媽媽敲電話來關心，知影伊平安順si，我chiok 歡喜e 。
1999.09.29 拜 3
真濟災民失去一切，toa ti 學校 e 運動埕， 1頂 1頂e 布帆， 1 e 1e 破碎 e 家庭，乎人心稀微，阿輝伯 a 坐直升機去災區巡，直升機降落ti 埔里國中e 運動埕soah sut 著 1 欉大樹a，樹身khiat 著 5 e 人，1 e 5 歲 e 查某 gin-a 受傷真嚴重，尾a soah 無hau去，真夭壽。
1999.10.01 拜 5
美術課老師教阮作卡片，全班決定beh 送卡片乎災區e gin-a ，表達阮對 In e 關心。阿肥koh 作 1張特別大張beh 乎大家簽名，寫阮全班e 祝福，想be 到大箍 pe e 阿肥 ，心koh hiah 幼，真是烏干a te 豆油-- --無底看 。
1999.10.04 拜 1
災區e gin-a 會t…ng 去讀冊a！m koh 學校e 教室根本無夠，有e 搭布帆，有e ti 大樹kha 上課，光線無夠，天氣koh 熱，實在真苦憐。
台北市e 飛鷹隊ti 中橫青山段chhoe 著a，車- - 壓ka mih mih mauh mauh ，人攏死死去a ，唉！歡歡喜喜出門peh 山，啥人料想會去 tu 著 chit 種代誌？
1999.10.08 拜 5
地理課老師講 921大地動是菲律賓板塊推sak 台灣中部e 大茅埔雙冬斷層，結果雙冬斷層邊a e 車籠埔斷層凸高，造成chit 場世紀尾e 大災難。
中部橫貫公路，代表人比天卡 gau e 青山路段完全無去，南投e 「九九山峰」1暝之間hong pak 皮te 粗糠…，kam 是天災iah 是…？
文章定位：
