燕仔遊樂場 此遊樂場正式於2005年3月20日開幕～ 成立目的是為慶祝本人１９歲生日～ 而且有好多感想想同大家分享下～ 希望大家可以在此盡情享樂～

72愛的鼓勵 1訂閱站台

最近收到PC home要關閉相簿既功能, 提醒我地快D打包番D相,

由2005年開始係新聞台寫文章, 當時想分享下生活點滴同烘焙樂趣, 原來以前既我係屋企都整到咁多麵包蛋糕,我感受到當時既我比依家熱血得多, 無他既, 當時工作壓力真係好大,周末放假又無拖拍,咁屈係屋企度無野做咪整下野又可以PO下文, 個陣都仲未有IG, 然後好多年我又忽略左個新聞台,呢度感覺好似以前寫既日記咁,偶爾翻開睇睇好多回憶湧上心頭。

今年2020年係好艱難既一年,一個新型病毒,估唔到係全球性災難,猶記得1,2月時我地已經知道病毒係中國肆虐，當時歐美國家危機意識不足,所以病毒係全球人來人往之下,傳播得好快。個陣一張亞洲臉加一個口罩,大家都驚左你,然後又有人埋怨各地搶購口罩寄返中國,又當係發財機會吊高黎賣都有。當時既我真係無諗咁多,純粹就係五月續居留,六月結婚,點知一個疫情波打亂左好多野。

係3月17號當晩, 我地如常6點半食晚飯,7點鐘準備夜市晚餐service, 點知係7點40分左右收到通知,話巴黎當晚凌晨12點起所有餐廳酒吧暫停營業,我地完晒service即刻收拾清潔處理雪櫃物資,手忙腳亂,做到凌晨1點半,我終於搭上第一次最後一班地鐵,身心俱疲,同時又唔知餐廳要關幾耐,一個月,兩個月?好多未知數,然後全面封城,出街要寫證明,戴口罩,限1KM移動範圍,然後電視新聞報導每日內容就係covid, covid, 不斷宣傳戴口罩既重要性,又講醫院超負荷,哀悼年輕染病逝者,擔憂老人院既傳播,政府定時定候又公佈疫情數據,總統間唔中出黎演說安撫人心,呢一幕幕重覆又重覆又重覆, 聽都聽到厭。五月解封D人去渡假然後情況惡化十月又再封,咁令到聖誔前可以有限度解封,如同拯救聖誔行動。係封城又解又封又解其實法國既經濟環境係差左好多, 好多商店餐廳都面臨倒閉潮,我既餐廳都唔例外,上年又黃衫軍又地鐵罷工已經生意下滑,今年加埋疫情係支持唔住,當CHEF打俾我同我講餐廳賣盤時,我心裏壓力唔細,雖然我討厭有番工無收工既日子,但個度我經歷左太多悲歡離合,係我真正成長既地方,無想到3月一別,再會無期。其後餐廳都唔想拖,直接提出同我解約,明白既,商業決定,大家好聚好散。失去工作,我失去左生活重心,每日係屋企睇戲打機虛渡光陰,說好的工作賺錢結婚買樓生仔全部都hold住,所以係計劃趕不上變化既。本來仲諗住可以番澳門一趟點知都唔知拖到幾時, 本來家人可以過黎觀禮都無辦法,未至於遺憾, 難免有點可惜。

咁所有事情都有兩面既,停工讓我停落黎休息下,一D工作既勞損都得以修復,而且多左時間陪Alexis, 我地可以好好享受晚餐同一齊睇下電視電影, 以前番工個陣我既晚上就係睇住D客人吹水食飯,當時我既心情都好想番屋企同自己愛既人渡過, 而唔係浪費人生睇人食飯。然後我開展左第二興趣, 同人換咭, 係寵物小精靈既咭, 真係唔換唔知, 原來呢D咭係咁值錢, 商機無限, 我覺得最有趣係通過網站同人洽商bargain係幾得意又可以當練法文, 有D人好爽快,一OK就交換地址直接SEND, 有D人好阿哥,又A又B,我係好就得人但有時真係唔知點應好, 所以就會問Alexis意見或者叫佢幫手覆, 有時係唔明白對方想表達既意思, 然後係一來一回既MSG我覺得好似做緊客服,而我既最終目的係希望雙方都收到自己鍾意既咭,皆大歡喜。不過我覺得自己唔可以係咁沉淪落去,因為我希望明年可以搵到一份有興趣時間又適合既新工作, 我唔想再日日坐屋企地頹~

然後我既居留証續期對我黎講都係一個好大既挑戰，我預約左五月份既續期交件被取消左,仲要唔知幾時再約,後來六月結婚決定轉向自己所屬地區既移民局, 所有文件集齊後八月頭寄過去,等左兩個月都無聲氣,9月尾我再去問,哈, 我成份文件唔見左, 明明係簽收左但一張紙都無, 就咁消失了, 然後我當場將手頭上有既資料都交俾佢, 後來係11月頭收到電話過去補番少少文件, 12月初終於攞到個新居留証, 四年的, 係我一直努力係餐廳工作等待既,諷刺既係我攞到個証但我無左份工。

係法國既生活真係如同過山車, 心血少D都唔掂, 太多高低起伏, 還是好多謝Alexis 既支持, 同一班係澳門既好朋友聽我訴苦, 係巴黎既朋友真係一隻手數得晒, 所以我真係好掛住番澳門, 就算係澳門宅都覺得OK, 起碼可以陪下年長既父母同岩岩出世既姨甥仔。今年去左幾個小旅行, 都係法國境內,希望明年可以奔向國際。

做人總要信, 希望明年會更好, 而自己可以做得更好活得更好, 世界可以和平一點。

大概走得到這年, 再艱苦都不會怕, 年輪主題曲最喜歡的一句。