2007年8月19日 出猛太陽
較o岩時間，出發往總部當更，一心諗住o係屋企樓下對面站搭105小巴往土瓜灣天光道再步行上去或者懶行又遇到17巴士都好，點知一到劉德小學，都未過馬路就見對面站架105小巴滿座，那刻開始盤算，是否今天有甚麼特別活動搞到站頭大排長龍呢？是否要乘倒頭車去康盛總站上車呢？那時候，就剛剛有一架15號小巴停在面前，難度在面前都唔上？好…上吧！架車直往前駛無幾百米，哎吔…見倒對面馬路又有105小巴仲要有大把位，「蝕卓」，無法啦，望望手錶，反正有時間，而車費已付($3)，為了不蝕入肉、又為了一定有位坐車，點都搭上總站。
好了，幾經一輪，上到總站，見到其中有架105小巴內那個司機下車簽簿，跟住就上車帶安全帶，我估佢會開車，但車頭寫住「暫停服務」，咁我就無行埋去，點知就睇住佢開走o左，算！仲有下架的，等o左一小陣，見前面架車的司機帶安全帶，又著車打燈，唉…今次點都要走埋去碰碰至得，好了，又再一次上車，今次付$7.4，好無奈咁經過剛才走過的路，去到比我原來上車的地方再後兩個站，在梁潔華小學停車上客，依…我感覺架車的引擎或馬達之類的東西很不尋常，令到架車超震，咁司機就熄匙再著車，死火…撻唔著，司機打電話求救要求開架吉車來上客，因為全車爆滿(包括剛上車的三名超黑仔乘客，佢o地上後面一架車就走o左啦)，起初，電話中人叫司機試試這、試試那，但司機話真係唔得喎，又話今朝都行過兩轉，試過熄車著車都得，今次真係死o左無得搞喇，oh…我立即打電話俾ic通知佢「我要遲到了」，好在主管明事理無怪責，仲話「壞車都無法啦，我o地已經開定檔」(咁咪即係派定心丸俾我)。
由於壞車，架車無冷氣好焗，便落車等，一有105小巴就上了，不是吉車，但我算係行得快，有位上車，上到車心諗又係舊車，千萬不要抛錨至好。今次總算順利到達下車站。諗住睇下有無車搭啦…無巴士、小巴又係爆，點都要行啦…終於上到去，遲了十分鐘，算係咁啦！
當總部更(新界東長官訓練工作坊)…有時真係幾游閒，閒到好唔習慣，係咁搵o野做，好不容易渡過這八小時。
插曲︰o係四樓長官會所遇到提議我加入敝隊的小丸，佢話我d頭髮超長、唔認得我哩…自新界東日後，都好耐無見佢了，今天又可以見一見佢，感覺幾好、唔錯。
落更，行落天光道再上105小巴返屋企，落車時，聽到司機同個乘客講係哩度落車喇…你去問下人啦…咁我就冷醒咁諗將軍澳有幾大吖？！我應該會幫倒佢的，咪主動問下個太太︰「你其實想去邊呀？」佢話︰「去靈實醫院」，O咀添！我問︰「你諗住行去？」，答︰「唔係…坐小巴。」我一樣想O咀，雖然我有印象的確有哩架小巴，但就真係不肯定在那裏上車，我話︰「你在這裏等啦！應該有的。」我自己就走了，行了幾步，我就是不放心，我一邊打電話俾街坊隊友問問，一邊照實同那太太講︰「其實我都唔肯定的。」點知同敏茵傾傾下，見倒對面馬路…o下！又係對面馬路見倒架107小巴寫住去靈實醫院的，咁我情急之下掛了敏茵線，又同那太太講︰「就係那架小巴喇！你快d走埋去睇下司機好唔好人俾唔俾你o係o個度上車啦！」「那邊過馬路呀！」因為架小巴剛剛就停在燈位前等綠燈，而人像燈差不多轉綠色，時間o岩o岩好，太太道謝後就朝著那架小巴快步行去了，我就睇住佢上o左車，我便放心離去。又一個「算係咁啦！」
依…到我覺得有d唔妥，我記起，我頭先好似無「拜拜」就收o左敏茵線，咁當然要打返俾佢同佢講番件事啦。
※ 今天是我「當黑」還是我「冷醒」呢？兩樣都有？傻瓜…搞o黎搞去十幾蚊可以過海喇！
文章定位：
人氣(122) | 回應(1)| 推薦 (
0)| 收藏 (
0)|
轉寄
全站分類:
不分類
