2007年8月21日(二) 有晴有雨又有陰
多謝Ryan，今晚終於食o左你請的生日晚飯—壽司亭，好味。
今年的生日開始似樣，點解咁講？因為今年大家都特別有心，實在令我太感動。睇過我的鳴謝，就知道今年有很多人記得我的生日，由於我的生日是在暑假，讀書的時侯，朋友/同學間通常都無乜搞作，可以話係無人為意到，暑期嘛，放緊假囉！現在，同事間都無乜搞作，原因…在幼稚園工作的我，又係暑假囉，同樣又是無人為意，多數的公司生日會都係我作搞手的，如果連自己的生日都要自己包辦埋，似乎有點不自然，算吧。至於朋友，一直都有d極少見但仍然記得同我祝賀的人，無論是口頭/短訊/電郵等，唔知點解，今年居然無晒聲氣，係一個都無，確實令我覺得有點奇怪，心想是否他們出了甚麼情況？
講返今晚餐晚飯，Ryan是我讀Higher Diploma 的舊同學，初初約的時候很興奮的，耐無見嘛！但差不多到約定的時間，開始唔係好想食哩餐飯，主要係怕如果大家無o野講、dead air 點算好哩…結果，和我所想的剛好相反，大家係爭住講o野喎，唔錯唔錯。Ryan真係一個好上進的同學，以前同佢坐隔離位時，佢已經成日鞭策我，軟更兼施咁，現在，佢又好積極咁進修，真係8足咁多爪，又做programmer，又搞公司，但正職係做finance的，原來佢又係在銅鑼灣返工的，又係好近我的—利園，厲害。我最佩服佢o既係由讀書到工作，每天都睡眠不足，到現在也是，不過唔夠睡始終係無益的，保重身體要緊。一路食飯，一路講下大家的情況、IVE畢業後的情況、舊同學的情況…好精彩，又提到佢以前同依家的女朋友，又講到生老病死，仲有講保險添，所以星期五又見一見佢喇。
呀…佢又問我行唔行山的，我話都會行下架，我話如果時間、地點夾的話預我吖，人多熱鬧嘛！大家無有興趣先？預埋你o地好無？
另外，佢話好慶幸我仲有save佢的電話，依…原來哩個世界，不單止我一人有這樣的想法，我成日都掛住我d朋友，又希望有人在乎我的，而事實上，真係有人會在乎有無人在意自己的，正如我在乎別人有無我心一樣，我要對各位有信心，我知道真係有人在我身邊默默地支持我、關心我的，例如有朋友會話︰我有睇你個新聞台o架、我點點點你d乜東東o架…心足了。
仲有另一樣，佢又話，依…你似乎做哩份工做得幾開心喎！我好爽快答︰係！「丁」…醒o左，做乜我成日都諗住要走哩？其實我做哩份工做得幾好吖、又開心，做乜要跟風見市道好想轉一轉呢？
p.s.我食飯之前同神講，希望食哩餐飯的氣氛舒服自然啦，原來同神禱告真係有效o架，婷婷、各位有機會都試下啦！
文章定位：
人氣(43) | 回應(1)| 推薦 (
0)| 收藏 (
0)|
轉寄
全站分類:
不分類
