心情由我收到戰鬥隊形開始，
大落…落…落…簡直是極落！
又是甲甲資料庫，
都說，位置並不是問題，
問題在於…又是那隻…
黑著口面，抱歉了…各戰友們！
吃飯時，依然板著臉！
真奇怪！
那人為何耳朵那麼靈敏？
真是嚇我一跳！
明明只是我跟李洛的對話…
都聽進耳中…厲害厲害…
下午自己一個站西宮六樓，
真開心！起碼不用對著…
在洗手間臭臭的時候，
想起要傳短訊給一個人…
就是要提bebe登記拿身份証。
估不到傳了不足兩秒，
收到電話。
我說轉頭再打給他。
四時，到破裂時間，
回依二途中打給他，
巧遇gillian及kelvin。
跟他們打個招呼後，
繼續和bebe對話…
在車廂中，gillian手多多，
她輕輕的扯一扯我的衭子，
我不其然對她說：「我肥左好多呀…」
她還沒給反應，電話中的傻人即說：
「真咖？咁咪好囉！」我感到他很興奮。
我大叫：「你傻0既…一0的都唔好…
我密謀緊減肥…」
他說：「減咩肥0者？女仔係肥肥地先可愛嘛…
唔好減啦…知道你肥左…你聽唔出我係好開心0既咩？」
「痴線！唔同你講…轉頭打俾你」我說。
破裂時候，又談了一會。
「你又知我未換身份証0既？」他問。
「你連我都唔記得…我估你會連身份証都唔記得…」我答。
「都唔係唔記得0既…係懶0者…」
「唔好咁懶啦…換啦…」
「一係今晚換…呀…都係唔好…今日個樣殘…」
「你好似日日個樣都殘0家喎…」
「點解你會有咁0既諗法呢？」
「因為我次次打俾你又或者見你…你都係殘…」
「咪講衰野啦！換証咁煩…都係唔換喇！」
「我依家叫你去換呀…咁你換唔換丫？」
「哦…」
破裂完畢，再收電話，又談了一會。
「你係唔係做緊野0家？」他問。
「唔…係0家…都有0的客0既…
不過可以唔理住…」我答。
「我都係客…」他無理由的說。
「哦…咁呀…(聲線提高八度)…先生…
有乜野可以幫到你？」不明白為甚麼我會回應他。
「唔…我覺得悶…你陪我傾下計啦…」
哈哈哈哈…他很怪！
又說到那個話題…
「你開心啦…如你所願啦…
我真係肥左好多喇…都唔知點算…」我呻。
「咁咪好囉…無問題呀…
我聽到都不知幾興奮…」他語氣真的很輕快。
「一0的都唔開心…要勁勁勁減…」
「唔駛減啦…我鍾意0的肥肥地0既女仔…」
「我一直都唔覺你鍾意我喎！」我勞氣的答。
嘻…保持著笑盈盈的面孔。
到巴士站的沿途中，看見未接來電，
呵！又是bebe。
「你搵我？」我覆他電話。
「你點知我搵你0家...？」他問。
「……咪玩啦…你又留言俾我…
加上…有來電顯示0家嘛…」我說。
「乜依家0的電話咁先進0家咩？」他這樣說。
「………你係唔係當我傻0家…？」我問。
「唔係…哈哈哈…你叻…」他笑說。
真是…沒好氣了！
有時，他說的話很「撩交打」。
「你搵我做咩呀？」我問。
「無呀…諗住話你知我放工…
咪打俾你同你傾幾句…」他答。
「咁早放工？」
「係呀…見有0的頭痛咋…
如果唔係我仲做緊野呀…」
「頭痛？有冇食藥呀？」
「你知我唔會食0家…」
「um…0個時我頭痛…
你提供左好多method我試0家…
依家試下啦…」我建議。
「我一向都係話俾人知…
自己又唔會做0家啦…」他答。
「下？咁我0個時頭痛你咁緊張？
你緊張我多過緊張自己呀？」我驚訝地問。
「梗係啦…我條命有乜所謂0者…」他答。
「唔好呀bebe~~~~你唔好死呀…」我叫。
「傻…頭痛下都會死？」
「係0家係0家…我條命都唔值錢0家…」
「痴線！你唔可以有事…」
「哈哈哈…好核突呀你咁講！」我說。
有時，我會受不了他的…說話。
「其實你上左車未0家？」他問。
「上左好耐啦…」我答。
「抖先你又話你換緊衫，依家0係車…？
哦…明白喇…你0係架車度換衫！」
「痴線！點會0係架車度換衫呀？」
「哈哈哈哈…」
「你係唔係當我傻0家？」
「哈……」
「我咁肥…都唔夠膽啦…」
「肥？怕乜0者…都話咁先可愛…」
「嗚嗚…唔得0家bebe…再肥無人要…」
「傻0既…邊個話0家？知唔知男仔睇女仔…
睇邊三樣野丫…」
「我點知呀…」
「第一…睇外觀…」
「咁死啦…我咁醜樣…」
「唏…邊個話？第二…睇可愛…」
「我一0的都唔覺自己可愛喎…」
「第三….睇………嗯…」
「講唔出呀？咁不如我話你知…
你睇女仔睇邊三樣野丫！」
「下？我會睇邊三樣野呀…？」
「就係…身材身材…同埋…身材…」
「無可能！點解你會咁諗…」
「你唔係咩？」
「點解你會對我有咁0既誤解？」
「唔係誤解…係事實…」
「唔係事實…」
「唔好講大話啦…係有人話我知0家…」
「哦…呢個係我特登造出黎0既弱點…
事實並唔係咁…」
「下？乜野呀…？」
「…每個人都要偽造一0的弱點出黎…
呢個就係我其中一個…」
「咁…你有冇真正0既弱點呢？」
「um…基本上無…」他說。
嘻…其實他有一個弱點。
「bebeebebbebebbe….」我長叫。
「係！乜事！」他答。
「你有冇匯豐銀行0既 acc？」
「um…無喎…得恆生…」
「咁匯豐可唔可以過數去恆生0家…？」我問。
「可以…」
「咁你俾你個 acc no 我丫…」
「下？點解呀？」
「我想每個月過返0的錢俾你…」
「咩呀…你講咩呀…」
「你明0家…少少都好啦…我想俾返0的錢…」
「唔好再講喇…傻豬…」
「唔係哩………」
「哎吔吔…真係唔好再講…一講個頭就痛…」
「嘻…唔好扯開話題…我唔會可憐你…」
「咭…唔係哩…我按左個太陽穴好耐…
都仲係痛…」
「傻be…咁無用0家…」
「咁點算？」
「……用鏍絲批啦…」
「下？有咩用？」
「一野插入個太陽穴度…哈哈哈…」
「um…唔怪得你問我攞銀行戶口啦…
原來係想做帛金俾我…」他說。
「傻豬黎0既…哈哈哈…
新年流流…唔好講0的咁唔吉利0既野…哈哈…」
「咁你又叫我做0的咁0既野…？」他無奈地說。
「bebe…原來我地識左一年喇已經…」
「只唔只呀？」
「啊…你0係呢一年裏面…應承左好多野
到依家都做唔到呀…食蛋糕啦…睇vcd啦…
四眼雞丁啦…去澳門啦…仲有好多好多…」
「咁我都做到七成啦…」他說。
「唔夠0家…你依家係債仔…我要追數呀…
快0的俾埋0個三成我…」我說。
還有許多許多…
大家都忙了…時間少了…
他時間少了，變得沒心情找我；
我時間少了，變得沒暇找悔氣。
我會惱他不找我，但…
我相信他沒遺下我。
有時，會覺得他在我身邊保護我、
守護我。他亦是很重要的補充劑，
我累透了、精神體能過份流失了，
他都能及時出現，替我充一充電。
這種無微不至的關懷、
呵護、及寵愛…
不用多，只要來得合時便可。
文章定位：
