夏洛特‧李 (下落不明…就是因為妳) 旅遊‧人生 用自己的方式努力的過每一天 時間不等人, 要回頭已是百年身

0愛的鼓勵 0訂閱站台

朋友︰你去澳洲，去幾耐？去做世紀筍工呀？(註︰澳洲昆士蘭旅遊部今年 1月攪出來的宣傳技倆，以聘請大堡礁管理員一職，半年酬勞高達 15萬澳元（約 86萬港元），放上了 YouTube及 Facebook 後，吸引了全世界的關注，全球各地傳媒大事報道，本來需要花費約接近  2 千萬港元的旅遊廣告，竟收到 12.85億港元的宣傳之效。)

回答︰我都想做個份工呀，不過唔係好識游水，所以無申請到。我申請左working holiday visa，有效期一年。如果搵到工，維持到生活，就會堅持到底，一年之後先返黎。

朋友︰你搵左工未？

回答︰未有，要去到先搵。不過有上網睇吓行情。

朋友︰咁你去到做咩呀？會唔會搵唔到野做？

回答︰搵唔到，又無哂錢就會返黎。可能快到一個月後，你又會係香港見返我。無得我諗做咩唔做咩，全世界經濟都唔好，有人請已經好好。我又唔什麼職場能手、身經百戰，寫份CV時先發現自己的工作經驗好有限，什麼體力勞動的工作真的不多，去到唔知人家會唔會請。不過我希望搵些工作不是香港可以經常接觸到的，好似農場、牧場的工作。

朋友︰會住係邊？你同邊個一齊去？

回答︰我自己一個人去，嗰邊亦無親屬朋友。暫時住 Hostel先，搵到工先再找地方住。

朋友︰你好勇喎，畀我就唔敢一個人去。

回答︰我就覺得自己太過被照顧，唔識得自力更生，好似洗衫、煮飯都唔識，太過依賴屋企人，咁多年都好似無長大過咁。

朋友︰好羨慕，可以去玩一年，又可體驗外國生活。我諗我就唔得啦！

回答︰「馬死落地行」，未試過的話唔可以講一定唔得。雖然我都唔知自己可以做到幾多，不過人一世物一世，有機會放係面前咪去嘗試吓囉。

朋友︰咁又係，試吓都好。你要畀心機，堅持行自己選擇的路，我地有家庭負責，唔可以話行就行。

回答︰好幸運，屋企人都唔係好反對，雖然有囉唆一陣子，不過係擔心、關心的囉唆。每個人都有自己的選擇，有人認為用自己的愛去關心他人、照顧他人是重要的，所以選擇做護士、救護員；有人認為金錢最重要，所以用盡一生時間一切方法去搵錢，例如做生意、擠身於商界高層；有人認為環境保護最重要，所以日日落田耕種、生活上努力節省能原、物盡其用，過其綠色生活。不同人的不同選擇，身邊人的反應都可能分野得很大，過程及結果是好是壞，相信只有當事人才最清楚。當然，朋友家人的關心、提醒也是十分緊要。我選擇這樣的生活，當中也有掙扎，不過最後找了個平衡點，才可以落實決定。

朋友︰你要努力玩樂，做埋及玩埋我地嗰份，等我地都分享到你遊樂時的興奮。仲要努力找個好男人，搵個好歸宿。

回答︰朋友們都總係關心我這方面的事。好啦，我會畀心機啦！如果收到我找電話返黎，又或者電郵、Blog上寫住好掛住香港，好想返黎，你地一定要叫住我，留個言畀我叫我堅持到底呀！