３１號啦！２００２年最後一日啦！
今日我將會平平淡淡咁過．．．
諗番起呢一年都發生左唔少事．．．
最印象深刻既係我炒單車入醫院，訓左三日兩夜！！呢三日兩夜，應該係加埋之後既一個星期都係訓。呢個幾星期我唔知自己做咩，呆下呆下，真係好恐怖。頭骨裂左其實真係好辛苦、好痛苦架，頭痛、嘔、手軟腳軟、無力，行步路都要人扶，真係成個廢人咁．．．好慘好慘．．．真係難為我媽咪同老豆！！
呢次意外雖然我難為左身邊好多人，自己都換黎左個幾星期既痛苦，但係我得到好多．．．我雖然入醫院既時候係暈下暈下，但間中幾秒幾秒咁打開眼我都睇到好多野！
邊幾個真係真心急住送我入醫院、邊個擔心我擔心到喊、邊個之後即刻趕黎醫院睇我、邊個之後上黎我屋企探我、邊個打黎問候我．．．我全部都記得好清楚好清楚！
呢次意外令我睇到好多令我感動既野，亦俾我睇到好多我本來睇唔到而我最好唔好睇到而又俾我睇到既野！
雖然我而家仲係局部地區性失憶，記唔番ｏ個次意外，但係邊個真正待我好，我記住，唔會忘記．．．邊個待我差，我記住，亦都唔會忘記．．．我咩都會記得，因為我係一個記恩亦都記仇既人黎架，不過唔會報仇咁解之ｏ麻！！
不過真係好多謝你地！仲有好對唔住你地喇！要你地咁擔心，仲要俾我鬧，邊個俾我鬧過都對唔住喇！仲有ｏ個ｄ俾我鬧過“ｓｈｕｔ ｕｐ”同“你好煩”既警察叔叔們，同埋唔知有冇俾我鬧過既醫生同姑娘，都好對唔住佢地囉！不過，諗諗下，估唔到自己真係咁夠膽死，竟然鬧警察，仲要用英文撻佢，真係估唔到，係咪自己既潛意識一直好想用英文鬧人好耐呢，哈～
呢一年都有兩個好錫我既人離開左，婆婆ｏ係五月，阿公ｏ係十月，五個月呀，唉！只係五個月咋！兩個至親相繼離開，個心真係非常唔好受架！不過就真係難為我媽咪．．．唉！媽咪個心仲痛囉！就算我點傷心，點難過都唔夠佢，佢就真係好難過！！唉！始終係自己爸爸媽媽ｏ麻！
都唔知係咪邪開有條路．．．由上年表哥離開，到阿媽、阿女麻、細佬、我入醫院，到阿公、婆婆離開．．．呢兩年真係多事之秋！以前我地屋企同醫院根本唔會有任何關係，但呢兩年就頻頻同醫院、葬禮扯上關係．．．唉！
我真係唔想再咁樣囉！！真係夠囉！！唔好再ｏ係我身邊帶走任何一個人．．．
崩潰，我試過一次．．．一次咩都夠．．．我唔想再有機會試第二次
文章定位：
