好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

真濟年毋捌去百貨公司買物件，這日若草地人入去大觀園，一樓一樓沓沓仔看，做一點仔「市場調查」，也看這陣的人穿插啥款？無出去行行咧，對現此時台北人的流行完全無概念。

物件選好，付錢的時，店員問我是毋是會員？毋是。有Happy Go無？無。好佳哉我用信用卡，毋是用綴袂著時代、上蓋倯（土裡土氣）的銀票。（這是啥心理？）欲攄卡的時，店員閣考我一个問題：「你有載具無？」「載具」？信用卡是毋是就是我的錢的載具？雖然掛喙罨，伊一定嘛看會出我戇戇的表情。

伊共我解說，載具是佇雲端集中用來囥（khǹg，放）發票的工具；囥佇遐，統一發票除了會當對公家的獎，發卡的銀行閣會對一擺。巴拉巴拉…….，講一大堆。

佇超市，人會問欲印紙本發票無？我看心情，有時會講欲。兩個月對一遍發票，也是草地人無聊生活內底小小的趣味。我猶痟想有一工對獎的時，會歡喜甲大聲喝咻呢。而且，有一遍收著電子批講我有一張電費的發票中一千箍；隔真久無消息，我轉去揣彼張批，竟然無去矣！揣寄金簿，也無入這筆錢。

所以，看會著、摸會著的紙本發票可能較實在。

我佇群組內底講買物件予人問載具的過程，講：「去一逝（趟）百貨公司，就知影家己有偌落伍。」

有人講伊去餐廳食麵，愛線頂點餐，伊問服務生會當替伊點無？「伊面色無好，我隨出去。」

有人講伊攏和銀行行員和提物件的做伙出門。行員是in翁，負責攄卡和提供Happy Go；提物件、兼提供手機頂頭載具條碼的是查某囝。

所以講起來，阮欲家己出門可能會愈來愈困難。

不過，兩个較少年的就無這種問題，in慣勢佇網路買物件，慣勢利用Uber Eats；也有設定雲端載具。這个時陣，就看會出世代的差別矣。一个閣講伊真gâu（擅）點餐，「選我，選我！」選伊去點餐？伊天文的智識足豐富；所以我講伊「上知天文，下會曉注文」。

雖然落伍，我猶是無拍算去下載「雲端載具」，只是心內想：「雲端的載具敢毋是熱氣球抑是飛行傘較合意思？」朋友講我應當去寫兒童故事。 

《自由時報》副刋2023/6/15