好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 11訂閱站台

《啥人是購物頻道？》                                    

電視影集內底一个先生消遣伊愛買物件的牽手，「伊和我無仝頻道；伊是購物頻道，我是新聞頻道。」

一般講起來，查某人較愛踅百貨公司買衫買鞋；毋過日常用品和食品的採購，查埔人若出手，凡勢比查某人閣較無撙節，甚至到予𪜶某強欲掠狂的地步。

薩依德《鄉關何處》彼本冊，有一个場面予我印象真深，伊講𪜶一家伙仔逐年熱天去黎巴嫩一个山城度假的時，老爸會坐佇店内，手裡捀一杯土耳其咖啡，涼勢仔涼勢，目睭瞭 咧瞭 咧，叫兩粒西瓜、五罐果子醬、一公斤無花果、三磅『奶酪』。……紲落到隔壁間，叫一大堆厝內無人會用著的浴間仔用品；然後去肉店、咖啡店、藥房。……

薩依德的老母看著隨个仔隨个送貨來的人，無奈和懊惱的喝咻愈來愈大聲。最後，老爸轉來食晝矣，老母噼哩啪啦共伊罵甲臭頭，老爸無歡喜，兩个人就大細聲冤起來。第二工，親像日頭會閣出來遐爾仔自然，薩依德的老爸閣搬一遍採購的劇情。

我一寡查某朋友𪜶翁嘛有這款情形，好佳哉規模較細。

有一改，我到阿燕姊𪜶兜附近的冊店買冊，敲電話共伊講欲去提伊欲予我的一本冊。本來是想講，才十點外，伊提冊落來，兩个人開講一時仔，就講再會。啥人知影伊聽著我的聲，竟然足歡喜，講：「趕緊來，趕緊來，阮頭家早起買一尾烏魚，來鬥食！」

𪜶翁嘛真熱情，講伊買真濟菜，伊煮食的技術嘛袂䆀。

正經無膨風，烏魚已經落鼎炒蒜仔，真芳。阿燕姊講趁這个機會𤆬我去附近的菜市仔買魚。這个菜市仔的魚真正像伊講的，足鮮，又閣俗；毋但魚肉類誠濟，青菜、果子、煮熟的食物，攏予我看甲目睭大大蕊；莫怪𪜶翁共踅菜市仔當做退休了後逐工的活動。

聽阿燕姊嫌𪜶翁愛買菜，我講伊愛買菜是你的福氣，伊講無毋著啦，只是冰箱內底的物件永遠煮袂完，食袂了；倒掉閣真無應該，會予雷公摃。「實在是，唉！」伊是傳統賢慧體貼的牽手，除了佮𪜶翁的政治理念無仝款、討論的時頷仔頸筋會浮起來以外，其他一概體諒包容。

菜市仔踅煞，買兩尾烏魚轉去，𪜶翁已經煮好規桌頂的菜，包括厚工的「糋卵」。我真捀場，食袂少，呵咾逐項菜攏好食。𪜶翁一下歡喜，叫我紮兩包伊家己包的、凍好的水餃轉去。我講有食閣有掠，哪會使！阿燕姊佇邊仔姑情拜託，親像咧叫我做善事。趁𪜶翁行出灶跤的時，伊細聲講冰箱窒甲袂喘氣矣啦，那講那拍開冰箱，「Tong！」一粒高麗菜跋落來。

我的厝邊阿咩的頭家嘛愛踅菜市仔；歇睏日騎鐵馬去踅，運動兼買菜。有當時仔駛車看著路邊的發財仔車咧賣青菜、果子，嘛會停落來買一大堆。

阿咩講：「家己愛食的，啥物著時的，啥物俗的，啥物半買半相送的，伊就大出手共買。既然買矣，無拍拚煮，看著鑿目；只是，仝款的菜紲咧食，敢有可能好食？有的菜袂赴煮就爛去矣。」

好空的是，做厝邊的阮不時會當「鬥食」。

毋過，講著對翁婿買物件的受氣指數，阿茵排頭名。有一遍阮四、五个朋友去𪜶郊區的厝耍的時，伊共阮講，買這間厝的時就嚴重警告𪜶翁絕對不准買物件過來；舊厝已經予伊囤足濟有的無的，有的物件擲出去，伊猶閣會去抾轉來。

「毋過，恁看，」阿茵比灶台頂一排「萬年豆油」，「我罕得佇遮煮飯，伊竟然毋驚麻煩，一逝一逝提豆油過來，我一萬年嘛用袂完。」

紲落去，伊拍開衫櫥仔門，予阮看一緟一緟的衛生紙，「日常用品佇社區的便利商店攏買會著；準做有較貴，横直阮用的嘛有限，伊竟然連衛生紙都對台北買來，敢若咧囤戰略物資。」

伊受氣嘛毋是笑也毋是，「後來我不准伊閣囥佇衫櫥内底，伊煞佇面頂彼个空縫，閣楔幾若包。」有影，衛生紙對衫櫥仔頂疊到天篷；阮笑甲『花枝亂顫』，想袂到一个查埔人哪會遮爾重視衛生紙佮豆油。

一陣人準備欲離開、咧穿鞋的時，門開矣，一个查埔人雙手捾五袋衛生紙徛佇門跤口！阮笑出來，我細聲講每一个人拄好會當分一袋（五盒）轉去。阿茵𪜶翁捎無阮是咧笑啥，嘛綴咧戇戇仔笑；親像是臨時予人掠來插花仔的演員，因為毋知影進前的劇情，顛倒演甲足自然。