好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

 水彩畫佇仁愛路一間書局展覽，我敲電話去問in確實的地點。

接電話的是一个聽起來三十外歲的小姐。伊真親切，問我對（uì，從）佗位去？共我講坐佗一路公車會當佇某一站落車，行五分鐘就到。「真好揣（tshuē，找），阮隔壁是『長頸鹿美語』。」

過兩秒鐘，伊講：「毋過，in搬走矣。」

啊？麒麟鹿走去矣。

看過一齣韓國電影，劉亞仁演的《燃燒烈愛》，其中一段我上有印象：女主角表演無聲的啞口劇。伊一步一步示範：剝柑仔皮；剝一瓣起來；囥（khǹg，放）入喙內款款仔哺；共柑仔子呸佇手底。

伊的動作優雅，完全像真正咧食柑仔。

伊共男主角講：「毋免想講遮（tsia，這兒）有柑仔，愛袂記得遮無柑仔。啞口劇的重點毋是拍拚假影（假裝）啥物件存在，是愛袂記得伊無存在。」

彼遍，我真緊就揣著彼間冊店，可能也是因為袂記得『長頸鹿美語』無存在。

2022.1.23《自由時報》副刋