好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

按南部轉來台北的半途，阮佇一个休息站食中晝。人真濟，新冠肺炎時期，逐家攏有照規定掛喙罨（tshuì-am，口罩）；不過，我是第一遍看著食飯桌仔用壓克力板隔界。

揣（tshuē，找）著一塊四人桌，坐好勢，看著面前壓克力頂頭寫：

餐桌勿語This table is a non-speaking zone.

閣有一個禁止標誌。

為著防止病毒四界湠（thuànn，蔓延），隔板和標語是必要的；我講笑，共坐對面的後生講：「透明板挖一个空，咱就會當好好仔講話矣。」意思是探監面會。

那（邊）食飯那看面頭前的標語，感覺怪怪。英文翻了淡薄仔囉嗦，猶無要緊；華語『勿語』，予我想著『物語』，物語是故事，按呢才講會通。講話的是人，無理由叫食飯桌仔莫講話。

真濟年前，一位前輩作家無注意，寫『牧童騎在牛背上，邊走邊吃草』，予人掠包，講食草的到底是牛抑是看牛的人？

職業病的關係，猶咧上班的時，逐遍坐公車經過仁愛路，看著一个「裝璜公司」的看板，就感覺鑿目（刺眼），心內想，「遮爾（tsiah-nī，這麼）好的地點，遮爾大間的店面，真可惜。」後來無法度忍受，就撥工對電話簿查公司的地址，寫批去共in（他們）講應當是「裝潢」才對。準做無相信我這个家婆的人，嘛會當去問別人抑是去查字典。

毋過，過真久，看板猶是無改。「裝璜」已經是普遍的用語，可能in相信『約定俗成』有伊的道理；嘛有可能in認為「璜」是貴氣的玉石，對財運較有幫助。橫直看板是in的，空氣在人激，家規隨人設。

這陣，我無遐爾（hiah-nī，那麼）雜插（好管閒事），袂去做這種代誌；看著公車、捷運頂寫毋著的字，隨在伊去。閣再講，火星文一四界，敢若變做一種「趣味的」流行，根本無氣力去加講話啊。

2021.5.16《聯合報》副刋