好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

  

幾日前，報紙有刋一條新聞，講英國的學生袂曉看傳統老式的時鐘；所以，學校共考試大廳的老時鐘提落來，換掛數位時鐘。

毋知台灣的學校一般掛啥款時鐘？

 

時鐘是每一个家庭的必需品，逐家至少會佇厝內掛一个。

拄仔學會曉看數字的時，爸爸就教我看時鐘；短針是表示幾點鐘，長針是表示幾分；十二點和六點半的時，長短針會疊做伙，……。等我做媽媽的時，我嘛按呢教囡仔；數字和時間的關係彼陣就佇囡仔的心內連起來矣。

我的後頭厝（娘家）是佇一个真安靜的所在，日本式的木造平階，一半擺睏無落眠，聽家己厝內的時鐘一點鐘一點鐘摃，連隔壁時鐘的聲也聽會著。三四个鐘的時間有精差，客廳的摃煞（suah，結束），換食飯間的；然後換隔壁的。鐘仔聲無仝款，有的較響亮，有的較濁；有的較幼，有的較沉。聽in一句來一句去，閣一直「tī-tá，tī-tá」，敢若咧問「你是佇佗位（在哪裡）」，我就烏白編故事，愛情小說抑是偵探故事，隨在我。

這陣的電子鐘，無聲無說，無個性，無法度提in來編故事矣。我閣想起以前逐家普遍無掛手錶；佇學校，聽工友摃鐘仔上下課；佇學校外面，欲知影時間，會去看店頭的鐘。開店的攏真體貼，吊佇壁的鐘一定向外面，方便人探頭看。

結婚了後，我厝內也一定會掛時鐘；無管起頭機械的抑是這陣電子的，攏有時針、分針和秒針。雖然目睭花花，有當時仔長短針看袂啥清楚。

二十外年前，嘛掛過一間敢若鳥仔厝的機械時鐘，整點時間到，鳥仔就探頭出來唱「咕咕」，幾點就唱幾聲。這款鐘有兩个「墜仔」，墜到下面的時，著愛共伊「升」起來。這是咧捘(tsūn)發條；發條冗（鬆）去，鳥仔聲就無lám無ne，有氣無力，聽著足好笑。彼陣有交陪一个好額的朋友，伊的厝大間，連音樂鐘鳥仔厝也足媠，鳥仔唱的歌足好聽；予我印象上深的是，伊竟然誠氣伊的翁婿「m̄ bat（不曾）出一个手共時鐘的墜仔搝（giú，拉）起來。」我笑起來，「這是啥大代誌？」伊氣我無同理心，講，「翁某之間的冤家攏是uì（從）小代誌來啊。」

世界上有幾若个出名的音樂鐘，每一點鐘，會有柴尫仔行出來。我看過的上大、上古的是布拉格廣場的天文鐘，伊有六百年的歷史；每一點鐘欲到的時，觀光客就行倚去，等鐘仔聲，看耶穌十二使徒柴尫仔佇窗仔邊慢慢仔行。舊年去日本四國旅行，道後溫泉一个鐘無偌大，阮姊妹仔嘛是和一陣人圍佇遐（hiah，那兒）等鐘仔聲，頷頸伸長長看uì柴亭仔行出來的尫仔。

可見有特色的傳統時鐘逐家攏愛看。假使遐徛（khiā，站）的是數位鐘，啥人欲看？閣免講拍拚翕相。

時代改變，電子產品無所不在，tsit-má的少年人準做有掛手錶，嘛是數位的，幾點幾分，瞭（瞄）一下就知；大部份的人根本無手錶，欲看時間，一定是看手機仔。

毋過，我猶是無愛綴（tuè，跟）時行，厝內的時鐘、亂鐘仔和掛佇手的錶仔攏是有長短針的。In比數位鐘較有表情、較溫柔。你看囡仔畫時鐘，若無圍一輪的數字、無長短針，敢有好看？

。2018.11月號《文訊》雜誌。