好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

 

阮三姊妹仔鬥陣開講，大姊講伊的孫仔共三層樓的紗窗、窗仔門洗甲清氣溜溜，「家己一个人恬恬仔做，足乖！」

阮兩个姨婆也呵咾伊，「哇，確實有夠乖！」

阮小弟有意見，「講勤快、骨力，抑是體貼，才對：乖，敢若咧講乖乖仔坐咧、袂愛哭、袂烏白吵的細漢囡仔；伊是二十外歲的人矣。」

敢按呢？逐家攏嘛用「乖」來形容好品行的囡仔，序大人尤其慣勢用這个辭啊。

過一時仔，我摸外甥仔四歲查某囝幼麵麵的面，講，「你足古錐呢！」

  外甥也有意見，講呵咾囡仔媠、古錐無適當；外表是爸母予伊的，毋是靠家己的努力；上好是就事論事，呵咾囡仔做好啥物代誌。

  我講笑，「所以，我愛共伊講，你生做真古錐；毋過，這是你的爸母生予你的。」

  外甥笑咍咍，「著。」

  食飯的時，我對彼个四歲囡仔講，「你食飯誠專心，足乖呢。」

外甥講，「按呢呵咾就著矣。」

阮姊妹仔使一个目色，「今仔日，咱親像來上講話課。」

而且，是年紀大的予少年的教。

不過，少年的講法也無毋著。媠bái（醜）主要是天生，予囡仔自細漢就感覺家己比別人較媠，可能會驕傲，也可能對別人有分別心。仝款，囡仔有一屑仔表現就拍拚講伊巧、聰明；可能會予in （他們）傷過自信，掠做做啥攏真簡單，日後，若拄（tú，遇）著一點仔失敗，就會懷疑家己的智慧，甚至怨怪大人烏白講。

2019.12《文訊》雜誌