好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 11訂閱站台

     寫五六十年的華文，哪會「轉型」去寫台語文？

朋友按呢問，我就講機緣啦。

四五年前，我的後生盈成佇（tī，在）公共電視的網站開一个《世界台》專欄，每禮拜共一條重要的世界新聞編輯、寫做台語文；有文字閣有錄音，讀者會當那聽那讀。

我認真聽/ 讀一年，對台語文較有認識；這个期間也讀著一寡仔台語前輩寫的冊，才想講我也來寫看覓。

語言存在佇日常生活當中，我寫的就是我接觸著的大細事：網路、保險、面冊、運動、學畫圖寫字；種花、看山暗光佇公園揣（tshuē，找）食；照顧老人的外勞、愛買物件的查埔人、做yoga的狗；閣有醬菜甕仔、狗蟻碟仔、員林舊街仔的米絞、棉被店、拍鐵仔店，厝邊的廟，遮的（這些）做囡仔時的記憶。其中，有自然界現象、語言、生活哲學、我的旅行經驗、「古物」感情， 也有地方的民俗文化。

台語是我的母語，平常時講台語無問題；毋過，欲寫做文章，就真無簡單。世界上有真濟母語講著真紲拍（suà-phah，流利）的青盲牛；我雖然毋是青盲牛，也是愛那寫那學。好佳哉，網路頂有教育部的閩南語辭典，會當查，會當綴（tuè，跟）咧學。

而且，後生就是我上方便的台語顧問。袂曉的，問伊，和伊做伙研究、參詳。佇這个過程當中，一寡覕（ bih，藏）佇我頭殼內、序大（長輩）抑是厝邊隔壁講過的話會忽然間跳出來，予我發覺著「母語」的神奇，愈寫愈心適。

參與我的台語文書寫的，猶有好朋友廖玉蕙。十外年來，阮慣勢共寫好的文章寄予對方欣賞，兼「掠漏」；台語文的漏比華文的加真歹掠，除了斟酌看文章的內容、文意，伊也著逐字念出來，看有順無？是毋是正港的台語？然後，兩人才佇電話中討論。

阮希望寫出來的物件，毋是kan-na（只）台語人會當讀，bat（認識）無偌濟台語的人也至少知影我是咧寫啥。所以，較困難的字辭後面，我直接寫解說抑是台羅拼音。

《驚驚袂著等》內底的作品發表佇《自由時報》副刋、《聯合報》副刋和《文訊》雜誌。有朋友講因為是我寫的，才「出大力」讀，讀甲真辛苦；也有朋友講讀著誠趣味，台語有進步；一半擺分享到面冊頂頭，也會當得著即時的呵咾和指正。

封德屏上認真，每遍我的「台語時間」寄到《文訊》，伊就印落來讀；袂曉的，請教伊的翁婿。薇薇大姊也不時寫批問我佗一字啥意思、按怎讀？

所以，我半耍笑講莫怪（bo̍k-kuài，難怪）in（她們）愈來愈巧，科學家早就講過學語言對人的腦神經有足大的幫助。

我認真激頭腦寫台語文，也不時會學著一寡心適的、奇巧的、有深意的台語，感覺家己可能嘛會當較慢失智喔。

https://www.books.com.tw/products/0010854510?sloc=main