好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

五六个朋友不時做伙開講，其中一位先生愛講「揣（tshuē，找）一工」，可比，「揣一工來阮兜（tau，家）thit-thô（遊玩）。」In姑丈的果子園，今年柑仔大豐收，「揣一工，我tshuā（帶）恁去挽。」

講真濟擺，毋過，並無實際的行動，予人感覺伊誠意無夠。有一遍，伊講in某滷的腿庫（蹄膀）有夠讚，軟，khiū（有彈性），閣入味，予人聽甲欲流喙瀾（tshuì-nuā，口水）；等伊講「揣一工，滷予恁食」的時，一位先生隨講，「免揣，今仔日就來決定佗一日去食；這禮拜我有閒 。」

彼位「揣一工先生」想袂到有人會按呢反應，愣一時仔，才講好啊。然後，阮你一句我一句，撨（tshiâu，挪）出一个時間；過無偌久，正經食著in某滷的腿庫，確實真好食。

過後，就罕得聽著彼位先生閣再講「揣一工」矣。

這是二十外年前的代誌，這陣想起來，是因為發覺家己不時佇心內講「揣一工」，「揣一工著來整理彼堆古早相片。」「揣一工來整理冊櫉。」「揣一工來去永樂布市仔，訂做窗仔簾。」「揣一工來去看阿蘭大姊。」

毋過，這工敢若真僫（oh，難）到，明明毋是無時間，想欲做、應當做的代誌總是有法度一日一日拖落去。

有一个朋友去學跳舞，我講伊已經無閒甲若干樂（陀螺），哪有時間去學跳舞。伊講，「若決心欲做，自然就有時間。」有影，我就是無決心欲做，才會時間閣較冗剩（liōng-siōng，寬裕）都無效。

2017.9.6《自由時報》副刋