好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

人的個性真趣味，我和妹妹明明是仝爸仝母生的，真濟所在兩人的行為卻無仝款；尤其講著請人客這款代誌。

兩人蹛（tuà，住）隔壁巷，阮若去in兜（tau，家）食飯，一定是只有人到喙到；伊毋是，伊一定會攢（tshuân，張羅）幾項仔菜來，講較袂予我傷（siunn，過於）無閒。我講家己的小妹來食飯哪會偌無閒？敢驚我煮無夠恁食？有時共伊罵兩句；毋過無效，伊就是無法度空手來。

像今年元宵，叫in一家伙仔來鬧熱，彼下晡，伊就敲電話共我講伊會紮（tsah，帶）三項菜來。佗三項？雞肉、鯊魚煙和三杯小管。

三項猶會當接受，我講好，我會減煮兩三項。

彼日寒流來，十一个人我準備兩鼎湯，麻油雞和羊肉爐。另外有焢肉、炊石斑、豆干絲炒鹹蛋；青菜是冬筍片炒豆苗，蒜仔炒煙腸。按呢，和伊的三項菜，總共十項，真豐沛矣。萬一食無夠，我會鹹菜炒毛豆，油臊傷濟（太多）的時，食這較袂畏（uì，膩）；冷凍的蝦仔嘛隨時會當提出來煠（sa̍h，燙），免退冰。

我猶咧炒菜的時，伊過來矣。親像變魔術，除了共我報備的三項，伊閣提出宜蘭鴨賞，豆干滷卵，一大盤油飯（面頂有兩箍兩寸長的豬跤），和一盤糋（tsìnn，炸）甜粿！「油飯是拄好（恰好）有人囡仔滿月送的。」伊解說。有人送敢袂使留咧家己食？毋是會歹去的物件！

「全全肉，你毋通閣煮啊。」伊好心共我講。

「全全肉，敢毋是你害的？」

毋但規桌頂全全肉，閣排甲真kheh（擠），豆油、醋的碟仔都囥無路。

這个做人客的閣真熱情，食飯的時，直直勸逐家食伊的菜；主人煮的菜煞閃去邊仔，變做配角。我的囝新婦和阿姨本來就親，這陣伊遮爾（這麼）好禮，自然就隨著伊的指點挾菜；連油飯、甜粿的人氣都袂bái。好佳哉伊無煮湯過來，我的麻油雞和羊肉爐才無對手。

心內雖然小可仔無歡喜，毋過若為著這講氣話，一定無人會同情，顛倒會講我毋知好歹。我只好共妹妹酸兩句，「紮便當去予人請。」「無體統，來阮兜食恁兜的菜。」講也是白講，後遍若閣再叫in來食飯，仝款的戲齣嘛會閣再演。

俗語講「毋是一家人，袂入一家門」，妹婿逐遍過來食飯，嘛一定會撥工去大市場買sa-sí-mih（生魚片）；這日毋知是無閒抑是竟然袂記得，才無聽著伊講，「趁冰冰，緊食；慢食，就無鮮矣。」

我的親姆，大新婦的媽媽佮我妹妹的個性有一點仔仝款。一半擺，阮邀請親家親姆三十暝來圍爐，鬥陣開講真歡喜，啉酒嘛較鬧熱。傷腦筋的是，in一定會「運」一堆菜來，山東女子的開朗大範（大器），阮親姆的菜是大盤大鼎，份量足濟。我抗議，伊就笑哈哈，講無要緊，食賰（tshun，剩）的予查某囝、囝婿提轉去，in過年攏有朋友去食飯。

伊的料理是飯店級的，煮的攏是我罕得煮、煮也無一定成功的工夫菜；比論蔥燒鯽仔魚、紅燒獅仔頭、蒜茸炊明蝦、滷牛腱、牛筋、牛肚等等。伊平常時就愛煮食，愛請人客－－無熟似的人來鬥（裝）冷氣機，伊都有辦法共人留落來食飯。愛煮，工夫有練過，伊煮的菜攏誠入味誠好食，莫怪親家佇阮兜也會認真勸逐家食伊牽手的好料理。

親姆的菜較特別，伊閣毋是我的小妹，我只有感謝；對家己的小妹，我就有一點仔無好聲嗽。元宵彼暗，妹妹講姊夫愛食豬跤，這豬跤「骨較濟過肉，免驚食傷濟肉」，做姊夫的就嚙（gè，啃）一箍；後來啉甲有一點仔茫，妹妹閣講「骨較濟過肉，皮的膠質對筋骨上好」，妹婿閣呵咾姊夫的喙齒敢若猶袂bái，伊就閣再攑（gia̍h）另外彼箍起來嚙。我講冷去矣，後頓炊過才食，伊講免。我共妹妹睨（gîn）一下，伊無看見，猶咧講，「逐家規氣食予完，莫這賰一屑仔，彼賰一點仔。」正經清甲差不多，尾後，伊的盤攏洗好、拭好矣。

主人我的菜有的徙到有蓋的細玻璃碗內，有的用保鮮膜包起來。感謝伊無煮湯來的習慣，我的麻油雞和羊肉爐「完勝」。毋過，一大鼎飯賰賰賰，賰甲阮兩老食兩三日。

。原載2017. 4月號《文訊》雜誌。