好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

     

這幾年，公眾人物若予人無意中看見，閣予人翕（hip，照）著相，媒體攏會講「掠著（捕獲）野生某乜人（bóo-mí-lâng）」。

這日，代誌辦好，時間也拄（剛）好，我就順路去國校門口等我小妹的孫仔Kumo。想袂到等差不多十分鐘，攏無看著伊的影。伊動作緊（快），我懷疑可能是我一時目睭花，無看著，予伊閃過去。今年伊已經慣勢家己轉去厝，免大人去tshuā（帶）矣。

暗時囡仔轉來食飯，我講下晡本來欲去「掠野生的」Kumo，啥人知影竟然予伊「走過手」。

我的後生講，走（跑）過手，應當是講彼个人欲覕（ bih，藏），欲閃，無愛予人搪著（tn̄g-tio̍h，遇到）。「伊敢知影你會去？」

我講伊毋知影三姨婆會去，毋是刁故意無愛予我搪著，「按呢講較趣味啦。」

紲落（suà--lo̍h，接著）我共伊講有一年爸爸tshuā阿媽、外媽和阮姊妹去京都、大阪旅行。六日後，我和爸爸繼續預定的行程，阿姨先tshuā兩个阿媽轉來台北。真無拄好（bô-tú-hó，不巧），彼日有風颱，起先驚飛行機飛袂成，一旦飛成矣，心内驚惶，去名古屋的火車頂，我一路念佛；到旅社，繼續求神。

後來拍第二通電話，才聽著阿姨的聲。伊講飛行機慢分，過誠久才飛，為著欲閃風颱，閣「斡路」（改方向）飛，比原來的時間加兩點鐘才到桃園機場。「風大，飛行機幌（hàinn，晃動）來幌去，親姆和媽媽攏有驚著。平安到位（目的地）了後，媽媽講好佳哉，thit-thô（遊玩）過手矣。」

  聽我講這段故事，我的後生講，「佇遮講過手就真合意思。」

2016.10.25《聯合報》副刋