開始追寫這一個月的日記了，由於成個月咁耐，要完全記得真的好難，但總括還是開心的!
新一年、新開始?但我就過年如過日，就連日記，也隔了兩星期有多才寫...但都是那一句，我真的這麼忙碌嗎?所以我想，希望o黎緊可以好似以前咁，盡可能天天都寫。
好~~現在又是考記憶的時候。
1.1.06,星期日. "喜悅...後悔"
昨晚於家裡的洗手間渡過倒數，10,9,8,7...從廁所出來已經是2006年了，不知多少個的年頭未試過除夕夜會如斯平凡、平靜的渡過了。所以新一年?真的沒有多大的感覺，趕回家睇埋下半場波，然後睇埋"長恨歌"才去睡覺。
原本Jordi佢地話今日去睇"雞丁"，但由於我的興趣不大，所以推了，但今天假期始終是悶，所以我一早起來，就send msg.搵朋友睇"哈利"，我都想沒希望的了，但沒想到06年收到第一朋友的電話會是...而且還是願意...可是我......不能寫了，也要藏進盒子裡去。
其實往後都有Crystal、蘇銘欣的回覆和來電，雖然大家都唔能夠陪我，但我都好多謝妳們的。除此之外，我都有搵多木o架，但可惜聯絡不上......結果到夜晚，本來...唔係好記得點過添。
2.1.06,星期一.
公眾假期，唔記得閒賦在家還是出了街，有朋友記得我做過什麼嗎?
3.1.06,星期二.
要上班了，但陰霾始終不散......
4-6.1.06
無記錯，我今次中的六合彩應該在5號開，結果我中o左"7個字"(一注中4個字,一注中3個字)，所以有$340收呢!
7.1.06,星期六. "哈利波特"
好o野!太好了，搵到人陪我睇哈利波特了，其實係Elaine早幾日話我知文文想睇多次，我先搵到人陪我睇，真的唔該晒!所以我今日一收工，就即刻去UA會文文，睇完就同佢還有陳生一齊食飯(HEHE...學人做雞仔媒人添)，跟注又別了他兩，同o左多木佢地去帝都飲o野傾計。呵呵~~我們今晚真係威囉!先是叫了三杯long drink，然後四個人再開了兩枝紅酒，實行不醉無歸~~第一枝本來不錯的，但可惜開第二枝試另一隻牌子....=p好似飲水咁，唔點呀!知就叫番同一枝啦!!今晚個個都飲到high high o地!!
10.1.06
唔記得啦，但同多木傾多了，得到一點啟示，想到了一點......但傾多了，是要付出一點代價的，今個月的電話費單...破歷史記錄的...唉總之就咩啦!所以我要出多張電話卡呀!
12.1.06,星期四.
今日返學呀!上學前去森記取"地瓜男"，然後吃了一碗好好味的"炸墨魚丸麵"才上學去。由於今晚只是吃了一碗麵，所以回到第一城要吃宵夜呢!
13.1.06,星期五.
難得一個星期五晚上不用上班，原本有節目安排的，但因臨時取消,結果我去了沙田逛街，印象中好似捉o左阿Mon陪我行的，仲行到好夜添，難為文滔仔借o左個媽比我呢!
今晚認識了多木好朋友的"心甜小棧"，識多了一位新朋友。就在她的小棧裡，我發現了不少緣呢!
15.1.06,星期日.
本來約了小燊佢地陪我上寶蓮寺的，但由於今日唔好日，所以約會取消了!但改o左做咩呢!又唔記了。
19.1.06,星期四.
今晚中心團飯，又是中心職員做到團團轉的時候呢!
20.1.05,星期五. "慶祝Pinky & 青 生日"
為了慶祝Pinky同阿青的生日，今晚我要付出$150的代價找Mon做替工，不過這是值得的，因為好友慶祝生日嘛!我們今晚去上次莫生帶過我同Madam去過的"滿江紅"，這兒食物不錯，大家都叫好，尤其這兒的樟茶鴨和水煮肉，真的好正哦~
21.1.06,星期六. "觀禮"
今日是蕭丹和小斌的大喜日子，有幸獲邀參觀(見證)婚禮，真的十分高興，今日婚禮除見番小斌外，還有成十年沒見過的Miss崔、和幾年無見過的許晶瑩。
觀完禮，出旺角幫多木搵書，然後帶去馬鞍山比佢。
22.1.06,星期日. "年度計劃vs團年"
年關將至，還要全村人星期日回中心開全日會，真的...唉~!無計，只好散會後各同事雞咁腳走人，回家團年去!
今年團年十分豐富，有鮑魚有翅又有肚，只是欠海參o者!還有其他美食，真的辛苦爸媽成擔的心機呢!
23.1.06,星期一. "秘密行動(一)"
今日原本是自己用來做功課的，結果同多木......
24.1.06,星期二. "三十而立+秘密行動(二)"
今日是小弟牛一，也就是說虛齡的三十歲了。其實未到今天，從年頭開始，已經萌生起"三十而立"的念頭，可能同多木傾多了，得到不少啟發，再加上人又大一歲了，想o野再上一層，滿腦子有很多事想到了...(暫未能盡錄)
今日牛一唔計公司，其餘時間全都同多木過...
今晚認識了Jordi的同學Maying。
25.1.06,星期三. "秘密行動(三)"
還是無法完成，唯有明天靠自己了。
26.1.06,星期四 "秘密行動(四)"
因老細的突然出現，結果時間所剩無幾...，最終還是叫趕到...真的又是比埋條命佢，結果我的"做完功課症侯群"又是出現了，成個人呆呆的。今晚同了屋企人去王家沙食飯。
27.1.06,星期五.
今日請了假，幫手大掃除，但成效唔顯注，就是夜晚不用上班了，結果都係...今年過年真的有點求其。
28.1.06,星期六. "年廿九"
多年沒有行年宵，今年如是，躲向屋企全日都是搞清潔，到好夜才一家人去食晚飯(嚴格叫宵夜才對)，然後再同媽咪去買新衫過年。
29.1.06,星期日. "大年初一"
恭喜發財!新一年新開始，我李俊釗今年一定要有所進步和改變呀!
今日如常一家人去黃大仙拜神，順便求籤。媽&妹的即場解了，我的就...搵日再解。晚上又如常的在家打麻雀。
30.1.06,星期一. "大年初二"
今日中午同多木佢地去了睇霍元甲，然後再入屯門同婆婆做節開年，然後再去多木屋企打麻雀，打到3點半。
31.1.06,星期二. 赤口"
由於姑姐、伯伯來，所以今早先到茶樓搵位飲茶，飲完同媽去搭車，她差點同人"開年"，好彩有我在，事情才化解。
下午同多木去黃大仙求籤，然後解埋，還有我的都解埋，結果...秘密!
求完籤，同多木食個Tea行一陣，就各自同家人去食開年飯"
文章定位：
26.7.08 "出發啦!出發啦!準備出發啦!, (chausze)