陽光．彩虹．「夢」星雲 夢．星．雲 不應分離 是時候讓他們重聚 「夢星雲」的世界裡應該充滿愛與理想 讓愛的和煦璀璨入夢 讓理想的勁擦亮星星 讓澄明的心洗滌白雲 不單要凝聚，還要有陽光與彩虹

103愛的鼓勵 0訂閱站台

12.10.05,星期三.

死~又失憶，唔記得做過乜，好似放o左工好倦走o左返屋企訓覺...唔記得啦!算~

13.10.05,星期四. 戰戰兢兢紅螞蟻

開學了~上課了~今晚是AC274C"現代文學"的第一次導修呀!!
記得中學時代，中國文學成績一向麻麻，到會考時亦是慘敗科目之一，衰到連自己有無考番合格到唔記得。所以我一直都好驚文學這一科，雖然同樣用中文讀的，但都唔明點解成績咁差?今次有機會再碰頭，我真的想讀好啲，不過又無乜信心，因為往績實在......
正因如此，我今晚就帶著戰戰兢兢的心情往上環上學去!今日本來見老細唔向到想早點收工(重覆早亦是已過了我的收工時間)，但卻不幸的給她摇控做o野，結果又是要趕頭趕命趕返學，緊緊7點準時入到課室。今次文學的老師是個女的叫Miss毛，啲廣東話唔多正，而我就分別唔到她來自何方，佢講書用的字眼有點左，但寫白板的卻係繁體字....不過以上全都唔重要，最緊要係教得好，好似今晚咁，我就沒有釣魚啦!!咁證明這Miss不錯。
臨放學前用msg聯絡上了Madam，所以意外地約了她一起食飯。Madam今晚帶我試了一間成日行過，但卻從未幫襯過的餐廳--紅螞蟻。第一次去光顧，見到個餐牌有中又有西，又有中西合成食品，覺得幾得意，不過我覺得這兒是吃西的，加上有我最愛的天使麵，所以我就點了一個羊仔肉天使麵和田螺夠薯蓉，而Madam則點了一個她的推介--銀雪魚焗飯。三碟體積雖然不大，但全都熱烘烘的，吃落味道不錯，可以再幫襯(hehe又多一間食肆選擇了)!吃完主菜，Madam推介了一個甜品"焗軟心朱古力布甸"，又是正嘢，中間有熱騰騰的朱古力漏出來，好味好味哦!!這個甜品又讓我回味起"瑞士餐廳"的朱古力火鍋，這一講又引到Madam都話想去試!
既然這麼多朋友想試，不如搵埋一齊去食，Madam、Sharon、Sally...呀!約埋小梨同秋思都好播!還有阿詩添~~但係來自四批的朋友點樣聯繫一齊呢?我又唔善搞"朋友串聯"的，點好呢!?還是分開好呢?但要食四次...就算我幾鍾意食都唔點啦，因為食四次必定破產~~
不知不覺食埋美味甜品原來快11點了，係時候叫埋單，然後送Madam去搭車回家去了!今晚多謝Madam陪我食飯同有如此的好介紹!!

14.10.05,星期五. 港島遊蹤

由於見昨晚要返學，所以一早攞定半晝假訓晏啲，但星期一收到通知今日下午3:30-5:00要去社聯聽個talk，結果昨日就收到老細o既電話，叫我攞埋12:30至3:30的假...真的X~Y~Z(我不是講粗口)佢!!!雖然我無乜所謂，但洗唔洗咁老套呀!我過海唔洗時間，仲有我係收4:30架!咁4:30至5:00個半粒鐘妳點同我計先!!點解我有D咁O既老細o架~~!!救命!!
不過我唔同佢計較，我有我的生活。知道要過海，所以我早幾日就約定Pinky，搵佢食午飯兼順便比電車男電視版隻碟佢。我準時過到海(但傻o下傻o下企錯地方等Pinky，好彩只是隔條馬路)，但由於Pinky有點喉嚨痛，所以我們只是去了吃粉，亦因此好快就食完，然後去行陣街，買價廉物美的果汁飲。時間過得很快，到2:00別過Pinky後就一個人行灣仔，先是去了松峰買埋隻LCC-20，因實在太平了，比生暉還要平5蚊，叫人點可能唔買呀!跟注落太原街逛玩具店(只睇，無買o野啦)，之後呢就再去埋我今日的過海目標地點--森記書店。我都是第一次去那裡，沒想到這兒是那麼細，但有關軍事的書都算多，不過有趣的是她們擺賣了不少"盒仔"模型產品(當然是與軍事、兵器有關的)，唔知還以為入了玩具店呢!!本來我向這裡是沒有收獲的，因為搵唔到我的目標書，但我臨走前多口問人地有無，結果遇到熱情的老闆剛好回來，一見到我問這本原來已是兩年前的作品，他即時話幫我入倉搵，不過，服務不是免費的，要收番20蚊訂金，搵到先call我去攞書。都好啦，有就買，無就算，慢慢等。去完森記，時間差不多，係時候去做正經o野，去社聯聽一個什麼調查系統講座。好悶的講座個半鐘好快過，因為有Jessica一齊去聽，有得傾o下計消磨o下。講座完了，別過Jessica就一個人過百佳買今晚的晚餐，然後返沙田看檔!!

15.10.05,星期六. 毒男生活

星期六，短週了，又可以睡晏d先起身，本來今朝全家人都唔洗返工，之但係個個都各有節目，所以我只好按排過一個"等...毒(獨)男生活"。為何要加個"等"字向前面，事原...
今日安排第一站是去大新銀行搞啲嘢，但點不知一等就要人等成8個字，仲等得耐過去匯豐埋櫃檯，簡直恐怖!!D咩銀行服務呀~真係不知所謂，我好少等到發燜的，但今次例外。不過我又好老皮喎，忍注無發老四，可能我是求人啦，如果唔係...
去完間PK銀行都1點有多，按計劃過觀塘還解碼器，我幾驚趕唔切呀!好彩，去到還有5分鐘剩，如果唔係我實寫投訴信"小"佢!!還完解碼器，見觀塘廣場就向對面，而我又好耐好耐未去過(鄉下毒男就係咁的了)，於是入去逛，逛呀逛，逛到有點餓就走入大家樂搵食，叫了一個公司三文字餐，但點知...頂!又係等，食快餐店都要等，一個20分鐘食得完的餐，等的時間就用了15分鐘，痴線o架!快餐店o黎架尼間~~想要我再光顧都幾難!!
食到一肚氣離開觀塘，去我第三站旺角，去旺電睇Notebook，然後再去扭軍曹和買軍曹漫畫，到這個時間我先好啲!!去完旺角，返沙田逛埋大眾同商務先返家食飯。毒男的一天就這樣過了!!
其實我真的是半個毒男，因為我是一個書迷、模型迷(船、巴士)，愛收藏，就好似電車男裡面支持山田的人，他們緊有一樣o野沉迷的，雖然我算不上"沉"，但都差不多了!至於我得一半毒的原因...是因為我身邊90%的朋友都是女生，常常同女仔朋友去街、傾計、食飯，真正的毒男不會像我這樣的哦!