陽光．彩虹．「夢」星雲 夢．星．雲 不應分離 是時候讓他們重聚 「夢星雲」的世界裡應該充滿愛與理想 讓愛的和煦璀璨入夢 讓理想的勁擦亮星星 讓澄明的心洗滌白雲 不單要凝聚，還要有陽光與彩虹

103愛的鼓勵 0訂閱站台

14.9.05,星期三. "煩惱"

今晚收工同阿Mon過了餐廳傾談我的"煩惱事"，傾完似乎有了答案。

15.9.05,星期四. "揀禮物"

今日收工約了Sharon出旺角揀禮物比Sally，由於佢收得早，於是我運用我少有用到的"本四點半收工"，夠鐘就走人往旺角去。我們先到家樂商場逛，跟注去兆萬，然後再去潮流特區，但結果還是返回家樂買o左條"平平"手鏈比佢。除o左手鏈，Sharon都有收獲呀!買o左條鏈比自己同揀o左條鏈比另一同事做生日禮物。而我呢?什麼也沒有買呀，原因我要留番錢買書!
向旺角買完我們要買的，我見趕得切書店關門的時間，於是就過佐敦買今個課程的書。今次AC274C全都是用繁體字書呀，真的好開心哦~不用捱睇簡體字呢~!買完書，見近近地山林道，於是我倆就去了"大盛"食飯，"雪白粥"還是好好味哦~但可惜我們遺忘了叫"蝦蝦天婦羅"。食完飯，過尖咀行加威道，順便去食"da dalce"雪糕，雖然要成28蚊，不過又真的幾好食(上次瑩瑩個蛋糕都係到買的)。食完雪糕行完街，送Sharon去車站搭車，自己也坐281A走人。最近出入油尖旺都坐這車，因為貪佢可快返到屋企。
今晚一路行一路同Sharon傾計，感覺不錯。

16.9.05,星期五. "哈利波特6--混血王子的背叛"

今日收工陪阿Mon去買茶壺，順便買六合彩，但結果都係...未中!!由於心情不是太好，所以買茶壺之餘，捉注阿Mon同我行街，結果去了商務訂"哈利波特6"，不過靜靜地話比大家知丫:我連第四集都未睇完o架!第六集要等到十月一日先有書攞哦!今晚為何不用做看更可以去行街街?hehe...因為原本今晚中心搞生日會，但因近賣獎券日子，所以改期了，但由於一早同人家講了今晚不租場，所以今晚就不用做看更呢!!

17.9.05,星期六. "迎月夜"

星期六，長週，即係要返工，再加上要開會，想早閃都難。不過好在晚上主任同阿Mon有活動要出席，所以開會開到六點就散，都算萬幸了。
開完會第一時間返屋企食飯，因為婆婆同舅父佢地來我家做節。開開心心的食完飯，各人都趕注走人，因為幾乎個個都有節目，不過最離譜係我個妹，飯都未食就閃o左去。
今晚約了阿青夫婦、陳生、阿婉同Pinky出旺角飲o野，我帶了他們上"游木人"，原因可以給我們"噪"!!我似乎沒有揀錯地點，有o野玩又可以大叫大笑最o岩大家，不過我玩是喜歡這兒靜的一面，在露天的位置傾計飲o野，不過他們厭無冷氣和怕落雨，室內一有檯就即刻轉入去。我們起初只是玩，但當遲來的Pinky到o左之後，又要我講一次我的煩惱事...我每一次講起都感到心竭力疲，不過每次一講朋友都有給我意見，真的多謝大家呀!(其實如果我果斷D就可以的了，一就一、二就二...)
今天是農曆八月十四，即係"迎月"，雖然天氣不好，但仍有幸的給我看到月光，市區的月光。

18.9.05,星期日. "中秋BBQ...自己也燒焦"

昨晚3點幾先訓，今朝9點起到身，我都覺得自己幾叻!為何放假還要這麼早起身?原因係約了Sharon佢地入屯門BBQ。我先在荃灣同阿Mei和Sharon匯合，然後轉車再轉車入屯門的龍鼓灘，這裡是我第一次去的呢!我們去的燒烤場叫"芭堤雅"，環境不錯，我們選了一個臨近海灘和近水喉的爐，一來可以望海聽浪聲，二來夠涼又可以有水洗手。由於我們去到未夠12點，人家都未正式開工，但等埋Jordi兩隻o野來到就時間剛剛好，起爐開始燒。
最初我們擔心天氣差，今日搞唔成，但點知龍鼓灘天氣鬼咁好，仲出猛太陽添，一路燒，連自己都燒焦，因為陽光實在猛烈，我們一路跟注把太陽傘的倒影一路移位都無補於是，結果個個都曬到"紅卜卜"成隻燒豬咁，尤其Sharon姐唔曬得o既，還出現灼傷徵狀添!!
燒到差不多五點，因為我要回家"睇波"，所以大家都走人，亦就在我們走的時候，天氣開始轉壞，我們可算走得合時了。回到家睇完波本來再出去回佢o地o架!但點知阿媽唔放人，原因我已經前一晚去到成三點先返歸，今日一早又出去，現在又曬到隻豬咁，肯放人至奇，不過講真，我都好倦了。
人家中秋曬月光，但我就曬太陽，哈哈~~。
今天是9.18事變74週年，亦即係陳先生生日，陳先生，生日快樂呀!!