【阮若打開心內的門】
作詞者：王昶雄作曲者：呂泉生
阮若打開心內的門，就會看見五彩的春光，雖然春天無久長，總會暫時消阮滿腹辛酸，春光春光你何在，望你永遠在阮心內，阮若打開心內的門，就會看見五彩的春光。
阮若打開心內的窗，就會看見心愛彼的人，雖然人去樓也空，總會暫時給阮心頭輕鬆，所愛的人今何在，望你永遠在阮心內，阮若打開心內的窗，就會看見心愛彼的人。
阮若打開心內的門，就會看見故鄉的田園，雖然路途千里遠，總會暫時給阮思念想要返，故鄉故鄉今何在，望你永遠在阮心內，阮若打開心內的門，就會看見故鄉的田園。
阮若打開心內的窗，就會看見青春的美夢，雖然前途無希望，總會暫時消阮滿腹怨嘆，青春美夢今何在？望你永遠在阮心內，阮若打開心內的窗，就會看見青春的美夢。
YouTube http://youtu.be/FJkyiobobQA
溫哥華法鼓山合唱團的演唱：
