Ｎａｔａｌｉｅ 請給我一點溫暖~!

82愛的鼓勵 0訂閱站台

本來想逐個星期既事寫返出黎既~不過實在太多，所以都係算啦～

唔可以唔提既梗係我上個星期五去左海洋公園既哈囉喂啦～果日請左假去玩，所以好精神，嘻嘻～一點出到尖東同ｊｏｙｃｅ＆ｒｙａｎ唱ｋ，唱到四點鐘ｊｏｉｎ理紹強，跟住就出發去海洋公園ｌｕ～好開心，好緊張，因為好耐都冇真真正正咁玩過啦～我地六點到就到，跟住再轉巴士，真係超多人，跟住先發覺原來自己都唔可以算係年輕啦，因為去玩既人全部都只係十幾歲！咁快我都咁大個啦～好鬼驚囉，明知果度有隻鬼既，明知佢會黎嚇我，但我都係要驚～嘻嘻．．．真係冇膽！因為今年買左至尊飛既關係，所以我地可以玩哂所有既鬼屋～不過唔知係咪因為太多人，所以覺得驚得黎唔算好好好驚既！玩到十二點走～好累！

上星期六，因為玩得太累啦～所以留左係屋企休息，同媽媽飲茶，再做下功課咁囉～

上星期日，紹強去左踢波，我就出左九龍城飲茶～等佢踢完波之後我就去左九龍灣同佢行左一陣間，跟住又返左屋企食飯啦！呢幾日同強強有啲意見不合，所以有少少吵架～

星期一開始就唔舒服啦，咳到死，足足病左一個星期！不過因為約美美去做ｇｙｍ，咁就叫佢陪我去睇左醫生先，再去做ｇｙｍ～但係做左一陣，太唔舒服，所以就早左就走返屋企！夜晚仲要趕功課～

星期二，由於一早約好左舊同學結婚幫佢手整個程序表，所以我放左工都係去左佢屋企～整左幾個鐘，成十一點先走！又好累，因為食左藥都冇休息過～返到屋企又要趕功課！

星期三，食哂之前醫生開既藥，未見好轉～所以同公司講早走少少去睇醫生，紹強黎接我去睇醫生，四點走，等左好耐車，返到去都五點幾啦，睇完六點～返出去九龍灣返學，梗係陪埋紹強食埋飯先返學啦～嘻嘻．因為佢咁遠都陪我，真係辛苦佢！功課都算係趕起左有得交，不過做成點就真係唔知啦！放左學即刻返屋企食藥訓覺～

星期四，因為星期五要測驗呀，病左都未有時間溫書，所以都要盡最後既努力～放工去左自修室溫書！效果一般啦～

星期五，測驗梗係半桶水啦～不過考完就算啦！本身紹強又話食飽飯黎接我喎，點知自己又走左返屋企，真係激死人！我最後都係自己返屋企食飯，冇人陪真係慘～一心諗住佢可以陪我食下野行陣架嘛，難得我可以早放學！

星期六，約左紹強去街，但因為仲未好返，所以呢都係冇咩心情，又發脾氣添～激嬲左佢，我又唔肯讓步，佢又覺得自己冇錯既情況下，我地又吵交啦！今次嘈得比較勁，好似有啲傷感情．．．睇怕都係我要收歛啲既，如果唔係佢唔理我就慘啦～

今日，約左ｊｏｙｃｅ去佢屋企整蛋糕，都幾成功呀～幾好味，第一次整都算ｏｋ架啦！下午就去左舊同學結婚開會咁囉～

講住先啦～電腦好鬼慢，所以冇咩心機打～