Ｎａｔａｌｉｅ 請給我一點溫暖~!

82愛的鼓勵 0訂閱站台

終於都返黎啦～唉，星期六日咁就過左啦！冇得見榮榮．．．

三日旅情，累到死咁濟．因為實際活動既時間都只係一日！
第一日（星期六）明明講好左九點鐘準時係深圳等，然後就準時出發架嘛。因為同埋啲老闆一齊去，佢地唔只遲到囉，仲要拉大隊去食早餐！！我地一家人呀，就係為左唔遲到，唔要人地等，一早六點九就起身，七點幾就落去食早餐。仲要早到等佢地，點知佢地咁都有既，真係老闆大哂呀？！！！同我姨丈果啲人做朋友既人都係同佢一樣既，以為自己好大咁，有錢又點喎～搞到成十點先出發，嘩果架車真係好迫，因為成八個人坐架七人車，仲要坐成八個鐘添囉～中途都有停下車咁既，食飯。到夜晚成七點鐘，終於到達目的地──褔建石獅市。去度酒店安頓好，之後就同左肥仔去食飯，一去到間酒樓度，以為佢火災添呀～成場都係煙！原來佢地辦酒席呀～見到佢地唔係酒就係煙，真係唔明白佢地啲人點解仲咁長命。我地食飽飯就差唔多九點，出到去原來人地都已經散席，大陸就係咁早架啦，連去飲都咁早完！食飽就返酒店啦，因為坐左一日車都好累，返去執下野，沖下涼，再睇下電視，大約十一點幾就訓啦～唯一就係張床好硬，訓到條腰差啲斷咁濟！！
第二日（星期日）大約八九點起身，去所謂既酒店食早餐。差到不得了，根本上睇到都唔想食，唯有食左少少。差唔多十點肥仔話黎接我地，去左姨丈哥哥既店度等齊人喎！又係等囉～個個都要人等，次次都要我地做等果個。其他人係咪傻架！！！！見到細個曾經一齊玩過既朋友仔，真係認唔出。之後等左一陣就去到飲果度啦～好多人好誇張！個個人都唔識。後尾終於搵到個地方可以比我地同啲認既人傾下計，咁都好啲。傾返以前細個黎果陣既野，哈，諗返起，上次黎既時候好似只係得六七歲。大家再遇既時候就已經係二十幾啦，十五年後再見都幾好呀，仲係有好多野傾，好快就熟落左。開始飲果陣，完全見唔到啲人食野，淨係見到啲人係度飲酒，我相信佢地飲既酒絕對足夠淹沒我，當我企係度果陣！真係好瘋狂．．．一點開始，成席菜都係海鮮，可能因為果度近海掛～三點幾食飽又返酒店，出左成身汗，返去沖個涼訓返陣再換件衫，六點到出發去紅濤灣。去到呢，個沙灘真係好靚，啲沙好幼好細，六個後生仔梗係第一時間去玩水啦～玩到成身濕哂再去食飯，又係食海鮮。食到我肚痛！食飽就好玩沙灘電單車，好好玩～再玩射氣球，第一次玩我都射中兩隻公仔～好勁！！跟住就返去搵亞姨，佢訓醒左，我地就一齊去唱ｋ啦～大家都好瘋狂，又唱歌又飲酒．玩得好開心。飲左好多酒，不過都未至於醉！二點幾先走，返酒店訓！第二朝搭九點飛機！
第三日（星期一）一早起身就收拾行裝，一個小兄弟開車送我地去機場。十點到深圳，十一半到上水。去左飲茶，跟住返屋企訓覺。因為累到死咁濟．．．

打住咁多先～