Ｎａｔａｌｉｅ 請給我一點溫暖~!

82愛的鼓勵 0訂閱站台

呢兩日好忙，所以冇打日記～打日記係因為唔可以日日同榮滙報我所發生既事，而要比佢知道我既一切。唔想因為長期失去溝通而疏離左！

前日媽媽二點到打比我，話阿姨要我地既回鄉證號碼黎訂機票（由褔建返深圳）。跟住點知一睇，我回鄉證已經過左期，我都唔記得左，亦完全冇意識去驗查下！咁我就話過左期咪唔去囉，反正一路都唔想去架啦，又要坐成八個鐘頭車先去到。點知佢係咁叫我去做一次性既臨時證，真係好貴囉，成３７０蚊囉！！咁果日就呃上頭話媽媽唔舒服早走，溜左去整證囉！其實都幾快，搞左一個半鐘到，搞掂哂．之後一日就有得攞啦～比錢係會快啲既！搞掂之後，媽媽話想食十蚊麵，以前我食過一間係十蚊既，諗住帶媽媽去食，點知去到既時候，加左價．．．要十五蚊！加左少少，都係食啦～食飽左，返到屋企，食唔到飯。成晚好悶呀！冇左榮榮既電話，真係覺得好悶．．．加倍掛住榮榮！

尋日成日都好悶，公司又冇咩做喎！阿頭見我好似好得閒咁，成日想比啲野我做，我都話唔識做，佢都硬話要教我做！都唔知學黎做咩～又唔關我事！係佢臨教我果刻，我地既新電腦ｍｏｎ黎左，真係好，救左我一命！之後就裝電腦啦～因為我算係我部門既小電腦員，次次都係我裝！不過好快就搞掂，岩岩好就放工啦，連ｊｏｙｃｅ果部都換埋，費事佢返黎果陣見到唔高興！悶左一日，放工返到屋企，好快手食飽飯，我又要整曲奇餅啦！今次係整比榮榮架，因為佢星期六日見我唔到，所以我就整曲奇餅比佢食！今次整兩份呀，好多，整都唔係好耐，不過焗就好費時間啦。差唔多焗到十二點先搞掂，比上次用多左成個鐘！今次ｄ曲奇好食好多，因為更加脆，仲加埋杏仁粒添！希望榮榮鐘意食。我買左個唔會疏氣既樽比佢，等佢可以放一個星期都唔會冧嘛～可以慢慢食，仲比左好多佢呀～淨返果啲我會帶埋去褔建食！

今日係公司冇咩特別，係有同事結婚請食ＴＥＡ。仲有個同事黑面囉．我話佢都唔知係咪鐘意結婚果個人，而家人地結婚佢冇機會，所以唔高興呀，哈哈！佢真係一把年紀，樣又唔靚，脾氣又唔好，好心佢啦～仲唔改下真係會嫁唔出囉！放工趕住拎整好既曲奇餅拎去榮榮家姐公司，拜託佢幫我交比榮榮。之後又要趕住出去旺角，約左讀Ａ／Ｃ既舊同學食飯～傾下計，好耐冇見佢地啦～佢地仲話我瘦左好多，哈哈。食飽就返屋企，因為要執野，去三日！其實都好快既，因為一日搭車，一日飲，第三日一早就返黎囉～當消磨時間都好，不過我同榮榮就冇得見啦！唔開心呀～～

榮榮，記得食曲奇餅就係儀儀既愛意啦～每塊都係儀儀親手整架！好好食架～我啲同事食過都話好好味～^^

小美聽日生日啦～我本黎應該今日陪佢既，但又冇陪到佢，真係唔好意思！不過我唔會唔記得架～返黎既時候再同佢慶祝！
美美！！又大一歲啦～最緊要既梗係要身體健康啦！！總之我每一年既生日都會同你慶祝，我地係一世既朋友！咁就足夠啦～生日快樂！！