1.
這個所在佔地幾落十公頃，偎山靠水、樹木青翠、環境清幽、視野曠闊。內底面有砌幾落區無仝時代古老嗍（so̍k）古的建築物，有古早時的三合院紅瓦厝、日人時代巴洛克風格的西洋樓，嘛有永過散赤人蹛的破草厝仔。遮平素時仔開放予南北二路的遊客參觀，便若歇睏日的時，園區外面的大停車場不管時車攏停甲插插插。這踏（tah）上界要緊的功能，是全台灣濟濟電影佮電視劇取景拍片的地場。遮就是下港第一大的電影城——福爾摩莎電影城。
這日早起，佇福爾摩莎電影城園區內面某一角勢，由鴻飛電影公司製作、楊如霜導演的歷史武俠片《王城落日》當咧拍殺青戲。這齣戲的主題是咧講三百外冬前，東寧王國鄭經時代的故事，是近年來罕得有的大製作，已經踮園區內面搭景拍一冬較（khah）加。
透早天一拍潽（phú）光，《王城落日》所有幕後工作團隊，佮這齣戲的主要演員，就唯（ùi）離電影城兩公里遠、鎮內上大間的紅葉大旅社坐遊覽車作伙出發去拍片現場。
阿若男主角黃金、第一女主角白銀、第二女主角王陵的待遇當該然佮人無相像（siāng），怹（in）三人由製片鄭春景駛伊彼台BMW專車載到電影城。透過後視鏡，坐佇駕駛座的鄭春景，看著坐踮後座正爿的白銀佮倒爿的黃金，沿路雙人的手蹄仔一直搦牢牢（la̍k-tiâu-tiâu），伊恬恬無出聲，干單激一個奸臣仔笑。坐佇駕駛座邊仔的王陵，面漚（àu）面臭，較慘去予人倒會仔錢。鄭春景知影伊咧袂爽啥，車那駛那伸正手去挲（so）伊的大腿，王陵用伊重絢（sûn）的大目睭共（kā）鄭春景凝（gîn）。
頭毛削甲短短薄薄、掛一副烏框目鏡，人懸漢大的查某導演楊如霜上界性格，伊毋願參眾人揳遊覽車，閣較袂癮（giàn）詁誠（koo-tsiânn）製片鄭春景載伊，逐回若出班伊攏騎彼台佮伊平平性格的DT，沿路phǹg-phǹg叫，phǹg去到電影城的停車場，逐擺伊攏併（phīng）遊覽車較早到，無一遍例外。
雖然閣一日搭搭，這齣大製作的電影就會當順序殺青。不而過，平素時仔對工作品質要求不止仔懸的導演楊如霜，佇最後關頭伊一絲仔嘛毋敢馬虎（má-hu）。眾人一到拍片現場，楊如霜就隨共神經線絞予絚（ân），伊打揲（tia̍p）副導演林明峰佮助理導演賴美秀，雙人分頭隨組啊隨組去盯進度。
該當替演員梳粧打扮的化粧組上界無閒，怹一透早就出動所有跤手，替今仔日欲上場的演員款假頭鬃，勻勻仔為怹siat-toh。
服裝組共所有演員較停仔欲穿的衫褲攇（hiannh）攇出來，一袾（su）一袾排甲齊齊整整。
場務組為著舖設等咧拍片需要用著的軌道，隨個啊隨個攏褪腹體，佇大日頭跤共軌道搬起搬落，舞甲大粒汗細粒汗。
道具組逐家無閒tshih-tshah，共所有用會著的大細項道具僎（tshûan）甲好勢溜溜。
燈光組敨（tháu）開一綑一綑的電線架設燈光。
攝影組將攝影機鬥踮跤架頂面，予機器會當順序運轉。
場記陳秋萍共場次表佮分鏡表自頭至尾詳細閣巡一擺。
當等一切預定的空課備辦齊全（tsiâu-tsn̂g），副導演林明峰佮助理導演賴美秀向坐佇導演椅頂懸咧想代誌的楊如霜報告。
導演楊如霜正式下令，《王城落日》殺青戲頭一個鏡頭連鞭（liâm-mi）開始。請所有演員上場排練。
2.
藝術大學電影系是這間學校歷史上界久長的科系之一。
永過卒業的校友內面，捌出現濟濟佇影藝界優秀的人物。無論導演、演員抑是各類技術人員，得過金馬獎的不計其數。內中有兩位校友落尾成做國際出名的導演，捌佇威尼斯佮柏林影展提過大獎。
李小青佮林明峰是藝術大學電影系四年仔的學生。怹兩人毋那（nā）同窗，嘛是人人欣慕逐不時掣（tshūa）出掣入的愛人仔。這對青年男女來讀電影系全然是為著欲走揣電影夢，絕對毋是聯考分數拄好錄取、青碰白碰闖（tsông）入來遮咧紅目有仔鬥鬧熱。檢采因由這款緣故，所致怹佇電影系將近4冬來，所展現出來的熱情佮拚勢，是其他同窗無法度比併的。
頂年，怹兩人佮四、五位同窗組一個團隊，開幾落月日拍出影片《青春日誌》，得著金穗獎最佳劇情片。落尾，李小青、林明峰閣佮《青春日誌》的工作團隊合作，完成怹的畢業製作《真善美》。這齣短片由林明峰導演，李小青擔當主角，佮其他電影系畢業製作同齊踮文化中心展覽一禮拜。展覽的最後一工，拄好輪著李小青佮林明峰作伙踮文化中心顧擔。
一透早，李小青就歡頭喜面闖來林明峰面頭前，手裡提一張報紙踮伊的目睭前拽（ia̍t）來拽去，用媤妮（sai-nai）的聲調對林明峰講：「明峰，予你臆看覓，今仔日報紙刊登啥物好消息？」
林明峰掠李小青看一下，出手癢（ngiau）伊的胳（kùe）人跤，李小青予林明峰按呢癢一下，手裡彼張報紙袂輸一大片樹葉仔勻勻仔飄落塗跤。林明峰踏進前一步，抾（khioh）起落佇塗跤的報紙，隨眼著規半版的大廣告：
鴻飛電影公司年度大製作
台灣歷史武俠片《王城落日》
公開招考男女主角、配角
以及各類幕後工作人員
林明峰那看彼幾畷（tsūa）標題那唸出聲，笑笑仔對李小青講：「咱這位大美女，妳是毋是想欲去爭取《王城落日》的女主角？嗯！先予本人好好仔鑑定一下。」講煞，林明峰目睭展大蕊，唯頭巡到跤、閣唯跤巡到頭，雄雄行偎李小青，出手共攬來身軀邊，大大力共伊唚（tsim）一下嘴頗（phé）。
李小青無料著林明峰會無講無譫（tànn）佇展覽場公開共伊唚，害伊一時面裡略仔反紅。伊出手拍林明峰的肩胛頭，閣媤妮一聲：「你實在真討厭呢！對啦，我就是拍算欲來去爭取《王城落日》的女主角。按怎，大導演你敢（kám）有欲作伙來去應徵？」
「我當然嘛欲應徵，」林明峰應甲不止仔爽（sáng）勢，「遮（tsiah）呢讚的機會拄好予咱搪（tn̄g）著，欲哪會使舉白旗投降？尚且，」林明峰欲講若毋講，頓噔（tùn-tenn）一下。
「尚且按怎？你毋著緊講。」李小青共林明峰凝一下。
「我若無參加這齣電影，共媠（súi）某顧牢牢，萬不利妳予別人phānn去欲按怎？」林明峰講出伊的顧慮。
聽林明峰按呢講，李小青面露甜蜜的笑容。輕輕仔佇林明峰的胸坎頓（tǹg）一下，「林明峰，你有影大面神呢，人也無講欲嫁你，你開嘴合嘴就媠某、媠某一直喚（hiàm）。」
電影系畢業製作一展覽煞，李小青佮林明峰就分頭僎相關的資料，第一時間緊寄去鴻飛電影公司參加徵選初試。
3.
過無到兩禮拜，李小青佮林明峰攏接著初試通過的消息，通知怹仝一日去電影公司複試。
複試這日天色略略仔烏陰，毋過一直無落雨。
林明峰一透早就起床，共伊彼台二手的Vespa洗身軀，挐（lù）甲白雪雪。車洗好勢伊行到路口的早頓店，買兩份伊佮李小青上愛食的燒餅包卵和豆奶，捾（kūann）轉厝裡看著李小青猶咧眠床頂睏，緊猛（mé）共搖睜神，「小青，好起床矣。妳等咧閣愛畫粧，先去洗手面，通好來食早頓。」
李小青手面洗好、早頓食煞，坐踮梳粧枱頭前，共粉盒仔、胭脂提出來，用伊上界熟手的方式，佇上短的時間內共粧畫好。粧畫煞，李小青問林明峰：「明峰，你看我今仔日穿佗一袾衫去面試較好看？」
林明峰輕略仔共李小青捻（liàm）一下鼻頭，「大美人，妳人媠穿啥物衫攏嘛好看。」
「人毋管啦，」李小青共林明峰媤妮，行偎共唚一下嘴頗，「你緊替我揀一袾衫啦。」
林明峰挩（thuah）開衫仔櫥，攇一袾水藍色的洋裝提來李小青面頭前，「小青，這袾洋裝媠閣大扮，」林明峰閣唯衫仔櫥提一條腰帶出來，「若縖（hâ）這條粉紅色的腰帶，保證併布袋戲內面彼個玉芙蓉閣較迷人。」
李小青接受林明峰的意見，歡頭喜面穿水藍色洋裝、縖粉紅色腰帶。伊167公分的體格，long一雙白色的懸踏鞋了後，徛（khiā）起來強欲併林明峰較軂（lò）。
行落樓跤，李小青看著Vespa予林明峰挐甲白雪雪，出嘴共詼（khue）：「你嘛較拜託咧，這號烏陰天隨時攏會落雨，你毋驚等咧這隻白雪公主沃甲澹（tâm）漉漉。」
「一透早烏陰到今（tann），嘛無滴甲半點雨，我相信天公伯會鬥保庇，助咱一路順序到電影公司。萬不利若搪著落雨，做你放心，我雨幔（mua）僎便便。」林明峰應。
有影林明峰騎白雪雪的Vespa載李小青，一直到甲十幾公里外的鴻飛電影公司，路裡攏無滴著半點雨水。
一到10樓電影公司，袂輸行入一個菜市仔仝款。幾落十位來參加複試的青年男女，共規間公司揳甲滇（tīnn）滿滿，連欲徙振動的跤路都無。這日拄好拜六時仔，鴻飛電影公司共9樓的保險公司借大間的會議室，差派兩位小姐引掣猶未輪著面試的人先踮9樓歇睏，等待喚名姓上樓面試。
早起10點開始，代先面試幕後工作人員。
檢采人數濟閣無需要現場實做演練，一位應徵者平均扯（tshé）量約兩到三分鐘就問了。林明峰10點半左右夆（hông）喚起10樓面試，無一搭久仔就落來9樓陪李小青作伙等待。到甲中晝12點跤兜，幕後工作人員的面試才到一個坎站。一位留踮9樓會議室的服務小姐向眾人宣布：「各位應徵演員的先生、小姐，請各位先去食晝歇睏，下晡兩點開始面試。」
中晝，李小青佮林明峰手牽手坐電梯落樓跤，揣一間連鎖咖啡店。因為無啥物胃口，怹干單隨人點一甌冰咖啡、公家一份總匯三明治準一頓。
2點進前怹轉到9樓會議室。不而過，李小青等到欲偎3點半，才夆喚起10樓面試。一踏入考場，看著正中央彼面壁搭一張大海報，頂面寫「電影《王城落日》公開大招考」。三位評審坐佇正頭前。中央彼位福相福相，留一粒海結仔頭，細蕊目睭看起來袂輸鳥（niáu）鼠仔目，伊面前的名牌寫「製片鄭春景」；倒手爿（pîng）彼位掛一副烏框目鏡，頭毛削甲短短薄薄，看起來人懸漢大的形，伊的名牌寫「導演楊如霜」；正手爿彼位剃平頭，體格武頓武頓，皮膚烏肉底，伊的名牌寫「攝影師張明泰」。
李小青向三位評審行一個禮，佮伊同齊入場的是一位二十外歲的少年家梁日煌。演員面試的部分是一男一女仝場，分別對演《王城落日》劇本內面男女主角佮男女配角的對手戲，予評審拍分數。李小青佇對演的時，面裡表情豐富、聲音時懸時低，展現出誠有自信的模樣。表演煞，閣向三位評審行禮才退場。
面試煞，李小青佮林明峰手牽手坐電梯落樓跤，這時天當咧摔（siàng）大雨。林明峰唯揹（phāinn）仔提出兩領雨幔，共粉紅色的雨幔交予李小青，家己long青色的雨幔。發動早起才挐甲白雪雪的Vespa，李小青掠伊笑一下。雙人軁（nǹg）入雨幕中，沓沓仔向十幾公里外的稅厝徛前進。
4.
閣過成（tsiânn）十工，李小青接著鴻飛電影公司製片助理王小姐的電話，講伊懸分通過複試，請伊兩日後下晡3點來公司參加決選。
過無偌久，林明峰唯外面轉來，一踏入門李小青緊闖偎共講：「明峰，我拄才接著電影公司敲來的電話，請我後日下晡去參加決選。」李小青看林明峰面憂面結，共搭一下肩胛頭好禮仔問：「是毋是你無接著決選的電話咧鬱卒？」
林明峰幌（hàinn）頭，吐一嘴大喟（khùi）講：「拄仔佇外面接著厝裡的電話，講阮阿公破病蹛院，我較停仔就欲轉去下港一畷。小青，真歹勢，後日袂當陪妳去參加決選。」
「明峰，是我愛共你會失禮毋才對，」李小青小可匿（bih）嘴，「因為參加決選的緣故，無法度佮你做陣轉去看阿公，是我較歹勢。」李小青伸手去牽林明峰，「行，我來共你鬥款行李。」
兩日後，西北雨捙桶倒。
李小青參頂回複試相像，身穿水藍色洋裝、腰縖粉紅色腰帶、跤long白色懸踏鞋。佇大雨中舉一枝紅花雨傘，行到路口拽一台計程仔，請運將直透駛到鴻飛電影公司樓跤。
到位，李小青看手錶仔，超過約束的時間3分鐘。伊驚晏（ùann）到被取消決選資格，無管穿懸踏鞋半行半走，一出10樓電梯門緊猛揤（tshi̍h）電鈴。電鈴霆（tân）三聲了後，門被拍開。
李小青看徛佇面頭前的人目睭細蕊若鳥鼠、揹一圈腹肚桶，矮伊半粒頭較加，伊雄雄想起來是複試彼日坐踮正中央彼位評審鄭春景。
伊趕緊共對方抌（tìm）一下頭，大喟喘袂離講：「鄭製片，真歹勢，因為落大雨害我遲到。毋知，」鄭春景伸手掩李小青的嘴，「李小姐，寛寛仔是免緊張，」那講那偃（ànn）腰唯鞋櫃提一雙粉紅色的淺拖予李小青，「共懸踏褪落來，換穿淺拖較舒適（sù-sī）。」
李小青共拄予大雨沃甲澹漉漉的懸踏鞋褪起來囥（khǹg）咧鞋櫃前，換穿鄭春景提予伊的淺拖。伊越頭巡視淡薄仔暗毿（sàm）的室內，哪會四箍輦（lián）轉攏看無其他參加決選的人，心內當咧僥（hiâu）疑的時，鄭春景笑笑仔對伊講：「李小姐，請來我的辦公廳，咱好好仔來參詳一下。」
李小青雖然感覺怪奇，不而過伊天真的明星夢掩嵌直欲臨到的危機。伊無時間想遐（hiah）濟，綴鄭春景的跤步行向內面的辦公廳。鄭春景拍開辦公廳的門，講一聲「請」讓李小青先入去。李小青一入去內面，有影驚一趒（tiô）、心肝丟（tiuh）三下。這個空間的確有夠格號做辦公廳，毋那是小小的辦公室爾（niā）。除了一塊大武塊的辦公桌仔，一座峙（tshāi）滿各式洋酒的大酒櫃以外，上界譀（hàm）古的是偎壁角的所在，煞囥一頂雙人膨床。
李小青拄踅翻頭，鄭春景就共門鎖tiak一聲關起來，「嘿、嘿」大笑兩聲了後，隨露出豬哥嘴、痟（siáu）狗目，袂輸一嘴欲共李小青拆食落腹仝款。李小青連退幾落步，嘴裡喝：「你莫過來！」
鄭春景那笑那講：「媠姑娘仔，做妳放心，我袂共妳強。等我將代誌拆白了後，妳家己做決定。」鄭春景點一枝薰續落講：「妳定著心內怪奇，是按怎今仔日決選干單妳一人，尚且無其他的評審在場。無毋對，妳就是內定的第一女主角人選，我鄭某人一人決定就會使。阿若男主角人選就是現此時蒸（tshìng）甲掠袂牢的影星黃金，這齣電影總經費愛開上億，無可能男女主角齊（tsiâu）用新人，按呢傷過頭冒險。」伊掠李小青看一下繼續講：「假使妳若願意，」手比褪衫的屈勢，「第一女主角的位就是妳的，過幾工正式簽約。」
李小青強忍含佇目墘的珠淚，「假使我若答應你，你愛閣允我一項條件。」
「啥物條件做你開，只要合情合理、我做會到的範圍內攏允你。」鄭春景講甲不止仔有自信。
「我的查甫朋友林明峰，這回嘛有應徵幕後工作人員，拜託製片予伊一嘴飯通食。」為著家己佮查甫朋友的前途，李小青決定無惜一切。
「這毋較簡單咧桌頂抳（ni）柑，」鄭春景心內真知對方已經著釣，「予伊副導演的位，按呢應當有夠額矣。」拍一個咳嗽續咧講：「先小人後君子，歹聽話講代先，恁兩人私底下欲按怎舞恁兜的代誌，不而過，不准恁踮片場內外咧談情說愛。按呢敢做會到？」
李小青無聲抌頭。
「加話減講，妳是欲家己來，抑是愛我動手。」鄭春景那講那褪家己的面頂衫。
話猶未講煞，李小青早就伸手共洋裝後面的jia-khuh挩開，規領水藍色的洋裝順勢靜靜仔滑落跤盤頂面，露出幼咪咪、白皰（phau）皰的查某身，鄭春景看甲心狂火熱、嘴瀾喢喢津（tsha̍p-tsha̍p-tin），李小青雙手伸向白色奶帕（phè）仔的前鈎，tiak一聲，奶帕仔向雙爿彈開，兩粒圓圓婷婷、若籠床（sn̂g）底拄炊熟的肉包走出來見人，頂面兩粒粉紅啊粉紅的奶珠，予鄭春景的痟狗目眼甲強欲掠狂。
鄭春景早就接（tsih）載袂牢，雙人攏褪甲偆內底褲。伊踏進前用伊肥脺脺的雙手共李小青摩（moh）起來，行幾步直接共撣（tàn）起膨床頂懸。李小青牙齒根咬咧、目睭放瞌（kheh）瞌，用聖女受死進前的心情麻痺家己。鄭春景袂輸枵（iau）狗咧喫（khè）豬肝骨，舌伸長長，舔（tsn̄g）、吮（suh）、含的功夫盡展，另外伊的雙手嘛無時閒，挲、迴、捉（tshio̍k）項項皆能，伊一個出力，共李小青的內底褲揪落來，現出疏疏朗（lang）朗的毛，嵌踮密洞頂面，伊用倒手家己戮（lu̍t）幾落下，出力搡（sak）入密洞，李小青大哀一聲，伊無管對方哼呻（hainn-tshan），直直抽搡下身，結局年歲袂騙咧人，五十外外的鄭春景無三兩下手就軟垢（kauh）垢，豬哥面仆咧李小青的雙峰頂面，流嘴瀾膏。
5.
咻—咻—咻—
花月紅手裡的流星劍出鞘，佇空中舞弄幾落下，速度緊甲予人袂赴睨（nih）目，伊對準穆悲秋的嚨喉揬（tu̍h）過去，穆悲秋嘛毋是普通的腳數（kioh-siàu），伊閃過流星劍，換用手中的半月刀削唯花月紅的肩胛頭，花月紅踜（liòng）一下身，踮半空中拋輦斗，伸手相連續出劍，劍劍相準穆悲秋的要害，穆悲秋搦佇手裡的半月刀，採取防守的屈勢，快速抵擋對方來劍。穆悲秋直直退、退到大榕樹跤，撜（tènn）一下力，抗（khàng）起哩樹枝尾，佇空中翻身滾踜，連連出刀，一直向花月紅斬去。鏗（khin）鏗鏘（khiang）鏘、叮叮咉（tiang）咉，雙方大戰數十回合，流星劍、半月刀佇夜暝無月嘛無星的荒野，刣甲刀光劍影、難分難解。
公元1662年6月，鄭成功過身。
鄭成功的後生鄭經佮第五小弟鄭世襲搶奪王位，大隊兵馬以外，雙方陣營嘛攏有一位武功蓋世的女俠。穆悲秋是鄭世襲陣營的第一高手，嘛是Siraya族的青春少女。花月紅是鄭經佇東瀛熟似的紅粉知己，嘛是助伊搶奪王位一流的人選。除了雙方陣營搶奪王位戰甲血流成河以外，鄭經佮花月紅、穆悲秋之間的愛恨情仇，檢采是世間男女千古不變的傳奇故事。
以上是電影《王城落日》的劇情大要。
男主角鄭經由頂港有名聲、下港嘛出名的性格小生黃金搬演。
第一女主角花月紅由皮膚幼咪咪、白皰皰的新人白銀搬演。
第二女主角穆悲秋由烏甜媠啊烏甜媠的新人王陵搬演。
徵選主要演員的評審雖然有三位。不而過，導演楊如霜、攝影師張明泰佮意的人選，根底參製片鄭春景敢有仝人，一點仔嘛無要緊。
阿若最後被鄭經拍敗的配角鄭世襲，因為戲份無濟的緣故，鄭春景人情做予導演楊如霜。楊如霜指定副導演林明峰搬演，到底啥物因端？鄭春景全然無欲窮究，楊如霜嘴密甲若米篩，實在嘛無人真知。
6.
李小青共仆佇伊胸坎頂面、睏甲齁（kôonn）齁叫的鄭春景搡走。赤身露體闖入便所，凊采抽一簇（tshok）衛生紙唯下身迴幾下，衛生紙撣落馬桶揤水沖掉。內底褲、奶帕仔、洋裝趕緊long long咧，袂輸咧逃難仝款，拚出這間佇伊的人生留落嚴重污點的辦公廳。
坐電梯到樓跤，才雄雄致覺跤底穿的是鄭春景提予伊的粉紅色淺拖，李小青唯厝裡穿來的白色懸踏鞋，猶囥咧10樓頂。不而過，一想著鄭春景的豬哥嘴、痟狗目，伊根底就無想欲轉去提鞋。
下晡彼陣若捙桶倒的西北雨，這時變成較幼絲的毛毛仔雨。李小青紮（tsah）來的紅花雨傘，嘛佇雄狂中摒（phiann）咧樓頂，袂記攑落來。伊目屎那滴雨那湳，行到路邊徛十外分鐘才閘（tsa̍h）著一台計程仔，伊喚運將直透駛到徛家就近的路口。
一踏入門，李小青隨共跤底彼雙粉紅色淺拖撣咧糞埽（pùn-sò）桶，糞埽袋仔順續扭（giú）出來綁予好勢，盈暗一聽著〈少女的祈禱〉音樂時，通好捾出門拚掉。
伊闖入浴間仔，共洋裝、奶帕仔、內底褲隨領隨領褪掉，佇褪衫的時，才想著縖咧洋裝頂面彼條粉紅色的腰帶，嘛囥踮電影公司無紮轉來。李小青拵（tsūn）開水濂頭，予涼冷的水一港一港濺（tsūann）咧身軀頂，伊規身軀雪文膏糊甲滿滿是，伊出力擩（lù）予鄭春景蹧躂（tsau-that）過的身軀，一遍閣一遍，一擺又一擺，一直擩甲規身軀紅記記、起雞母皮才停止。
彼暝，李小青佇無林明峰陪伴的眠床頂仙睏都睏袂去。腦海內一再溢出來下晡予鄭春景蹧躂的影像。
隔轉工偎晝，因為規暝睏袂佳睡（tsūe），李小青規個人踅神踅神，伊頭殼當咧疼丟丟的坎站，接著林明峰唯下港敲手機仔予伊，唯話語裡聽會出激動的情緒：「小青，共妳講一個好消息，早起我接著鴻飛電影公司的通知，講我錄取《王城落日》的副導演。」
「恭喜你，明峰。」李小青那講目屎那無聲滴落來，小可嗖（sau）聲嗖聲。
「小青，妳是毋是人無爽快？聲音聽起來怪怪。」林明峰關心。
「無要緊啦，可能是昨暝睏無夠眠的緣故，你免煩惱。」李小青輕聲應。
「阮阿公身體有較恢復，即馬（tsit-má）已經倒轉來厝裡靜養。我明仔載欲暗就會上北陪妳。」林明峰聲音裡透露伊的期待。
第二工黃昏時仔，林明峰轉來伊佮李小青共同的岫（siū），外面天氣熱沸（hut）沸，伊規身人大粒汗細粒汗。李小青知影心愛的人欲轉來，特別梳粧打扮予規個人看起來較清彩。檢采是人咧講啥物小別勝新婚，林明峰一入門，包袱仔摒咧塗跤，李小青一句話猶塞咧嘴裡，林明峰無問伊的意思，就緊猛共扭入浴間仔，無三兩下手兩仙赤身露體的青年男女徛踮水濂頭下底，林明峰共李小青搡偎壁，雙跤半跪、大嘴開開出力吮伊婷婷的奶珠，李小青用愛意的眼神回應林明峰，順勢共伊的頭揤予低，將充滿愛液的密洞抵（tu）偎伊的嘴邊，一手伸落去掠明峰的傢俬頭仔。雙人舞弄一陣，到甲林明峰喝忝（thiám）投降，互相才替對方共身軀拭予焦鬆。手牽手行出浴間仔，作伙去灶跤料理愛的暗頓。
7.
李小青被鄭春景使（sú）舞了後一禮拜，仝款拜六下晡時仔，鴻飛電影公司無半位員工上班。相像接著進入決賽電話的潘惠珠，穿一領無手ńg、翠綠色的絲質面頂衫，這領衫半通光，佇大日頭跤，內底茄仔色奶帕仔看現現，下身一領短甲嵌袂牢跤頭趺（u）的白色抾幜裙，跤踏12公分懸踏鞋，佇路裡行的時直直搖尻川（kha-tshng）花，害一位青春少年兄的Oo-tóo-bái袂赴踏擋仔，差一屑（sut）仔去碰著頭前彼台BMW。
鴻飛電影公司的門一拍開，潘惠珠看徛佇面頭前的人目睭細蕊若鳥鼠、揹一圈腹肚桶，矮伊半粒頭較加，伊真知這個人就是複試彼日坐踮正中央彼位評審鄭春景。伊家己主動共12公分懸踏鞋褪踮門邊，予規個畫面看起來較和諧。徛佇鄭春景面頭前的是一位無穿懸踏鞋量約佮伊平懸、兩蕊重絢大目睭、皮膚略仔咖啡色的烏美人。
鄭春景猶袂赴露出豬哥面、痟狗目，潘惠珠就先發出媤妮聲：「鄭製片，外面日頭熱火火，人想欲先來沖涼退火一下。借問，化粧室佇佗位？」
鄭春景無想著這個查某囡仔遮呢蔥脆，暗爽在心內。伊手比辦公廳的方向，潘惠珠那行那共面頂衫褪掉，摒咧膨椅頂，行到膨床邊，短裙續（sùa）手撣踮頂面，入去浴間的時，身軀頂拄好偆茄仔色奶帕仔佮內底褲。鄭春景大伐（hu̍ah）綴潘惠珠後面行入辦公廳。潘惠珠刁持無閂浴間仔門，水濂頭的水開盡磅，水聲嘩嘩叫，鄭春景衫褲盡褪，動動幌（tōng-tōng-hàinn）撞入浴間仔。
一入浴間仔，代先餳（siânn）鄭春景注目的是烏美人胸前彼兩丸咖啡色的肉球，看起來併頂日仔李小青的白色肉包較大一號，烏美人共肉球送到鄭春景開hā-hā的嘴邊，妮一聲：「鄭製片，來食冰涼的巧克力ice-cream，」一手去摸鄭春景拄才幌無三下早就頭儋（tàm）尾儋的傢俬。鄭春景豬哥瀾含咧嘴裡，出力去吮烏美人併皮膚色緻閣較深落的奶珠。無論潘惠珠奇巧的魔手按怎舞弄，鄭春景查甫人的尊嚴一絲仔都無法度瞻（tann）頭，最後，伊用手踵（tsíng）頭仔輕輕鬆鬆進入潘惠珠的洞門。
倒轉去辦公廳，鄭春景代先開嘴：「嘿、嘿，烏美人，咱這齣年度大製作的電影，拄好猶欠一位第二女主角，妳的表現誠合我的意，這個角色就賞賜予妳。過幾工仔會正式通知簽約。」
「多謝製片，Thank you、ありがとう」潘惠珠用併拄入門較妮的聲調落（làu）英、日語，閣向鄭春景行90度大禮，才去外面long伊褪佇門邊彼雙12公分懸踏鞋，落尾，尻川花搖咧搖咧行出鴻飛電影公司。
到遮，電影《王城落日》兩位女主角，齊佇製片鄭春景手中挲圓捏扁裁決人選。簽約的時，鄭春景共第一女主角李小青號藝名白銀、替第二女主角潘惠珠號藝名王陵。
8.
鄭經拍敗阿叔鄭世襲奪著王位了後，順續共鄭世襲下底第一高手穆悲秋納入家己陣營，佇原底手下大將花月紅以外，身軀邊加一位武功蓋世的助手，徛踮鄭經當咧佮清軍對敵的立場，會當講是若猛虎添翅。不而過，坐穩東寧王國王位的鄭經，佮天跤下有權有勢的查甫人攏相像，大某以外，若無加娶幾個仔細姨，會感覺家己無夠雄威。
花月紅、穆悲秋雖然毋是鄭經對外公開的細姨，不而過，鄭經佮怹兩人房間仔底的代誌，老早就是宮廷內外風聲謗影、袂使講出嘴的秘密。鄭經的武藝儘管毋是花月紅佮穆悲秋的對手，總是佇夜靜深更的時，怹的另外一款技藝會予伊感覺樂暢、滿足。
彼暝，佇暗毿的油燈跤，鄭經踮承天府的冊房裡讀《孫子兵法》。
伊讀甲人僐忝頭，拍算欲歇睏的時。窗外雄雄閃過一道烏影，鄭經喝一聲：「誰？」料叫是刺客，準備欲喚侍衛擒掠的坎站。彼道烏影唯天篷頂跳落來，鄭經拄欲伸手提劍佮來人對決，烏影閘咧鄭經面頭前，伊才看清楚是皮膚略仔烏金、目睭重絢大蕊的穆悲秋。
穆悲秋輕輕仔拽一下掌風，蠟燭火隨無聲化（hua）去。
烏暗中，穆悲秋三兩下手就褪盡雙人身軀頂的衫褲，伊共鄭經搡去眠床頭，規仙人騎咧對方身軀頂，用伊野中帶柔的技藝，消敨（tháu）鄭經規日的疲勞。鄭經瞌目享受袂輸咧野地偷情的趣味，雙手伸長長去挲穆悲秋胸前彼兩丸肉球。只有佇這個時陣，鄭經所展現的是佮日時拍派軍國大事、威風凜凜嶄然仔無仝的角色替換。
床頂一陣天搖地動，穆悲秋緊猛抽退，衫褲穿咧，像一陣來無影去無蹤的絞螺仔風，消失佇窗外無月也無星的暗暝。
9.
林明峰唯下港轉來第三工早起，日頭早就曝尻川，伊猶咧眠床頂睏，雙手共李小青攬牢牢。眠眠中伊的手機仔喨，伊雄雄搐（tshuah）一趒（tiô），驚共身軀邊的愛人仔吵睜神，伊輕略仔走去外面露台接電話，想袂到是導演楊如霜敲來的，楊如霜講欲佮伊參詳《王城落日》拍片的一寡細節，順續請伊食日本料理，彼日暗頭仔六點半約踮淡水櫻花溫泉會館見面。
林明峰聽對方講欲約佇溫泉會館參詳代誌，心肝內感覺礙虐（gāi-gio̍h）礙虐。電話掛斷了後，伊隨上網查櫻花溫泉會館的資料，佇溫泉會館網頁頂面，林明峰有影看著餐廳紹介，嘛確實有看起來不止仔好食款的日本料理。
雖然佮楊如霜約束佇日頭落山了後見面，不而過，慣勢清氣相（siùnn）的林明峰，彼下晡嘛是搰力咧擩伊彼台白色Vespa，擩甲白雪雪、清氣噡（tam）噡，就親像頂回伊載李小青去鴻飛電影公司面試彼擺相像。
林明峰稅厝徛的所在，離櫻花溫泉會館的路程，若騎Oo-tóo-bái至少愛成點鐘才會到位。林明峰驚頭擺佮導演見面就予對方等，所致5點跤兜就唯厝裡出發。到位的時，林明峰看手錶仔才6點5分，伊共Vespa峙好勢，坐踮車頂搧漁人碼頭吹來的微微海風。
櫻花溫泉會館是佇淡水漁人碼頭就近的濱海路頂，佇遐會當遠遠看著草山佮淡水河的黃昏落日，視野不止仔開闊。
10分鐘後，遠遠一台DT phǹg-phǹg叫騎偎來林明峰身軀邊，林明峰才咧想佗一位少年家仔遮呢臭銃，頭毛削甲短短薄薄、牽一枝烏框目鏡的楊如霜落車，徛起來佮林明峰強欲平懸，毋過漢草併林明峰較粗勇，若無斟酌看，一般的（tik）攏會掠準伊是查甫囡仔。
楊如霜共林明峰搭一下肩胛頭，代先開嘴：「少年的，我若無看毋對，你的確是林明峰。」
林明峰拄欲問講對方哪會捌伊，才想著伊的聲音聽起來小可粗粗，佮電話中導演的聲音欲仝欲仝。伊看對方穿插簡單，頂身一領深藍色水的T-shirt、下身一領烏色淡薄仔白霧的7分拍鐵仔褲；伊才想著家己為欲慎重，穿白siat-tsù、烏西裝褲，閣結一條海水藍ne-khu-tái。林明峰小可發面紅（hông），講話膽（tám）膽：「楊導演，妳好，我是林明峰。」
楊如霜唯衲（lak）袋仔撏（jîm）一包Peace的薰佮一盒番仔火出來，抽一枝薰出來問林明峰：「少年的，欲哱（pok）一枝否？」看林明峰幌頭，楊如霜才共薰點灼，囥咧家己嘴裡，哱甲偆一節仔，才共薰撣咧塗跤踏予化，對林明峰睨一下目，「行，咱入來食好料的。」
一入去溫泉會館的餐廳，對拄唯大學卒業無偌久的林峰明來講，有影大開眼界。伊看著內底濟濟自助式的高級料理，一時煞毋知欲唯佗位挾起。楊如霜叫伊免細膩盡量食，家己煞顛倒食無濟，直直佮林明峰敬雞尾酒。這個暗頓食點外鐘，自頭至尾楊如霜攏無提起佮拍片相關的事務，全全問一寡林峰明私人的代誌。林明峰頭擺食遮呢豐沛的料理，食甲拍呃仔，最後伊對楊如霜講：「導演，盈暗予妳請好料的，真多謝，另日拍片的時才勞煩妳共小弟牽教。」
「免等到另日，較停仔就會當共你牽教。」楊如霜行去外面，向櫃枱小姐提原底預定的房間鎖匙，共愣（gāng）愣徛踮遐的林明峰掣去308吉野櫻情人湯屋。入門正手爿一座洗面台，頂頭一面圓鏡，倒手爿就是接近四角形的溫泉池，偎壁一台液晶電視，溫泉池岸頂排一矸紅酒、兩塊玻璃甌仔，內面的燈光、氣氛嶄然仔Romantic。
粗枝大骨的楊如霜個性阿莎利，無興趣沓沓仔培養氣氛。一入門就共烏框目鏡剝起來囥踮洗面台頂面，續落來一下手共T-shirt佮7分拍鐵仔褲褪落來，這時目睭沙瞇（bui）沙瞇的林明峰才發覺楊如霜根底就無穿奶帕仔佮內底褲。平平查某人，毋過伊佮李小青的體格煞差遐呢濟，雖然大枝骨，不而過楊如霜的奶干單A-cup，頂頭袂輸兩粒葡萄乾黏踮遐，假若未發育的查某囡仔。阿若下身規大簇烏毛遮嵌密洞，嘛佮李小青嶄然仔無仝。
楊如霜看林明峰跤手慢鈍，規氣替伊敨ne-khu-tái、褪衫褲，順續共揪入溫泉池作伙浸優質、無硫磺味的溫泉。量約浸15分鐘了後，林明峰感覺精神加誠清彩，楊如霜規身軀的筋脈血路嘛假若攏齊拍通。衫褲穿好，兩人閣佇溫泉會館外面開講，一直到月娘匿入雲裡，才分別騎Oo-tóo-bái離開。
彼暗，林明峰轉到厝裡早就翻點，李小青毋知已經睏到第幾殿，泛勢佮周公咧夢裡相會。
10.
隔轉工，李小青全然無問林明峰昨暝佮楊如霜相會的代誌，就親像伊嘛無想欲共對方提起落大雨彼下晡佇鴻飛電影公司，伊佮鄭春景之間所發生的代誌仝款。
成個月後，《王城落日》開鏡典禮備辦甲不止仔奢揚（tshia-iānn），製片鄭春景、導演楊如霜、男主角黃金、第一女主角白銀、第二女主角王陵齊盛裝赴會。媒體記者烏黔（khâm）黔，共規個會場揳甲強欲出汁。第二工，各報影劇版頭條佮電視新聞，攏共《王城落日》開鏡報甲淐（tshiâng）淐滾。
開鏡了後一禮拜，規個工作團隊佮主要演員攏作陣落去下港，踮福爾摩莎電影城開始拍片的空課，電影公司共離遐無偌遠的紅葉大旅社租兩層落來，成做眾人拍片以外歇睏的客棧。製片、導演、男女主角這5個人蹛較高級的單人房以外，其他工作人員佮演員攏兩人睏一間。拍片所需要的大量臨時演員，透過網路佮報紙招募就近鄉鎮的鄉親參與。
底片貴蔘（som）蔘，佮主角的片酬仝款，是一齣電影欲完成進前，開錢若開水的一項物件。尚且，《王城落日》主要的演員佮導演攏毋捌合作過，需要時間沓沓仔互相適應。關係這點，佇業界人稱「快手導演」的楊如霜，一點仔都無咧煩惱。伊一向以時間換取空間，設使演員表現無上腳（tsiūnn-kioh），無論對方是偌呢大牌的明星，伊相像會一擺閣一擺排練，等到伊透過monitor看著規個畫面有合伊的意，才會下命令喚攝影師開機。
頭一日，主要是咧翕（hip）鄭經佮花月紅互動的畫面。搬演花月紅的白銀是電影界的新人，雖然永過讀電影系的時，捌有擔當女主角的經驗，不而過，腌腸比雞腿有影差大碼。這日，白銀的表演不時予導演拍銃，定定愛一再排練。看搬演鄭經的大牌明星黃金規工激苦瓜面，白銀直直抌頭共伊會失禮。成做白銀正牌查甫朋友的副導演林明峰，干單會當佇邊仔為伊流凊汗，偆的啥物攏無法度替伊發落。
彼日，自早起9點半開機，一直到甲日落西山，干單完成五個鏡頭。收工了後，導演楊如霜共白銀喚來面頭前，「盈暗9點，過來我房間，我會好好仔教妳按怎搬戲。」
鴻飛電影公司共紅葉大旅社二、三樓規個租落來。唯一樓大廳跁（peh）起哩二樓，倒手爿內底面算起是201到206房，導演楊如霜蹛201房、第一女主角白銀蹛202房、製片鄭春景蹛203房、第二女主角王陵蹛204房、男主角黃金蹛205房、副導演林明峰佮攝影師張明泰蹛206房，其他工作人員、演員蹛二樓正手爿彼6間房佮三樓。
想著干單欲去隔壁佮導演磨鍊演技，白銀面裡簡單畫薄粧，穿一領白色印Hello Kitty的T-shirt佮烏色的短褲節仔。暗時9點一到，伊行出202房去挵隔壁201房間門，「門無鎖，家己入來。」白銀聽著楊如霜唯房間內發出聲說。行入房內，看著楊如霜赤身露體，干單偆一領內底褲坐咧眠床頭，白銀大嘴開hā-hā。「平平查某人，妳是咧驚啥？過來我遮。」楊如霜用導演權威的喟口命令白銀，白銀行偎眠床頭，坐咧的楊如霜目睭視線拄好佇白銀胸坎的所在，伊看出白銀無穿奶帕仔，正手透過Hello Kitty挲白銀的奶珠，倒手揪落家己內底褲，出一下力共白銀揠（ián）倒眠床頂，伊騎踮白銀身軀頂，用伊厚閣粗的規簇烏毛去磨白銀疏朗的幼毛，動作看起來袂輸人咧挨（e）粿，白銀的洞門傳來一陣一陣癢癢瘴（tsiūnn）瘴的感覺。舞弄規半點鐘楊如霜夠喟了後，伊共白銀扶起來眠床頭，「妳會當轉去矣。」
白銀衫褲long好，拍開淡薄仔門縫偷siam，看著一身矮肥短的背影，匿匿tshih-tshih趖入204房。
11.
檢采經過導演楊如霜彼暗眠床頂的調教，加上成做第一女主角的尊嚴，面底皮袂使凊采予人撣咧塗跤蹋（lap），白銀規個人突然間假若脫胎換骨仝款，佇續落來拍片的過程裡，伊的表現愈來愈好，無親像進前捷捷NG，毋管聲音、表情攏展現出一粒一的演員該當有的生張，眾人是呵咾甲會觸（tak）舌。佇武俠動作方面，個性好強毋認輸的白銀，要求所有鏡頭真拄真，本人親身上場無欲替身演員代打，所致，佇套招過程裡，無論拍甲烏青凝血、受傷破皮、痠骨腀疼骨節，伊攏毋捌哼甲半聲。
除了白銀本人的頂真拍拚以外，因為製片鄭春景的媒體關係佳易（ia̍h），不管時都挺（thìng）好看著關係《王城落日》的放送。開始拍片大概兩月日跤兜，白銀就唯一位電影界新人成做街頭巷尾通人知的明星。
佇影藝界，確實人一下紅是非就隨綴咧來。無偌久，白銀就變做一日到暗專摀（Óo）藝人臭粒仔疕（phí）的週刊封面主角，內文寫甲風聲謗影，講白銀這位無人捌的新鳥仔，會佇遐呢短的時間內就大紅，誠有可能被電影公司有力人士睏過，寫甲袂輸記者親目睭看著怹佇房間仔底所做的代誌仝款。
閣講有一位袂使透露身分的秘密證人共怹掛保證，捌看過白銀佮《王城落日》男主角黃金手牽手唯賓館行出來。不而過，這篇佔6頁的專題報導，自頭至尾干單刊白銀、黃金的個人大頭相佮幾張電影公司提供的片花。
針對彼篇影響藝人名聲的報導，白銀本人攏無一絲仔回應，黃金透過經紀人表示會保留法律追訴權。
有一站，下港氣候無穩定。大雨捙桶倒。
製片鄭春景規氣放逐家一禮拜的假，大部分的人攏離開蹛幾落月日，蹛甲強欲生菇、臭殕（phú）的紅葉大旅社。
一聽著放假，林明峰行李揹咧，頭一個離開旅社。
當等李小青物件款好，想欲揣林明峰同齊轉去北地，伊的手機仔煞關機收袂著信號。
葉春景行出203想欲載李小青，看隔壁202房間門開開，內底無半個人影。伊當欲挵204房間門，潘惠珠拄好行出來，共伊使（sái）一個目尾，綴伊落樓梯。行到旅社門嘴，葉春景看著一台黃色計程仔拄駛走，雖然看無真車內坐啥人，不而過，伊用跤頭趺想嘛知是黃金佮李小青。
第二工早起，李小青坐一台計程仔轉到伊佮林明峰作伙蹛三冬外的稅厝徛。佇樓跤，伊無看著彼台林明峰惜命命的Vespa，跁起樓頂，共行李囥落塗跤的同時，伊的目尾影著桌頂囥一封批，批殼頂面干單三字「予小青」，抽出批紙，李小青那看那讀出聲：
Dear小青：
妳看著這張批的時，我已經離開有咱濟濟共同記智的愛岫。
妳毋免傷心，嘛毋免走揣我。
經過這段日子的拍拚，妳成做人人欣慕的大明星白銀。我想，應該有達到妳當初的夢想才對。
因為合約的緣故，妳我雖然逐日見面，佇仝一個團隊工作，煞無論片場內外攏袂得有甜蜜的互動。
最近關係妳的代誌夆傳甲風聲謗影，我無想欲窮究事實的是是非非，干單向望妳愛保惜家己。
我做代誌毋是一個有頭無尾的人，假期一結束，我相像會轉去片場佮逐家作伙拍拚。
愛妳的明峰 筆
讀完林明峰的批，李小青早就滿面珠淚。
12.
下晡4點半較加，近黃昏。
福爾摩莎電影城內面，《王城落日》殺青戲自早起9點開機到今，只偆最後一個鏡頭，就會當開香檳慶祝，正式進入後製期。
花月紅佮穆悲秋兩人長期為欲得著鄭經的疼愛，明爭暗鬥一直無斷。這日，穆悲秋發戰帖予花月紅，招伊佇承天府郊外決戰，拍一個你死我活。雙人品好袂使提刀劍佮任何傢俬，一切以赤手空拳輸贏。
最後這個鏡頭，就是花月紅佮穆悲秋大戰數十回合了後，穆悲秋用盡所有喟力拍出順風掌，花月紅一時袂赴閃避，予順風掌傷著要害。
這個鏡頭佇導演楊如霜的要求下，必須愛有爆破的效果。為著保護搬演花月紅的白銀安全，爆破小組事先檢查安裝佇白銀身軀頂的爆破點幾落遍，一再確認無問題了後，導演才下令正式開機。
「五、四、三、二，Action！」聽著導演號令，爆破小組引灼爆破點，雄雄透一陣大風，風勢予原底爆破所產生的小火星湠開，一目睨的時間，白銀規個倒爿頂半身佮半爿面灼火，現場所有的人驚甲大嘴開開，場務組趕緊提滅火機拍火，等火拍化，爆破小組組長謝清安緊抱起受傷的白銀，飛車載白銀佮伊的私人助理劉淑君作伙趕去奇美病院。
原底眾人歡頭喜面拍算開香檳慶祝《王城落日》殺青，想袂到無事無白發生這款悲劇，慶祝的代誌只好按下。
雖然，自拍片以來，成做白銀的李小青除了空課上的接觸以外，伊佮林明峰就罕咧互動。閣再加上進前遐風聲謗影的代誌，怹兩人之間的距離假若愈來愈遠。不而過，林明峰看著相愛幾落冬的愛人仔佇面頭前受傷，伊的心肝親像刀咧捼（ui）仝款，伊偌呢向望受傷的人是伊家己。
李小青蹛院了後，製片鄭春景、導演楊如霜、男主角黃金遮的前後睏過伊的人，無甲一個踏跤到。干單鄭春景喚執行製片吳天良代表鴻飛電影公司，送10箍慰問金去病院，由李小青的助理劉淑君代收。
彼暗，林明峰隨閘計程仔趕去奇美病院，佮劉淑君暝日輪流照顧皮膚二度燒傷、猶昏迷不醒的李小青。
隔轉工欲暗，昏迷一日搭搭的李小青沓沓仔擘開目睭，看著坐踮病床邊的林明峰牽伊的手，兩畷目屎無聲湍流。
閣過一日，李小青的精神有較清彩，伊對助理劉淑君講：「淑君，妳看我變甲這款形，就準講會復原嘛袂完全，以後恐驚無法度閣倩（tshiànn）妳做我的助理，電影公司送來彼10萬箍妳提去，當做是我予妳的遣散費。多謝妳這幾月日來的照顧，嘛祝福妳早日揣著理想的頭路。」
「小青姊仔，」劉淑君目屎流目屎滴，「妳已經對我有夠好，按呢哪會好意思？」
「淑君，共錢提轉去，若無我會受氣，」李小青口氣堅決，「自即馬起，留明峰一人踮遮照顧我就會使。」
13.
經過奇美病院專業醫師兩擺植皮手術，猶閣有林明峰的愛心看顧。一月日後，李小青正式辦出院。
雙人相招上北，分別向厝頭家退掉稅厝徛。佇離開作伙蹛幾落冬的愛岫進前，林明峰向李小青求婚，李小青目箍紅、小可躊躇，「明峰，我變甲按呢，你閣無棄嫌我，我實在誠感動。毋過，我驚會拖累你。」
「小青，我愛妳的人，毋是愛妳的外表，無論妳變甲按怎，永遠攏是我的媠某。」林明峰堅定的愛，最後溶化李小青的心。
李小青接受林明峰的求婚了後，決心離開紅塵萬丈的大都市，綴林明峰轉去故鄉恆春小鎮。怹共拍片趁的錢提一部分出來，佇西門城邊仔租一間店面，作伙經營「青峰影音店」。
半冬後，《王城落日》佇全台灣各大都市的戲院搬演，成月日的檔期結束了後，票房衝破兩億。
閣過三月日，《王城落日》的DVD上市，佇無半間電影院的恆春小鎮嘛會當看著。「青峰影音店」一睏頭進12枝DVD，無到一禮拜就予人客租了了。逐家看煞攏呵咾女主角的演技一度（it-tó）讚，不而過，自頭至尾無人看出來，「青峰影音店」彼位倒爿面裡有一跡傷疽（khī）的頭家娘，正正就是創造《王城落日》兩億票房的女主角白銀。
——2011.8.26寫佇赤崁南門仔
2011.10.18-28《台灣時報》副刊連載
文章定位：
