──記人格者謝緯醫師
Tī Formosa台灣，在來醫生tiàm社會上tio̍h特別受一般人欣慕kap敬重，因為醫生是一款地位kap財富ê象徵。世俗ê序大苦bē得家己ê囝兒序細ē-tàng成做醫生，趁錢若趁水，一世人榮華富貴，致蔭kui家大細，hō͘鄉里o-ló比大頭拇。
不而過，世間總是有極其少數ê人格者無為名、無為利，做別人無ài做的khang-khùe，行別人bē giàn行ê路。親像「台灣新文學之父」賴和（1894-1943）先，就是會hō͘我比大頭拇ê第一個人選；伊m̄-nā tī日本人ê天年，以文學創作kap參與社會、政治運動對抗統治者khiā旗造反，尚且，tī伊ê本業醫生做了koh khah會起，伊tiāⁿ-tiāⁿ tī咱人29暝，kā一冬來散良人所欠ê siàu單放火燒掉，按呢做，m̄-nā燒掉伊ê收入，koh khah燒出人格者ê光輝，莫怪會hō͘當地鄉親尊稱做「彰化媽祖」。另外，hông號做「烏腳病患之父」ê王金河（1916-）醫師，mā thìng好講是一位典型ê人格者，伊無掛意世俗ê名利，kap牽手毛碧梅女士kui心照顧北門、學甲、布袋、義竹四個鄉鎮生「烏乾蛇」ê烏腳病患者；伊m̄-nā親手為in鋸腳，tú tio̍h患者空嘴流siôⁿ生蟲，伊仝款好禮a kā蟲giáuⁿ出來，減輕患者ê痛苦，甚至koh進一步āiⁿ行動無利便ê患者去換藥á kap做禮拜，這款疼心世間少人有；伊ê故事後來hông寫做小說〈一隻鳥仔哮啾啾〉，mā改編做影戲，得tio̍h不止a濟ê pho̍k-á聲。
Kap王金河醫師tâng年，sio-siāng出身東京醫大ê謝緯（1916-1970）醫師，hông號做「台灣ê Schweitzer（史懷哲）」，是一位標準奉獻型ê人格者，伊參王醫師仝款是烏腳病患者ê救命恩情人。Kiám-chhái現此時ê社會，知影謝緯醫師ê人已經chiâⁿ少，he是因為伊1970年tio̍h來過身，tī世間kan-nā 54冬ê歲壽。其實，人ê生命無論長短，要緊是ē-tàng活出光彩，一個人在生ê時做人kám有四正，四枝釘á tèng落才知輸贏。1970年6月22，謝緯醫師ê追思禮拜式堂頂，量約有3000個民眾自願來送伊行最後一程，教堂外ê埕斗e-e陣陣，其中，在生ê時受伊照顧過ê原住民佔有三分一。五日前，謝緯醫師tī伊創設ê埔里基督教病院工作kui早起，中晝轉到厝裡，隨接手替換家後楊瓊英醫師，tī家己開ê 大同病院看診，食飽晝sió bî一下了後，隨beh koh去二林kā患者看病。伊離開牽手ê最後一句話，原在iáu 是leh關心病人，的確是仁慈ê醫者本色：「我ài tī兩點進前到二林。我若慢到一分鐘，病人tio̍h加受一分鐘ê痛苦。我bē-tàng hō͘病人加受一分鐘ê痛苦。」Kiám-chhái因為謝緯醫師長期操勞過頭，心心念念攏是患者ê身苦病疼，m̄甘加開一分鐘管顧家己ê健康，所致，1970年6月17 hit個氣候àu-hip ê下晡時，伊才會無張無tî、無話無句，hiông-hiông發生車e̍h意外來過身。
64冬後ê熱人暗頭á，我tī日光燈腳，觀看1945年11月17謝緯kap楊瓊英tī日本hip ê結婚相，m̄管按怎看四角框裡ê男女主角，ùi in面裡散發出來ê氣質，絕對m̄是kan-nā「查甫緣投、查某sùi」這幾字ē-tàng說盡。Khǹg tī《謝緯和他的時代》（謝大立著，2001.4人光）p15，結婚相倒手pêng hit張koh khah少年時chūn hip ê相，ùi謝緯ê眼神，我kan-nā看出「堅定」兩字。
工作上很久沒來北門，今天烏腳病以外有三個開刀，以後若有會議不能來時，需要變更時間，盡量要來北門，因為感覺這地方需要我。自從和孫牧師娘、王醫師合作這工作，已經十年了，社會對於烏腳病才漸漸有認識，政府的援助，無論建設方面，醫藥補助方面也有進步，我想上帝帶領讓我們經過最困難的時期了。
頂面是謝緯醫師1970年1月29、過身進前五月日kha-tau所寫ê日記。Ùi hit內面，hō͘人深深感受伊對北門嶼烏腳病患者致意ê程度。事實上，謝緯m̄-nā是一位慈悲眾生ê醫師，同時，伊mā是一位信仰堅定ê牧師。這ùi伊出身基督教家庭，尚且，koh tī台南神學院接受神學專業訓練ê造就tio̍h ē-tàng理解。Tī台南神學院讀冊期間，謝緯受史懷哲（Albert Schweitzer，1875-1965）、巴克禮（Thomas Barclay，1849-1935）、賀川豐彥（Kagawa Toyohiko，1888-1960）chia-ê宣教師chiâⁿ深ê影響，mā為伊後來ê信仰phah落不止a在ê根基。謝緯一生積極投入教會ê事工，重要ê成就有：促成「台灣教會青年團契」kap「台灣基督長老教會總會」ê成立。雖bóng，伊在來做代誌只求犧牲奉獻，m̄-bat想過為本身爭取任何ê名聲、地位，不而過，上帝目睭看現現，siáⁿ人真心付出總是bē走閃lih，1969年2月，謝緯終其尾iáu是當選台灣基督長老教會總會第十六屆ê議長。
論真，謝緯有上界好ê勢面，ē-tàng當選南投縣長，只要伊tìm頭，無論原住民iah是平地人，濟濟人攏ē tǹg票hō͘伊，hit個時chūn無人ê票聲ē phīng伊khah好，m̄過，伊無致tio̍h大頭病，拒絕名利ê siâⁿ lāng，專心一意tī牧會kap醫療ê事工頂面。
1970年6月17 hit個氣候àu-hip ê下晡時，謝緯醫師發生車e̍h過身ê消息，目nih a久隨傳phiàn kui個南投鎮。Ta̍k個人ê心肝頭攏tah一têng濛霧，目屎四湳垂，無為siáⁿ，kan-nā因為謝緯是一位無私心、無顧一切犧牲奉獻ê人格者。
伊ê真愛，的確ē繼續流湠落去。
一代傳一代。
──2009.7.1寫佇赤崁米街
2009.8.30《台灣教會公報》3000期
「公報3000，感恩無限」徵文台語組第三名
文章定位：
