──讀楊焜顯台語詩集《磺溪水流過半線天》
台語文學kiám-tshái khah歹命底，在來猶毋捌真真正正hông寫做史冊。不而過，台語文學史的分期，前到tann一直攏有專家、學者咧致重。親像林央敏kā 1996年以後定位做「台語文學生湠期」，蔣為文kā 2000年以後定位做「台語文學ê正名期」。無論以佗一款標準來看，2000年跤兜開始寫作、2005年以後才khah大量發表台語詩的楊焜顯，攏該當被列入台語文學的新世代。
老實講，2006年進前，筆者並無看好楊焜顯。安呢講，毋是看伊無目地，mā毋是認為伊無半點才情踮台語文壇徛起。初期，伊佮包含筆者在內的袂少新手仝款，筆sa咧真自然寫出音韻鬥句的台語詩。音韻鬥句毋是歹代，不而過，若欲怪就ài怪台語自然生tsiânn的音韻特質，使得濟濟人佇不知不覺當中，寫出詩句押韻，毋過詩質淺薄的台語詩。其實，頂面講遮的話，並毋是咧khàng台語文學的臭粒仔phí，筆者認為致覺家己作品寫了無好勢，絕對是一tsân好代誌。經過這個自覺的過程，無論對規個台語文壇，抑是對作者個人來講，攏是成長大漢的好機會。
楊焜顯正正就是對家己作品有自覺的創作者。2005年以後，楊焜顯進入彰化師大台灣文學所讀碩士，伊m̄-nā無親像有的作家入去學院讀冊了後，作品的量佮質自然減少，顛倒佇遐吸收袂少營養分，tsiânn做創作的肥底。咱ùi伊的頭一本台語詩集《磺溪水流過半線天》（彰化縣文化局出版，2008年8月）內底，「卷一、鄉情系列」、「卷四、碑情系列」的部分詩作，會當看出伊佮早前音韻鬥句的時期有tsiânn大的轉變。除了提煉詩質的功力大大進步以外，伊mā有才調處理歷史的題材，寫出幾lo̍h首四、五十tsūa以上的長詩。若kan-nā ùi遮的有歷史厚度的長詩來看，楊焜顯的詩質已經無輸予現步台語詩壇的大部分寫手。
宋澤萊佇伊的評論文章裡，m̄-nā一擺講著300年來台灣文學的演變歷程。伊kā分做五個時期。Ùi郁永河進入台灣開始，一直到鄭用錫中進士為止，這 120年的清領前期號做「傳奇時代」；鄭用錫中進士，到1895年日本人完全控制台灣為止，這70年的清領後期，號做「田園詩時代」；ùi日本控制台灣到1945年離開台灣為止，這50年的日治時期，號做「悲劇時代」；ùi日本人離開台灣到20世紀尾，這50年的國民黨統治時代號做「諷刺時代」；ùi世紀尾國民黨失去政權前後，台灣又閣返頭進入「新傳奇時代」。
宋澤萊對台灣文學演變歷程的分期，咱先暫且莫論是毋是有合理？按照伊的評論〈評陳金順的〈開置街頭的含笑花〉及林央敏的〈蓮花火穎〉〉的標準來看，伊kā這二首詩定位做「新傳奇文學」。伊認為作者書寫新傳奇文學是「塑造英雄的目的是作者想向這個英雄做認同，或者勸讀者向這個英雄做認同。」若安呢，楊焜顯用79 tsūa的長度書寫二林喜樂保育院創辦人Ms Joyce Mcmillan的〈湊跤手的外國媽祖〉，絕對會當tsiânn做「新傳奇文學」的範例：
妳牽島嶼的好跤好手來湊跤手∕湊一雙過一雙上帝應允鐵拍的跤手
妳倒手牽起補破網∕正手挽回望春風∕貼心扭著千千萬萬雙手∕手傳天國靈聖的光輝（節錄）
頂面這首〈湊跤手的外國媽祖〉入選《2006台語文學選》（府城舊冊店出版，陳金順．施俊州主選），的確是一首作者超越過去之作。經過這首長詩的鍛煉了後，楊焜顯的詩風規個脫胎換骨，對詩的語言佮美學的掌握，mā作一下熟手起來。
另外一首〈意樓望海的聲說〉「借用小敍述的模式來回顧鹿港意樓的純情女子的癡情、失落。癡情女子、無望的等待若換做台灣這個角色來看，敢毋是也真對同。『意樓望海的聲說』也就是『福爾摩沙望海的身影』，是欲就安呢無聲無說慢慢老去，抑是重新創作新的性命？」這首詩入選《2007台語文學選》（金安出版，方耀乾．林文平主選），ùi主選者的編選報告裡，thang看出詩類kan-na入選9首，phīng頂年度的15首閣khah嚴格。咱來讀看覓到底是啥物款的等待，會予意樓的女子tsiah-ni̍h失落：
窗仔邊空等，楊桃樹葉∕青佇早春，黃過深秋∕中秋餅圓過遠在天邊的月娘∕焦冬節意樓的紅圓仔冷身∕澹過年骨頭強欲酥去囉，思君∕空岫，無緣做娘無孫做媽做祖（節錄）
天地思戀望海的目箍內∕海湧湧來湧去無永遠∕手刻的柴佛像鎮殿∕笑文文來觀世音∕空思夢想∕無聲無說（節錄）
平平咧寫石碑，〈悲曲〉裡鹿港的古石碑「刻佇過鹹水的泉州青斗石」，因為「時間的承包商偷工減料」，suah來害伊「無聲無說」、孤孤單單「恬靜坐佇舊街仔斡角」；ah若〈碑傷〉裡tshāi踮彰化城的日本石碑，儘管bat「佇山林市街展天皇的派頭」，不而過，三年一閏好歹照輪，「赤焱焱的明治大正昭和」，終其尾iau是行到北仔尾，顛倒予íng過看無目地的「滿地紅的砲仔紙喝咻」。
除去頂面書寫著的二林喜樂保育院創辦人Ms Joyce Mcmillan，楊焜顯書寫人物詩的才情mā展現佇〈鼻舊相片的茶葉衝芳〉（陳澄波）、〈予烏山頭發光的八田頭〉（八田與一）、〈意難忘的清水蔡鐵生〉（蔡惠如）遮的詩篇頂頭。特別是書寫台灣新文學之父賴和的〈前進的跤步聲〉，kā伊佇七、八十冬前創作的篇章做一擺有機的巡禮，無論巡查大人安怎tsau-that、凌治，賴和先原在kā拗斷的秤仔「削做一枝在地的史筆∕一字一句刻寫抵殖民的大河史詩」。
透過《磺溪水流過半線天》的出版，楊焜顯thìng好講正式取得台語詩壇的入門票。現此時當咧研究「戰後台語詩創作」相關議題的楊焜顯，向望伊量早完成論文的寫作，當伊戴彼頂碩士帽仔的時，mā是伊ài趕緊倒轉來創作有思想深度、歷史厚度的台語詩的歷史時刻。
為伊個人，mā為一向徛踮邊緣戰鬥位置的台語文壇。
──2008.12.1寫佇赤崁米街
2009.6《海翁台語文教學季刊》第四期
文章定位：
