古錐的所在 陳潔民的台語文學網站

233愛的鼓勵 0訂閱站台

【台語散文詩】

曝／陳潔民

咱曝靈魂，無曝日頭。

咱曝精神，無曝月光。

是安怎祖先留落來的遺訓，你攏總放未記；免講祖先的精神，嘛失去了你寶貴的靈魂。

冰寒的冬天，看未到台灣溫暖的日頭。所以，咱惟傷痕累累的蘭嶼，坐船，來凱達格蘭大道曝咱的靈魂。

烏暗的太平洋，開始唱彼條悲傷的歌。所以，咱惟未來可能會永遠失去貞節的東海岸，坐火車，來凱達格蘭大道曝咱的精神。

大鳳蝶帶著伊翅鼓頂面最後的光榮，陪伴蘭嶼的海風，佇藍甲無程無度的天頂，舞動伊的熱情，曝伊的天真。

達悟人傳說中的飛魚，已經因為文明的壓迫，佇運送核廢料的紅頭碼頭，哭紅伊青瞑的目睭，曝伊的遺憾。

咱曝靈魂，無日頭通曝。咱曝精神，無月光通曝。

咱紅紅的目睭，摻紅紅的血絲，流白白的目屎，曝咱彼部可憐的台灣史。

－－寫佇半線，2011.10.20初稿，2012.1.6定稿　

　　刊於台文戰線2012.04.第26號