古錐的所在 陳潔民的台語文學網站

233愛的鼓勵 0訂閱站台

（台語散文）另工／陳潔民　

學校的樹仔青青，鳳凰花紅紅，金黃的阿勃勒嘛開甲真鬧熱的款。若欲轉去看你，敢猶有另外一工？

錯過因緣，咱這世人可能無機會，轉去彼个原點，重新來過。錯過因緣，咱總算了解，人生無常，學會曉恬恬接受。

以前，咱是驚見老師的人。怹心目中的咱，聰明乖巧，是怹用心沃過水、掖過肥的幼穎。咱應該親像怹的期待，一工一工大漢，變成一欉大樹仔。毋過，咱無。

咱佇社會上過了無好，無啥物大出脫。欲用啥物面，轉去母校，佮老師報告咱佇佗位做啥？咱共老師講：「另工，才揣時間轉去看你。」這句話變成空殼支票，永遠無機會佇消失的時光銀行兌現矣。

新聞逐工一直重播，日本大地動的畫面，一張一張，烏白相片的定格。咱深深感受無常的壓迫，悲心升起來，目屎一滴一滴滑落。

無應該有人講「報應」，佇眾生受傷的孔喙頭頂抹鹽；無應該有人看人痛苦，無要無緊、責備恥笑。敢無應該感同身受、將心比心？無緣大慈，同體大悲。

「救苦救難的是菩薩，受苦受難的是大菩薩。」聖嚴法師講過這句話。怹用怹的苦難，予咱知影珍惜身邊的幸福，敢無應該感謝怹的示現？珍惜當下，性命無常，咱愛善待所愛的人。災難一過，逐家是毋是又閣沓沓仔未記得？災區重建，有身的婦女、抱著新生紅嬰仔的老人，面對過去的傷心，仝款堅強，充滿希望，樂觀看待未來。

每一个人，會重新轉去生活，仝款為開門的七件代誌，勞碌家己的身軀。未記得家己的心靈需要喘氣，繼續柴頭彼一款，無注意身邊愛你的人。

「導師，另工我去看你。」我佇電話中講。講到這馬，猶未去看你。你竟然雄雄破病，走去迢遠的天國旅行矣！

「國文老師，另工我揣同學轉來看你。」嘛無想到，你竟然一退休，就去深山林內，某一間清靜的佛寺出家矣。

「另工」，就是毋知佗一工。我講的「另工」，無機會實現。導師和阮天人永隔，國文老師和阮變成方內方外，生活佇兩種無仝款的世界。

老師，我真正毋知影欲去佗位看你矣！－－欲按怎去彌補這種失約？

 敢猶有另外一工？

 

 －－寫佇半線，2011.05.30

──刊佇《海翁台語文學》第115期，2011.07