接著,我已經捕捉到佢地既游說方法,就係要一個人吹完水之後,xxx就會拖延時間,等到下一條粉腸過黎吹,今次黎咗個城大畢業生,屋企好窮,老豆抄爖股,欠債廿七萬,全家有六個人要養(包括佢自己),個女仔講到以前好鬼慘情,我的確相信佢講既野係真,因爲實在一啲都唔出奇,既然個度專係收留啲窮人同埋貪圖富貴既人,咁好自然啲已經走投無路同埋鐘意見到自己個戶口數字不斷上升既人會係個度出現,當然你可以話眼光短淺,佢地話得我好啱,但係鐘意同唔鐘意係冇得強求,同埋實在有太多原因我唔想係個度做囉!!講真我個人都幾鐘意$$,但唔會出晒面,我要揾既係我既興趣於我既工作裡面,務求一舉兩得,所以我好憎前一條粉腸所講既野,佢都係其中一個原因我唔想係到做,啲人講野大言不慚,不知所謂. 講返個女仔,其實佢無得選擇同要養家,佢做得黎當然好,但都唔關我事,所以我都唔會被佢說到. 佢地成班粉腸輪住黎講,我知佢地已經好冇癮,我又唔俾反應,又得個'唔'字,我已經打咗好幾次喊露(唔開口個隻),我全程向下望好尷尬. 佢講完後,xxx同之後一樣'踏波鐘',幾個字,我終於講咗個大話,我話約咗個朋友拎野俾佢,佢話呢度返美孚好快既啫!我就話唔得啦,個Friend特登上埋我屋企到攞!(其實我講個大話好鬼'Yup',同埋開始語無倫次,我諗佢已經一早知道唔係真,因爲眼神係好容易出賣人,而且佢幾聰明,呢點我好清楚,由佢開始講野完全無表露自己所做既工,同過往八年內所發生既事,雖然大概知道outline,但detail佢一啲都無交代過,佢收得好密!).
我當然不斷嚷著要走,佢無可奈何帶我走,跟住讀翻譯個個女仔又帶住個三五識七既人黎,佢話聽埋先啦,我都照聽,臨走時仲交換電話,唉!是但,反正我唔識得拒絶人,於是俾佢,我要心諗住我一定唔會接你電話,(由於我係個唔識拒絶人既人,所以我一直都覺得自己係個日極度低b,明明唔鐘意聽都照聽,仲要拖我幾個鐘,真係覺得自己好唔掂!) 終於可以落到地鐵站,讀翻譯既女仔同xxx帶我落去,踏電梯既時候反而傾偈輕鬆,完全判若兩人(我),走既時候佢地話聽日有個course可以上黎聽,佢地當然有叫我去,唔使$$,我仲白痴到臨走時仲問佢地關於呢件事既問題,好明顥佢地話我仲未知到究竟公司運作係掂,我問極佢地都唔答,仲話聽日上度咪知囉!!
落到月台,我終於忍唔住打電話Elaine,講返件事俾佢知,我一路傾一路腳振,同佢傾咗好鬼耐電話,傾到去美孚站,事關我問佢有冇辦法可以點講我聽日唔去聽個course,佢地一定會揾我,仲覺得佢地會輪流打電話俾我.
後記:個晚之後,我真係覺得xxx唔簡單,佢好突然咁話揾返我地去探先生,連Elaine都覺得古怪,好揀唔揀係要今年,好明顯佢係揾唔到Friend同佢夾份做生意,所以再揾下有冇得選擇,呢個人深藏不露,仲要好明顯佢係由一個女仔變成男仔打扮已經好有問題,我好肯定佢變成咁係後天所引起,當日佢帶我上去公司度,我見佢著住套西裝,真係成個男仔,想人唔話佢係TB都唔得,有啲似變態色狼,佢就連動作都變得好男仔,當第一次聚會個日第一次見到佢,佢話我好斯文,我話唔係啩(我完全唔覺得),我只不過著住T-shirt, 鬆身褲,就係之嘛,咁都可以被到佢暇想!!仲有我覺得呢門生意根本就無得做,主要一樣係競爭太大,係咁依search下yahoo auction,已經出咗好多Lampe Berger(亮碧思)既產品,仲要賤價賣出,我知呢件咁既野都成$1000幾蚊,auction咁平都冇人買,更何況你去sell正價貨品,會唔會有人咁傻呢?唔好唔記得,佢已經有百幾年歷史,sell呢個產品既人大大話話全球至少估計都有萬幾人,講翻單講商機,呢一刻可能好需要,咁淡市又點樣呢!仲要如果我拍住佢初到貴景,想同啲熟行競爭,根本即係要我地行阿爾卑斯山山頂咁難,費用唔止$5000專利費,揾宣傳揾人做網呢啲唔使本咩?至少都萬幾蚊倒落鹹水海,仲要唔知有冇得賺,肯定蝕到扒街,唔好講少啦想賺幾十萬封爵位,保險人人都會買既都唔見佢地發既,大家唔覺得有問題咩,保險自古係埃及創先河都要求變啦,仲要一間公司,賣來賣去都係幾種產品,不斷換包裝,涵唔會變個隻,好講真呢隻野真係好賺$$,但咪就係要你地呢班人,適者生存,爲它而拼死活而得出黎既結果,爭個夠,就係爲咗會翻單同潛在顧客,人數根本唔夠分俾咁多人食,仲有可能一個已經食咗好多客,淨返啲豬頭骨係度,呢款產品咁出名,潛在顧客都揾得七七八八啦!!想要豬頭骨都好難.....
文章定位：
