前言：我要為我0既第一次網聚留一次最真真，最活生生0既記錄～
猶記得果日-----
除左甘草師父同晴雨姑娘，殭屍仔同大家都係第一次見面，所以當日我係懷住戰戰兢兢、忐忑不安0既心情走到集合地點．．．．
「嘩～陣間如果師父同晴雨都未唻．．．咁我點算呀？！！」一邊行一邊喃喃自語，好似換唻過途人一D又同情又驚恐0既目光．．．．．
終於～當我見到集合地點時，雙眼同時亦望到我0既希望同曙光～～
「師父～！！」無錯，師父已經到左，仲同一個外表成熟而帶點斯文0既男子傾緊，但我應該點稱呼呢位前輩呢？
「呢個係酒酒．．．」好一個師父，對徒兒真係細心，當晚佢就係咁不斷地做我0既介紹人。
「下～～～～？！！」大家唔好誤會，酒酒大名我唔係未聽過，只係好難想像而家丐幫個幫主竟然咁身光頸靚．．．．連原來丐幫標準果把又長又打結0既頭髮都改為短髮，想唻酒酒對丐幫的確大有所為～～
「下～～～？！！」酒酒見到我，又係好出奇，「乜赤井係．．．女仔．．唻ga？！」
原來又係呢個問題．．．．．或者，下次網聚我會著裙．．．．．．
無幾耐，我見到大家口中0既初初～～
「嘩～！」大家話初初變靚左，係唔係我真係唔知，不過響我眼裡，又真係打破左有一位阿Sir講過「有知識就無姿色」0既定理．．．．不過～當日在場0既人個個都套唔入呢條定理,所以我決定咬死坤我果位阿Sir。
然後～大家繼續等待，因為我之前晨早去左登高，行左大半日，所以有ｄ呆滯。
「畀本書你睇！」突然，師父從佢身後０既百寶袋攞出一本李天命0既書，大概係用唻畀我解悶0既，殭屍仔向來有文字饑渴症，於是就一個唔客氣地刨起上唻～
又一陣，慈雲山之友阿擋終於唻到，雖然住響同一個山上，但我好似無咩見過佢。不過佢個樣，仲後生過我班同學仔～～
隨後出現係觀雲，佢個頭果然set得好行，我望一望佢又再望一望初初－－－－大家唔好誤會佢地兩個有D咩，只係我呢個新丁要再好好睇真下師父口中0既兩位駐場歌手而已～
大家又傾左一陣，之後酒酒去左問價，其他人好似有D鼓譟～～
「喂，打左畀晴雨佢地未AR？？」酒酒一問完價就非常關心佢地。
其實，大家都唔可以怪人地，銅鑼灣係一個迷宮，佢地到底出現左就得LA。
風雨出現時，大家都以為佢著0既係校服，但到底係咪呢？真係佢自己先知。晴雨一見到我招呼都唻唔切打就叫我救佢，但叫救命果個應該係我至真，因為佢當時不論身法同力度都同老笠我無咩分別～～
上到K房喇～～好彩間房0既主題公仔唔係夜光，否則就真係殭屍都畀佢嚇死。一入房，大家鬧哄哄，仲以為有得睇觀雲跳table dance，可惜佢最後都無。阿擋眼明手快地不斷點歌、唱歌，非常唔似病人，而負責燈效0既晴雨亦眼明手快咁唻一個black out－－可憐我同初哥哥仲睇緊書．．．
後來，我畀番本書師父，開始點歌，就響我點好之時，師父口中好變態0既黓霧出現喇～
「嘩～！」又係聲嘩然，佢果種氣．．．直逼千年女王！仲即時惹唻三隻小鬼竊竊私語，想將佢據為己有咁話～（觀雲要小心喇～！）不過，話明小鬼，梗係唔會有所行動啦～
「你係赤井銘之！」黓霧竟然知我係邊個～！真係開心，想我當初響詩樂園丟人現眼時，就係得佢同師父鼓勵。呢一剎那，真係令我感動到眼有淚光。
「我仲以為係男仔．．．．．．」隱約地，一句好熟0既說話從黓霧口中吐出。
唉～～～
終於到我0既例牌歌《我要我們在一起》喇，唱0既時候不但只大家，連我都真係慄左一慄，因為似乎無人預我會唱D咁靜0既歌，大家好似未接受我係女仔0既事實，well～～多謝大家畀面，我第一次得到咁多掌聲，搞到我好想玩singing contest V.V。
不過，自己唱，點都無聽人唱做下、fans咁好玩。原來勞工處真係有請職業fans呢回事ga！睇唻仲養活左好多人添。
都唔知幾時，我同晴雨就開始左角力賽，但係為d咩呢？抱歉又真係唔記得（晴雨，記得請回話），我只記得佢比藤條粗少少咁多0既四肢原來都孔武有力，身形就唻係佢一倍0既我同佢真係難分高下，都唔知係咪我怕整斷佢D手手腳腳所以留力，諗諗下，前排打風吹佢唔走都唔知係好彩定唔好彩，不過我最興幸的就係我初識0既晴雨唔係咁獸，否則我真係要訂多幾棵柳州木．．．．．．
「我一定要學琴。」過左一陣，我又懷疑自己幻聽，於是同風雨一齊研究點樣將中樂同西樂玩到一個出神入化0既最高境界。例如將琵琶當結他、二胡當小提琴等，果然係世外高人，我真係好想見識見識。
直到食完dinner，師父同酒酒0既大戰正式開始。師父，徒兒非常支持你ga～～100%精神上支持，如假包換。記得當日，師父言教之餘，亦進行「身教」－－－人善被人欺，我明ga，到我做人阿媽時，個女唔聽話我一定會一大巴扯過去．．．．．．
不得不提0既，就係好可憐0既病人阿擋，佢差D變為無証居民，我都算係睇住佢送羊入虎口喇～～不過阿擋大概下次會唱《小心女人》ga la～今次，就係經一事，長一智啦～～（共勉之！）
酒酒同師父0既大戰，真係聞者傷心，好彩，小風、阿擋都陸陸續續加入大戰。
「徒弟，你又玩啦，輸左我幫你頂！」師父0既豪氣真係令我感動，不過殭屍仔身為一個猜小明都輸0既白癡，仲點可以令師父塊面紅上加紅呢～～師父，都係果一句啦，如果唔係第日要返學，我一定借你幾杯唻飲下．．．．．．
大話骰對決仍然難分難解，半打又半打啤酒響大家眼中同水無咩分別，當ko左一打啤酒後，酒酒開始打晴雨果兩支果酒主意，大戰於是暫停左一陣，我就響無人理0既情況下攞左好多個Rock杯入K房，果酒真係好飲呢，可以飲多d就好，成日有得飲就更好。師姐，我為你自豪！
正當螢光幕上出現《真的愛你》呢四個大字時，晴雨終於都表現出佢乖女0既一面，七情上面地對甘草唱出佢粗暴下0既柔情，身為徒弟0既我又點可以無表示呢？正當我打算加入唱第二段時．．．．．．
「衰女，你好即刻同我死返唻！」殭屍媽打竟然唻一個追魂call，我唯有一支箭咁標出k房，免得嚇親人。收左線，再垂頭喪氣返入房，好彩首歌仲未完，不過，點同大家告別好呢？
「徒弟仔，我就走喇！」慈雲山之友真係好，阿擋比我更早話走，唔駛我諗點開口。依依不捨地放低錢，再聽埋《新生活》，我同阿擋就踏上歸途。就到屋企時，師父打畀阿擋，又問我有無悶親，又叫我聽日畀心機返學．．．．．除左覺得佢關心徒弟之外，我仲覺得．．．．．．佢醉左。=p
唔知係師父交帶落，定係阿擋一向都係gentleman，佢竟然問駛唔駛送我返屋企，真係開心，証明響慈雲山住0既都係好人。阿擋，真係多謝晒，雖然我唔駛你送，但你0既好意，我心領喇！
後記：足足過左成個禮拜喇，但當日0既情境仍然瀝瀝在目，真係好多謝大家，我真係無悶過ga！特別鳴謝將「別有天」三個字打入我腦海0既晴雨師姐，同埋做我介紹人0既甘草師父，我赤井銘之在此發誓，永不背叛師門！如違此誓．．．．．．．．罰咩好呢？？？要諗諗，諗諗．．．
文章定位：
