好耐無寫嘢啦～啊～正確啲嚟講係好耐無寫Blog，其實好想記錄底走過嘅每一步，只係每次我都拖延症發作⋯⋯
呢個夏天雖然無好好咁去勁玩一下，不過有樣更重要嘅嘢做咗，就係陪親愛的鴨仔同宥齊大人共進午餐～當然以我呢種咁唔困得嘅人，行程一定安排得好Full咁又學PS、AI，又學UKULELE，又拉鎵惠同魚旦去教我游水啦～時間過得真係好快⋯⋯夏天話咁快就完咗⋯⋯見鴨仔個肚越來越大，我功成身退啦～雖然西瓜未扑～日出未睇到～成個夏天都無機會搵人同我做呢兩件無聊事⋯⋯咁唯有留返下一年做啦～夏天年年有～宥齊大人得一個～哈哈⋯⋯
九月我又再一次參加上年個馬交短片計劃。今次我跟劉天賜學編劇。十堂課要交一個拍得嘅劇本，基本上由第二堂開始就要交功課，故事大綱要佢過目PASS左先可以開始寫真正嘅劇本⋯⋯
由開始構思，搵資料、參考書，到真係落筆寫，醞釀咗兩三個星期⋯⋯人地話電影就係圓夢，對！今次我將我壓响心入邊好耐嘅一個遺憾變成一個故事寫咗出嚟。我嘅第一個故事要講嘅係有關自殺、遺屬、愧疚、夢想⋯⋯出發點係前三點，感覺寫出嚟，可以從中得到解脫。
自殺從來都係一個禁忌話題，剛好某日同老豆去水塘跑步，遇到前同房的媽媽，畀着早兩年我應該會扮睇唔到調頭走，今次迎面而來我有主動打招呼，佢媽媽講咗句"其實我都好想見返你"，𠴱一刻真係感慨萬千⋯⋯我唔知佢媽媽走出咗黎未⋯⋯事隔咁多年，我都係呢一兩年先有再上松山，有時我會諗起呢個我人生中嘅過客，其實我好健忘，只記得佢好少講嘢、好有性格，我問過佢"過程同結果你覺得邊樣緊要啲"，佢答我結果，最後結果係佢變咗一個响我地班同學仔心入邊永遠唔會變老嘅人⋯⋯嗰日返到屋企之後我摷返大一嗰年嘅日記出嚟睇，諗返好多大一嘅校園生活⋯⋯其實呢本日記並無我想像中咁沉重，只係因為佢出事之後我自動將有關嘅人、事、物、地方都封存咗啫⋯⋯
再然後分別同身邊嘅朋友講起"自殺"呢個話題⋯⋯好驚訝咁發現，原來好多人都有過"想死"嘅諗法，雖然我未能體會佢哋當時的心情，但係作為一個"被自殺者遺留下的人"，嗰種難以釋懷嘅心結，我好想話畀大家知，於是我開始着手構思呢個故事，朋友推介我睇一本《我是自殺者遺屬》嘅書，入邊有好多真實的案例，有兄弟姐妹、配偶、父母、醫護人員⋯⋯親述佢地失去至親之後嘅生活同點樣影響佢地嘅價值觀，原來自殺者遺屬比一般人更容易有自殺傾向，個比率我忘了，反正是個觸目驚心嘅數字。"生命如何影響生命"，可以係正面，亦可以係負面㗎。
生死嘅命題太沉重，嗰本書睇得我好壓抑（壓抑到我狂爆瘡，依家都仲食緊藥＝＿＝"），我無辦法將故事設定得太過貼近自殺者呢個角色，因為嗰種痛好難體會到同埋我根本唔想去體會，我相信太過沉重亦唔適合放入故事中，所以我以朋友嘅角度側面去寫，正好亦係我自己親身體會到的。然後故事大綱被退了好幾稿，然後我重新將故事由開始嘅沉重帶到去最後一個充滿希望嘅HAPPY ENDING，响賦予呢個故事意義嘅同時，我都慢慢諗通咗啲嘢，對我呢個唔會老嘅朋友，我亦可以真正咁放低。
路係佢自己揀嘅。雖然我地唔可以左右他人的生命，但係我地可以掌握嘅係自己嘅生活。
最後大綱終於都PASS左。然後一稿二稿三稿四稿五稿⋯⋯寫到我想嘔＠＠
今個星期日，《禁忌》終於開拍啦～呼～好期待！
好開心！！《禁忌》竟然被選上有份在文化中心"澳門製造"項目上映！辛苦曬導演同劇組工作人員，在那短短的一個月內晚晚通頂趕工完成拍攝。說真的，拍攝部分我根本幫不上什麼忙，但我看到這一班年輕人係幾咁有HREAT！故事能被拍攝出來，我其實都幾感觸，有一種可以放下的釋懷感⋯⋯很感謝！很感恩！：）
文章定位：
