自體實驗 吹時嘗試以己身進行實驗，將一套人人由細到大從益智卡通片灌輸之，但少數人會真正實行之價值觀，套用於自己身上。(假設套用方法正確) 再走入人間生態缸，在任由其他獵食者宰殺之前，作出最大反抗。 以証明自己所相信的價值觀，是我正確的選擇。 在此進行詳細紀錄，期待漫長實驗所結之果。

216愛的鼓勵 0訂閱站台

尋晚趕住貨咁節目重溫前幾日果集艾笠，佢竟然講返之前日本樂壇最風光果期既事。
原來，已經十年喇...
節目入面一響起當年既歌曲前奏，我又毛管棟喇，直頭又有d想喊既衝動...

果一期，亦都係我有意識人生既開始。因為諗返起再之前既自己，真係混下混下，成日都唔知自己做緊咩。有野令自己狂熱起黎，先至感覺到原來自己生存係呢個世界上。

十年前既我，係追偶像既妹妹仔時代，不過就比追黎明郭富城既人辛苦d遠水路d，追既係日本偶像，相川七瀨、L’Arc~en~Ciel、LUNA SEA、Puffy、持田香織、椎名林檎等。
而家可以keep住鍾意既，只有黃金年代尾聲彈出黎既椎名林檎，到左而家，愛佢更勝當年。

當年瘋狂地迷上J-POP, J-ROCK, 甚至已經同朋友仔商量好哂你學結他佢打鼓我學bass咁邊個做vocal先，但係講講下拖拖下，熱潮已經過左...
唔知如果真係有學既話，而家既我會變成點呢？

果時既夢想一齊係飛去日本睇佢地演唱會，而佢地d歌廿四小時播放，係屋企睇MV，出街就聽MD。
雖然唔知歌詞講乜，但係單憑romaji已經可以將成首歌背頌如流。就係因為當年自學romaji，為我後來學普通話拼音打好底，都有背平假名，但係到已家已經忘記得七七八八喇。

講到最瘋狂既事，就係狂洗錢。間唔中會同朋友仔一齊搭船過香港信和入貨，上網一見到新出有偶像做封面既日本雜誌，即刻個個身痕，好想好想得到，為既係成本雜誌入面果幾頁偶像專訪，慘就慘在唔識睇日文，淨係可以擁有呢輯新影既image。

d雜誌其實好貴架，日本物價已經高，仲要空運黎到，最平果本都要五十蚊(如有本叫CD DATE)，大本既最平都要一百蚊(例如有本叫b-pass)，仲有single、album、video、電視節目等，對於當時仲係初中生既我地黎講，真係傾家蕩產。

但係到我地將本雜誌或者single或者album拿到上手既時候，個人真係開心到彈起，快樂，係當年就係咁簡單既事。
而當年排版精美既日本雜誌，亦都幫我而家design仕途打好左個底，令我明白靚既雜誌同東週壺週甚至係忽然1週既分別，亦都好似因為咁，我渴望過成為一位攝影師。

果一個係無感情煩惱既時年代，唔洗擔心前途同理想，做任何發癲失禮失儀野都唔需要怕羞，唔洗擔心無男朋友無人要，未曾失去任何重要既野。每日只係同朋友仔一齊對抗敵人(學校d魔頭)，研究出貓方法，點樣係重重無聊修女規矩入面搵漏洞去反叛。

好慶幸，果個年頭，識到呢班好朋友。
好慶幸，果個年頭，我狂熱過。
好慶幸，果個年頭，我反叛過。


順帶一提，到左而家我仍然鍾意日本文化，因為我係真心欣賞而唔係潮流吹咩風就跟咩風既傻仔，所以d西洋野韓國野唔岩我。到左而家我仲想學日文架。

仲有仲有，下年就係我同朋友仔相識十週年(原來比Long Vacation遲一年)，一定要大舉慶祝一番。

「不作造夢的少女yume miru shoujo ja irarenai」
佢唱live既爆炸力，成為我跟佢幾年既原因。

不過跟既過程中，我的確發現佢有時會幾leung，不過當時瘋狂既時候係盲家嗎...
佢出得場面既image都係人地幫佢造，當無人同佢造既時候見哂底，所以除左佢既爆炸力之外，佢應該都係一個唔聰明既女人，但係熱誠佢一定有，如果唔係都唔會曾經上到位。

到左而家，拎椎名林檎同佢比好似好慘咁，但係椎名林檎的確係一個聰明、有創造力、有火又有品味既女人。