自體實驗 吹時嘗試以己身進行實驗，將一套人人由細到大從益智卡通片灌輸之，但少數人會真正實行之價值觀，套用於自己身上。(假設套用方法正確) 再走入人間生態缸，在任由其他獵食者宰殺之前，作出最大反抗。 以証明自己所相信的價值觀，是我正確的選擇。 在此進行詳細紀錄，期待漫長實驗所結之果。

216愛的鼓勵 0訂閱站台

哥哥呢兩個字，除左同我爹娘溝通期間會用到，其他餘時間都係我大佬咁叫，見到佢更加係無稱呼果隻，因為無咁既必要。
同佢講親野都係面對面又或者佢經過我面前，只要一出聲就會意會到係同佢講緊野，係無乜需要由遠處大聲講出對佢既稱呼之後等佢反應過黎既機會。

近年黎我呢個哥哥同呢個家既關係大致如此，永遠都神秘地出沒，我屋企有四個人，分左三個作息層次。
每個層次都十分浮動，係差在作息時間多定少。

每個層次既生理時鐘都唔同，自然少機會見面，雖則係生活係同一屋簷下。

而我呢個哥哥就最神秘，有時我訓果陣(可能係深夜四點，可能係朝早六點)，會仲聽到佢間房入面傳出打機既聲音，但係當我起身既時候，佢就一係唔見左人，一係閂埋房門(我估訓緊)。
如果可以咁岩見到，都係佢以九秒九既速度完成梳洗程序然後衝出門口。

又或者佢會係我間房度上網搵歌仔入落手機，佢同我既對話，就係「亞珊用唔用電腦？」
不過通常我都用，就會態度好差咁打發佢走。

其實係屋企佢佔用既範圍真係只有房同廁所，仲有路經入房既路線。
不過我爹娘都無收佢房租。

一切有關佢既消息，都係由屋企裡面負責協調關係既PR娘負責報告


真係唔知幾時開始，我同佢既勢黎個大逆轉。
以前哥哥係計我爹之後，最整齊企理果個，我就成日比佢發脾氣都唔敢出聲果隻。
但係而家，佢已經變成成間房最唔企理既冠軍(間房仲亂過我你話驚唔驚！)
而我，仲可以發返佢脾氣，態度差咁同佢講野佢都唔出聲。
有時我發完佢晦氣，我個心都有些許過意唔去，但係對於佢而家咁放棄自己，除左鄧我爹娘心痛之外，見到佢咁真係好激氣，明明一個大好青年。

哥哥，唔好怨喇，有返咁大個人，而家你個人得失既責任係歸你架喇，以前細個無自由，好多野都接觸唔到學唔到做唔到，但係而家你有自由喇，可以追返你細個缺失既野喇，求下你，快d醒，努力去追啦！


好想你可以快樂咁樣過日子。
今日你生日，我地都唔知你生日得快唔快樂，因為見唔到你，但係就算見到你，你都唔會話比我知。

好想我地可以有個靜靜地坐底傾偈既機會，但係大家一直都係度逃避。
我逃避係因為怕你尷尬會傷害你自尊，你逃避可以有好多原因，可能係你覺得我仲細唔會理解到你感受，又可能係其他啦. . . . . . .

媽咪叫我地約好時間，然後話比佢知邊日得閒，等佢可以安排好時間可以大家一齊食餐飯，因為我同你既生日好近。
唉，點解唔可以你生日食一次，我生日又食一次呢？大家真係忙得咁不可開交？