自體實驗 吹時嘗試以己身進行實驗，將一套人人由細到大從益智卡通片灌輸之，但少數人會真正實行之價值觀，套用於自己身上。(假設套用方法正確) 再走入人間生態缸，在任由其他獵食者宰殺之前，作出最大反抗。 以証明自己所相信的價值觀，是我正確的選擇。 在此進行詳細紀錄，期待漫長實驗所結之果。

216愛的鼓勵 0訂閱站台

綜合左我多位女性朋友既意見,發現男仔想要一個女朋友,其實都唔係咁難架姐,其實只不過係d好簡單既野。就等我就係呢度話過你知,大多數女仔想要個點既男朋友,又或者唔好講到男哂朋友咁,首先從點樣可以比女孩子睇上眼開始。

有風度
如果乜都比你贏哂,可能你會覺得自己好威,但係其實可能係輸緊你係女仔心目中既分數。如果輸左,最緊要係保持你既風度,唔好係度做d白痴行為,例如賴貓,又或者講一輪粗口,如果你係咁”型”既話自己一個型飽佢啦。
如果你想追女仔但係又唔捨得食一餐飯一個人比兩份錢既話,咁我勸你都係下半世都一個人食飯好過喇(超靚仔靚到等比人包既除外)。我有個朋友仔識左個新男朋友,開頭食飯都係個男仔請,某一日個男仔同個女仔講”今日係咁耐以黎你o徙得我最少錢既一日”哇~~~~~幾大侮辱呀!
如果佢覺得個女仔唔值得佢洗錢既話,咁即係佢珍惜d錢仲多過珍惜個女仔啦,就係咁,byebye。其實洗錢係女人身上就係顯示緊男人既能力,令女人有信心下半世既幸福交比佢咁解。

衣著整齊做個現代人
千祈千祈千祈,唔好個身發臭,個頭唔好十日唔洗咁一住住加幾片不規則硬塊,指甲長到識轉彎,呢d係做人既基本衞生,唔好話女仔,如果你咁樣係人都唔願意同你接觸。
唔係叫你追潮流唔係要你好靚仔,只不過係希望你個中間分界既頭可以唔好分得咁中,瞓到有一邊扁左既頭髮可以梳返順,個戴到生哂青苔又甩哂色既鐵眼鏡可以換過個咁姐。
我今日見到有個男人著d有彈性既彩色緊身衫+gel到個頭曉反光,果種感覺就好似上當年我細個同爹娘返大陸去果間disco見到果d識係舞池度打後空翻既所謂飛仔咁,不過而家大陸好多飛仔都仲係咁既樣,我懷疑果條友係穿過時光隧道黎既。最慘就係果d人其實自己以為自己好型,睇佢呢一身打扮都應該花過下時間,如果唔係都唔會gel到個頭好硬淨。

講適當既笑
一百個女仔,八十九個都鍾意風趣既男人,但係果一百個女仔之中,有一百個都唔鍾意d自以為好笑既男人。
求下你,唔好係網度搵d笑話黎講比人知,要搵,都搵d偏僻d,因為大家都係現代人,大家都應該上過網架喇。
笑話既熱門話題,一定要數咸濕笑話,係兄弟面前任你點講都得,但係係女仔面前,唔該唔好咁過份,一百個女仔只係有五十個唔鍾意聽咸濕笑話,但係一百個女仔有一百個都唔鍾意聽過份既咸濕笑話。

以上呢幾樣野,你可以不屑一顧,除非你一係好靚仔,一係好有錢,一係唔想要女朋友。
唔洗講咁多,事實可以証明一切。