朝陽里 朝政廣克，陽德方亨 http://www.flickr.com/photos/terrykuan

458愛的鼓勵 1訂閱站台

二ＯＯ三年三月某日，小城的一對小伙子大曦和小曦，由於近日坊間不停流傳非典型肺炎的恐佈，他們媽媽見兩子年紀還小，於是迫他們戴上口罩，才能結伴上學。而正在上學途中：

小曦：”哥哥，你戴口罩個樣好醜呀！”

大曦：”車，你都唔好睇得去邊啦，冇法～媽媽驚我地非典型肺炎嘛，死人架！唉～其實打仗死重多人啦，點解又要打仗喎？都唔明ｄ美國人點無啦啦去打人。"

小曦：”我就知呢，佢地咁做一定係為左防範非典型。”

大曦：”點解咁講既？”

小曦：”哈哈，美國總統好叻架，有預知能力，大半年前就叫晒ｄ美國人戴口罩喇～佢地ｄ口罩好誇張架，戴左連個樣都睇唔到～”

大曦：”呢ｄ係防毒面罩，唔係防非典型肺炎架，係用來防生化武器。”

小曦：”生化武器打中人會唔會厲害過非典型？”

大曦：”我點知呀，我都未見過～”

小曦：”係呀，咁如果伊啦克多生化武器，點解依家都唔用畀人地睇既？”
　　
＊　＊　＊　＊　＊　＊　＊　＊　＊　＊　

小曦：”哥哥，肺炎係咪新病黎架？點解以前冇聽過既？”
　
大曦：”肺炎唔係新病，不過呢種非典型肺炎係新既。”

小曦：”咩叫非典型呀？”

大曦：”典型即係好通常，好似慣例既，非典型咪係唔慣常囉。”

小曦：”丫，咁我知點解人人都怕非典型喇。”

大曦：”哈哈，講黎聽下？”

小曦：”好似我地依家測驗咁，老師唔照課本一模一樣咁出，好多人就唔合格，連平時一ｄ高材生都一樣；如果照典型咁出，哈哈，全班都會好成績ｄ。”

＊　＊　＊　＊　＊　＊　＊　＊　＊　＊　

小曦：”哥哥呀，點先唔會有肺炎架？”

大曦：”聽醫師講，平時注意衛生、做多ｄ運動、飲多ｄ強肺既湯水啦。”

小曦：”飲醋得唔得架？人人都爭住買，媽媽之前都買左好多支返來。”

大曦：”醫生講過啦，唔得架，ｄ人既謠言，多數呃人架～”

小曦：”唔制～～媽媽畀人呃呀！！”

大曦：”算啦～醋薰真係可以消典型肺炎毒，而且媽咪都話唔緊要囉，哥少少錢。”

小曦：”點解ｄ人唔呃媽媽買玩具比我玩喎？呃話食雪糕都好丫，哼～偏偏要介紹我飲最唔鐘意既醋，哼哼～憎死佢地～”

＊　＊　＊　＊　＊　＊　＊　＊　＊　＊　

大曦：”咦，呢幾日報紙唔係打仗就非典型，之前重好興講買車既野呀。依家曹伯伯又唔出聲，靚女體育明星個老公又唔出聲，好似消失左咁既。”

小曦：”車，佢地消失好正常既。”

大曦：”你又估到？你仲咁細．．好多野唔會明白既。”

小曦：”咩呀！我成十歲喇，我問你先，肺炎點傳染架？”

大曦：”明明係我問你先，好好，唔同你鬧，香港衛生處話係經過口水鼻涕傳染。”

小曦：”咁咪係囉，如果佢兩個出來一定好多記者，好多記者問野又會好多口水，佢地答唔到問題時瞠大個口得個窿，咁咪好易傳染囉！佢地為香港市民著想咋。”

大曦：”．．．．．．．”

＊　＊　＊　＊　＊　＊　＊　＊　＊　＊

小曦：”做乜唔出聲呀？哥哥，係咪我講得太好呢？”

大曦：”唔～～唔～～唔係呀～邊係呢，唔好講喇，你入課室先啦～記住喎，媽媽叫我地唔好除口罩架！”

小曦：”哦～～～～～～但，你估上堂其實可唔可以戴埋眼罩o既呢？”