告訴我 每天都要讓自己大笑三聲．．．．有益身體健康唷！！！！

14,422愛的鼓勵 40訂閱站台

細漢捌聽人講民間世俗，過年是過甲十五上元攑花燈。

 

有一年阮規家伙仔去台中看燈會，阮小妹徛佇市民廣場，也是彼年燈區附近。

 

三點外阮就出門來到市民廣場，今仔日是黑陰天，燈區內面的燈攏已經拍開，這陣人無濟是翕相尚好的時機，不時看著相機的閃光燈爍來爍去。

 

有人是序大人佮囝仔翕，嘛有序細佮序大人翕做留念，嘛有青年朋友成雙成對做夥來佚陶，用現在流形的數位相機，現翕現看嘛耍甲真歡喜閣真有青春的氣味。

 

時代進步佮古早無仝款，較早花燈是點蠟燭火，會記的讀高中彼時陣雙十節愛去攑燈遊行，燈火攑懸不時予燭油燙著，攑下有當時嘮火燒燈。

 

現代花燈點電池火，各種造形攏有。彼年甲子講是羊年，因此羊仔造形的花燈是滿四界。

 

三隻羊叫做三羊開泰，二隻叫做洋洋得意！我聽邊一个囝仔問因老母講：「一隻羊叫做啥？」我看迄个生做真媠的媽媽想半埔應袂出來，彼个囝仔講：「真簡單啊！一隻羊叫作『羊仔咩咩』！」

 

利害！這種白目狡怪的程度，真正是使我甘拜下風！

 

燈區內面的花燈攏是當地學生做出來比賽的，看著一隻得優勝的美人魚，魚鱗是用CD片安裝的，造形嫷閣有環保觀念！

 

樹跤有一座「蘇武牧羊」，這个故事現在已經無流行矣。

 

這本來是一个大節大義的故事，但是以現在的觀點來想，在冰天雪地無糧食迄種情境下，會當活十外年真正是不可思議。

 

小學時陣國語課本內面講，蘇武佇北海邊飼羊總共有十九年，那喙焦就食雪水那腹肚枵講哺洋毛止饑！

 

哺洋毛止饑！你敢欲相信？若我是毋相信，羊毛那會當食那驚會枵饑失頓，閣加飼一年逗二十年嘛無啥希奇！

 

我捌問老師講，蘇武是安怎毋吮羊仔乳，營養閣免錢！老師講蘇先生牧的羊仔攏是公的。

 

若按呢！十九年後遐所有的羊，逐隻毋就攏予蘇武掣加無毛？無羊毛的羊早就凍死矣囉，哪會當活到十九年？而且有彼種十九年的老羊哥嗎？

 

我會記彼陣講了，予老師罰徛一點鐘！

 

置燈會看著這座「蘇武牧羊」想去早前的代誌，愈想愈感覺迄袸我那講，一隻羊叫做「羊仔咩咩」幻勢會互老師拍甲尻川袂坐椅仔。

 

現在問人蘇武是誰無人知影，甘那知影有一首歌叫作「蘇武牧羊」，擱會當做舞曲來跳舞，阿蘇武是誰？大概是蘇文因小弟吧？敢是？另日問蘇老爺看邁這會知！

 

刊載於「海翁台語文學雜誌」第100期（2010.04），p.65。